Read Mizo_Old_version Numbers 20 Bible Online

Numbers 20 - Mizo_Old_version bible

Numbers 20

¹Tin, Israela thlah, pung khâwmho zawng zawngte chu thla khatnaah chuan Zin thlalêrah an lût a, mipuite chuan Kadesh-ah awmhmun an khuar a; chutah chuan Miriami chu a thi a, chutah chuan an phûm a.

²Tin, pung khâwmho chuan tui an nei ta lo va; Mosia leh Arona chungchâng thu-ah an inpun khâwm chiam a.

³Tin, mipui chuan, “LALPA hmaa kan unaute an thih lai khân Pathianin min lo tihlum ve ta thên zâwk sela aw!

⁴Engati nge LALPA mipuihote hi thi tûra thlalêrah hian i hruai luh ni, keimahni leh kan rante nên?

⁵Eng vângin nge he ram ṭha lo taka min hruai lût tûrin Aigupta ram ata min tihchhuah ni? Buhbâl te, theipui te, grêp kûng te, pawmgranet te awm lohna hmun a ni a, tui in tûr rêng rêng lah a awm hek lo,” tiin Mosia chu an bei vak a.

⁶Tin, Mosia leh Arona chu mipui zîng ata chu inbiakna puan in kawngkaah an kal a, an bawkkhup a; tin, LALPA ropuina an hnênah a lo lang a.

⁷Tichuan, LALPAN Mosia chu a bia a,

⁸“Tiang la la; pung khâwmhote chu awm khâwmtîr la, nang leh i unau Arona nên. An mit hmuhah lungpui chu a tui tichhuak tûrin hrilh la, lungpui ata chu tui i lâk chhuahsak ang a; tichuan, pung khâwmho leh an rante chu i intîr dâwn nia,” tiin.

⁹Chutichuan, Mosia chuan LALPA hma ata tiang chu a thupêk ang chuan a la a.

¹⁰Mosia leh Arona chuan pung khâwmho chu lungpui bulah chuan an awm khâwmtîr a, an hnênah, “Helhmanghote u, ngai teh u, he lungpui ata hi tui kan lâk chhuahsak dâwn che u em ni?” an ti a.

¹¹Tin, Mosia chuan a bân a phar a, lungpui chu a tiang chuan vawi hnih a han vua a; tichuan, tui a lo chhuak ta dur dur mai a, pung khâwmhote leh an rante chuan an in ta a.

¹²Tin, LALPAN Mosia leh Arona hnênah chuan, “Mi rin lohva, Israela thlahte mit hmuha mi chawimawi loh avângin, hêng pung khâwmho hi ka pêk ramah chuan in hruai lo vang,” a ti a.

¹³Hei hi Meriba tuite chu a ni; Israela thlahte chuan LALPA chu an bei vak a, chutah chuan chawimawia a awm tâk avângin.

¹⁴Tin, Mosian Kadesh aṭangin Edom lal hnênah mi a tîr a, “I unaupa Israela chuan heti hian a ti, ‘Kan chunga tuarna lo thleng zawng zawng hi i hria a;

¹⁵kan pi leh pute Aigupta rama an chhuka, rei tak Aigupta rama kan awm te, Aigupta miten keini leh kan pi leh pute ṭha lo taka min tih ziate kha.

¹⁶Tichuan, LALPA kan au va, kan aw chu a lo hria a, vântirhkoh a rawn tîr a, Aigupta ram ata min hruai chhuak a; tin, ngai teh, i ram dep ber khua Kadesh-ah kan awm e.

¹⁷Khawngaih takin i ram hi kan kal tlang teh ang. Lo emaw, grêp huanah emaw kan kal lo vang a, tuichhunchhuah tuite kan in hek lo vang; Lal Lamlianah kan kal zêl ang a, i ram kan pelh hma loh chuan ding lamah emaw, vei lamah emaw kan pêng lo vang,’ ” a ti a.

¹⁸Tin, Edoma chuan a hnênah, “Mi pal tlang tûr a ni lo, mi pal chuan a bei tûr chein khandaih nên ka lo thawk ang,” a ti a.

¹⁹Chutichuan, Israela thlahte chuan a hnênah, “Lamlianah kan kal chho vang a; tin, keimahni leh kan ranin i tui kan in chuan a man chu kan pe ang che; thil dang eng mah ti lovin a kalin kan kal tlang mai ang e,” an ti a.

²⁰Tin, ani chuan, “Kal lo vang,” a ti a. Tichuan, Edoma chu mipui tam tak nên, mi chak takte nên anmahni bei tûrin a lo thawk ta a.

²¹Edoma chuan Israel mite chu a rama kal a phal ta lo va; tichuan, Israel mite chuan an kîrsan leh ta a.

²²Tichuan, Kadesh aṭangin an chhuak a; Israela thlah, mipuiho zawng zawng chuan Hor tlâng an va thleng a.

²³Tin, LALPAN Mosia leh Arona chu, Edom ram dep Hor tlângah chuan a bia a,

²⁴“Arona chu a chipuite hnênah hruai a ni ang; Meriba tuiahte khân ka thu dodâla in hel avâng khân Israela thlahte ka pêk ramah chuan a lût dâwn lo a ni.

²⁵Arona leh a fapa Eleazara chu Hor tlângah rawn hruai chho rawh;

²⁶Arona chu a silhfênte hlihsak la, a fapa Eleazara bel rawh; Arona chu a chipuite hnênah hruai a ni ang a, chutah chuan a thi ang,” tiin.

²⁷Tin, Mosia chuan LALPA thupêk ang chuan a ti a, mipui zawng zawng mit hmuhah Hor tlângah chuan an chho va.

²⁸Tichuan, Mosia chuan Arona chu a silhfênte a hlihsak a, a fapa Eleazara a bel a; tin, Arona chu tlâng chhîpah chuan a thi ta a. Tichuan, Mosia leh Eleazara chu tlâng ata chu an chhuk a.

²⁹Tin, mipui zawng zawng chuan Arona a thi tih an hriat chuan, Israel-ho zawng zawng chuan ni sawmthum an sûn a.