Read Mizo_Old_version Numbers 21 Bible Online

Numbers 21 - Mizo_Old_version bible

Numbers 21

¹Tin, Kanaan mi, Arad lal Chhim lama awmin Israel mite Atharim kawngah an lo kal tih sawi thâwm a hria a; tichuan, Israel mite chu a bei a, salahte a man nual a.

²Tin, Israel mite chuan LALPA hnênah thu an tiam a, “Hêng mite hi kan kuta min pêk chuan an khuate hi kan tiboral hlauh ang e,” an ti a.

³Tichuan, LALPAN Israel mite thu chu a pawm a, Kanaan mite chu a pe a, anmahni leh an khuate chu an tiboral hlauh va; a hmun hmingah chuan Horma an vuah a.

⁴Tin, Hor tlâng aṭang chuan Tuifinriat Sen lamah Edom ram kal hualin an kal a; kawng a kual avângin mipuite rilru chu a lungni lo hle mai a.

⁵Mipuite chuan Pathian leh Mosia kalhin, “Thlalêra thi tûrin engati nge Aigupta ata min hruai chhuah? Chhang awm hlei lo, tui pawh awm hlei lo; he chhang tenawm pawh hi kan nunnain a ten tawh a ni,” an ti a.

⁶Chutichuan, LALPAN mipui zîngah chuan rûl chuk na mite a tîr a, mite a chu a, Israel mite tam tak an thi a.

⁷Tin, mite chu Mosia hnênah an kal a. “LALPA leh nangmah kalhin kan lo ṭawng ta hi kan lo sual ta a ni e, kan zînga rûlte hi tibo tûrin LALPA hnênah ṭawngṭai rawh khai,” an ti a; tichuan, mite chu Mosia chuan a ṭawngṭaisak a.

⁸Tin, LALPAN Mosia hnênah, “Rûl chuk na mi, a lem siam la, banah khai rawh; tin, heti hi a ni ang a, rûl chuk apiangin chu chu an en chuan an dam ang,” a ti a.

⁹Chutichuan, Mosian dâr rûl a siam a, banah a khai a; tin, heti hi a ni a, rûl chuk apiangin dâr rûl chu an enin an dam zêl a.

¹⁰Tin, Israela thlahte chu an kal ta zêl a, Oboth-ah awmhmun an khuar a.

¹¹Tin, Oboth aṭang chuan an kal leh a, ni chhuahna lam Moab thlalêr bul Iye-abarim-ah awmhmun an khuar a.

¹²Chuta ṭang chuan an kal leh a, Zered ruamah awmhmun an khuar a.

¹³Chuta ṭang chuan an kal leh a, Amor-ho ramri aṭanga lo filawr thlalêra Arnon lehlam pangah awmhmun an khuar a; Arnon chu Moab ramri, Moab leh Amor-ho inkâra awm a ni a.

¹⁴Chuvângin, LALPA Indonate Buah chuan “Supha-a Vaheb, Arnon ruamte,

¹⁵Ar awmna lama thle Moab rama innghat Ruam awihtlân pangpêrte chu,” tia sawi a ni.

¹⁶Chuta ṭang chuan Beer-ah an kal leh a; chu chu LALPAN Mosia hnêna, “Mipuite chu ko khâwm la, tui ka pe ang e,” a tihna tuichhunchhuah chu a ni.

¹⁷Tin, he hla hi Israel-ten an sa a: “Aw tuikhur, lo chik chhuak la, zaiin chawi la,

¹⁸Lalten an laih tuikhur chu. An lal tiang leh an talhtuma Mipuite mi lianho laih chu.” Tin, thlalêr aṭang chuan Matana-ah an kal leh a;

¹⁹tin, Matana aṭangin Nahaliel-ah, Nahaliel aṭang chuan Bamoth-ah,

²⁰Bamoth aṭang chuan Moab lova ruam leh thlalêr zuk chhuk en Pisga chhîpah.

²¹Tin, Israel mite chuan Amor-ho lal Sihona hnênah, “I ramah hian min kal tlangtîr rawh khai. Lovah emaw, grêp huanah emaw kan pêng lo vang a; tuichhunchhuah tuite chu kan in lo vang. I ram kan pelh hma loh chuan Lal Lamlianah kan kal zêl ang e,” tiin mi an tîr a.

²³Nimahsela, Sihona chuan Israel mite chu a rama kal tlang a phal lo va. Tichuan, Sihona chuan a mite zawng zawng chu a khâwm vek a, Israel mite bei tûrin thlalêrah chuan an thawk chhuak ta zâwk a, Jahaz a va thleng a; tin, Israel mite chu a bei a.

²⁴Tin, Israel mite chuan khandaihin an bei a, a ram chu Arnon aṭanga Jabok thlengin, Amona thlahte thleng hialin an neihsak a; Amona thlahte ram chu kulha hung tlat a ni.

²⁵Tin, Israel mite chuan chûng khua zawng zawngte chu an la a; tichuan, Israel mite chu Amor-ho khua zawng zawngahte chuan an awm a, Hesbon leh a khawper zawng zawngahte pawh chuan.

²⁶Hesbon khua chu Amor-ho lal Sihona khua a ni a, ani chu chumi hmaa Moab lal lo beia a kut ata a ram zawng zawng, Arnon thlenga lâksaktu a ni.

²⁷Chuvângin, hlaa phuahtute chuan, “Hesbon-ah lo kal ula, Sihona khawpui chu din leh tihngheh ni se;

²⁸Hesbon aṭangin mei a chhuak a, Sihona khawpui aṭangin meialh; Moab-a Ar a kâng zo va, Arnon hmun sâng lalhote chu.

²⁹I chung a pik e, Moab! In boral ta, aw Kemos mi! A fapate chu tlân bo atân, A fanute salah a pe, Amor-ho lal Sihona hnênah.

³⁰Kan han kâp a, Hesbon a boral, Dibon thlengin, Nopha thlengin kan tiṭiau, Chu chuan Medeba a thleng,” an ti.

³¹Chutiang chuan a ni, Amor-ho ramah Israel mite chu an awm.

³²Tin, Mosian Jazer va thlîthlai tûrin mi a tîr a, chuta khuate chu an la a, Amor-ho awmte chu an hnawt chhuak a.

³³Tin, an lêt a, Basan kawng lamah an chho va. Tin, Basan lal Oga chu anmahni bei tûrin, amah leh a mite zawng zawng, Edrei-a lo bei tûrin a thawk chhuak a.

³⁴Tin, LALPAN Mosia hnênah, “Amah chu hlau suh; amah pawh, a mite zawng zawng pawh, a ram pawh i kutah ka pe tawh a ni; Hesbon-a awm Amor-ho lal Sihona chunga i tih angin i ti tûr a ni,” a ti a.

³⁵Chutichuan, amah pawh, a fapate pawh, zuah rêng rêng nei lovin a mite zawng zawng nên an that a; a ram chu an luahsak ta a.