Read Mizo_Old_version Numbers 22 Bible Online

Numbers 22 - Mizo_Old_version bible

Numbers 22

¹Tin, Israela thlahte chu an kal zêl a, Jeriko zâwn Jordan râla Moab phaiahte awmhmun an khuar a.

²Tin, Zipori fapa Balaka chuan Israel miten Amor-ho an tih dân zawng zawng chu a hria a.

³Tin, Moab-hote chuan mite chu an hlau hle mai a, an tam si a; Israela thlahte avâng chuan Moab-hote chu an mangang a.

⁴Tichuan, Moab-hote chuan Midian-ho upate hnênah, “Hêng mipuite hian bâwngin hlobet an pet zo angin kan vêla mi zawng zawng an pet zo dâwn e,” an ti a. Chumi lai chuan Zipori fapa Balaka chu Moab lal a ni a.

⁵Tin, ani chuan, “Ngai teh, hnam pakhat, Aigupta ram aṭanga lo chhuakho an lo awm a; ngai teh, leilung an dâp a, min depah an awm a! Khawngaih takin lo kal la, hêng mite hi ânchhia min va lawhsak teh khai, keia tân chuan an chak lutuk a ni. Kan that theiin, kan ngam theiin, kan ram ata hi kan hnawt chhuak thei mial mahna; mal i sâwm apiangte chu malsâwmin an awm a, ânchhia i lawh apiangte chu ânchhe dawngin an awm ṭhîn tih ka hre si a,” tia ko tûrin a thlahte awmna ram Lui kama Pethor-ah Beora fapa Balaama hnênah mi a tîr a.

⁷Tichuan, Moab upate leh Midian upate chu aien man tûr kengin an chhuak ta a, Balaama hnên chu an va thleng a, Balaka thuchah chu an hrilh a.

⁸Tin, ani chuan an hnênah, “Zânin chu hetah riak ula, LALPAN min hrilh ang angin in hnênah thu ka rawn thlen ang che u,” a ti a. Tichuan, Moab mi liante chu Balaama hnênah chuan an riak ta a.

⁹Tin, Balaama hnênah chuan Pathian a lo kal a, “I hnêna mite hi tute nge ni?” a ti a.

¹⁰Tin, Balaama chuan Pathian hnênah, “Zipori fapa Moab lal Balaka chuan ka hnênah, ‘Ngai teh, Aigupta ram aṭanga lo kal hnam chuan leilung an dâp a. Lo kal la, ânchhia mi va lawhsak rawh, ka do theiin ka hnawt chhuak thei mial mahna,’ tiin mi a rawn tîr a ni,” a ti a.

¹²Tin, Pathianin Balaama hnênah chuan, “An hnênah i kal tûr a ni lo. Chung mite chu ânchhia i lawh tûr a ni lo, mal ka sâwmte an ni e,” a ti a.

¹³Tichuan, Balaama chu zîngah a tho va, Balaka mi liante hnênah chuan, “In ramah haw leh tawh u; LALPAN in hnêna kal tûra chhuah a phal lo a ni,” a ti a.

¹⁴Chutichuan, Moab mi liante chu an tho va, Balaka hnênah an kal a, “Balaama chuan kan hnêna lo kal a duh lo,” a ti a.

¹⁵Tin, Balaka chuan mi lian tam lehzual, an aia ropui zâwk a tîr leh a.

¹⁶Tin, Balaama hnên an va thleng a, a hnênah, “Zipori fapa Balaka chuan heti hian a ti a ni, ‘Ka hnêna i lo kal hi eng mahin dâl teh suh se;

¹⁷mi ropui takah ka siam ang chia, ka hnêna i sawi apiang chu ka ti zêl ang. Chuvângin, lo kal hrâm la, hêng mite hi ânchhia mi va lawhsak teh hrâm khai,’ a ti,” an ti a.

¹⁸Tin, Balaama chuan Balaka mite chu a chhâng a, an hnênah, “Balaka hian a in chu tangka leh rangkachaka khatin mi pe dâwn mah sela, eng khaw tê mah LALPA ka Pathian thu bawhpêlin ka ti thei lo.

¹⁹Chuvângin, LALPAN ka hnênah engtin nge a sawi leh dâwn teh rêng, zânin pawh hetah riak teh phawt u khai,” a ti a.

²⁰Tin, zânah chuan Balaama hnênah Pathian chu a lo kal a, a hnênah, “Heng mite hi nangmah kova lo kal an nih chuan, tho la, an hnênah kal rawh; amaherawhchu, i hnêna ka sawi chauh hi i ti tûr a ni,” a ti a.

²¹Tichuan, Balaama chu zîngah a tho va, a sabengtung a thuam a, Moab mi liante hnênah chuan a kal ta a.

²²Tin, a kal avâng chuan Pathian thin chu a lo alh ta a; tin, LALPA vântirhkoh chu a lo dang tûrin kawngah a lo ding a. A sabengtung chunga chuang a ni a, a chhiahhlawhte pahnih a hnênah chuan an awm ve a.

²³Tin, sabengtung chuan LALPA vântirhkoh, khandaih kenga kawnga ding chu a hmu a; tichuan, sabengtung chu kawng ata chu a pêng a, ram lakah a kal a. Tin, Balaama chuan sabengtung chu kawnga lêttîr tumin a vua a.

²⁴Tin, LALPA vântirhkoh chu grêp huan pal leh pal inkâr khuarah a ding a.

²⁵Tin, sabengtung chuan LALPA vântirhkoh chu a hmu a, pal chu a va nghêng a, Balaama ke chu palah chuan a nghêng bet a; tichuan, a vaw leh a.

²⁶Tin, LALPA vântirhkoh chu piah leh deuhvah a kal a, hmun chêp lai tak, ding lam emaw, vei lam emaw pawha pênna awm lohna lai takah a ding a.

²⁷Tin, sabengtung chuan LALPA vântirhkoh chu a hmu a, Balaama chu a bawhpui ta a; tichuan, Balaama thin chu a lo alh ta a, a tiangin sabengtung chu a vua a.

²⁸Chutichuan, LALPAN sabengtung chu a ṭawngtîr a, Balaama hnênah chuan, “Eng ka tih che nge, hetia vawi thum zet mi vuak tâk?” a ti a.

²⁹Tin, Balaaman sabengtung hnênah chuan, “Mi tihnawmnah avângin a ni. Khandaih phei chu lo keng ila, ka tihlum tawh hial ang che chu,” a ti a.

³⁰Tin, sabengtung chuan Balaama hnênah, “Tûn thlenga i chuan fona i sabengtung ka ni lâwm ni? Hetiang hian ka ti ngai che em ni?” a ti a. Ani chuan, “Ti ngai lo ve,” a ti a.

³¹Tin, LALPAN Balaama mit chu a tihvârsak a; tichuan, LALPA vântirhkoh, khandaih kenga kawnga ding chu a hmu ta a; a kûn a, hmaia lei siin a bawkkhup a.

³²Tin, LALPA vântirhkoh chuan a hnênah, “Engati nge hetia vawi thum tlawng i sabengtung i vuak? Ngai teh, ka hmaah hian i kal lohna tûra i kal avângin lo dang tûr chein ka lo chhuak a ni.

³³Sabengtung chuan mi hmu a, ka hmaah vawi thum a pêng a nih kha; pêng lo phei sela chu ani chu tihlum si lovin ka tihlum hial ang che chu,” a ti a.

³⁴Tin, Balaama chuan LALPA vântirhkoh hnênah, “Ka lo sual ta a ni; mi dang tûrin kawngah i ding tih ka hre si lo va. Chuvângin, i lâwm loh chuan ka kîr leh mai ang e,” a ti a.

³⁵Tin, LALPA vântirhkoh chuan Balaama hnênah, “Heng mite hnênah hian kal la; amaherawhchu, i hnêna ka thusawi chauh i sawi tûr a ni,” a ti a. Chutichuan, Balaama chu Balaka mi liante hnênah chuan a kal ta a.

³⁶Tin, Balakan Balaama a lo kal tih a hriat chuan, Arnon lama an ramri chin Moab khawpui thlengin a va hmuak a.

³⁷Tin, Balaka chuan Balaama hnênah, “Ṭhahnemngai taka ko tûr chein mi ka rawn tîr a ni lâwm ni? Engati nge ka hnênah i lo kal duh loh? Mi ropui takah ka siam thei lo che em ni?” a ti a.

³⁸Tin, Balaama chuan Balaka hnênah, “Ngai teh, hei ka lo kal ta a; eng pawh mai sawi theihna rêng rêng ka nei em ni? Pathianin ka kâa thu a dah chauh ka sawi dâwn a ni,” a ti a.

³⁹Tichuan, Balaama chu Balaka hnênah chuan a kal ta a, Kiriath-huzoth an va thleng a.

⁴⁰Tin, Balaka chu bâwng leh berâmin a inthawi a, Balaama leh a hnêna mi lian awmte chu a pe a.

⁴¹Tin, heti hi a ni a, a tûk zîngah Balaka chuan Balaama chu a hruai a, Baala hmun sângahte chuan a chhohpui a, chuta ṭang chuan mipui awmna chin zawng zawng a hmu phâk a.