Read Mizo_Old_version Numbers 23 Bible Online

Numbers 23 - Mizo_Old_version bible

Numbers 23

¹Tin, Balaama chuan Balaka hnênah, “Hetah hian maichâm pasarih min siam la, bâwngpa pasarih leh berâmpa pasarih min buatsaihsak rawh khai,” a ti a.

²Balaka chuan Balaama sawi ang chuan a ti a; tin, Balaka leh Balaama chuan maichâm tinah chuan bâwngpa pakhat leh berâmpa pakhat an hlân a.

³Tin, Balaama chuan Balaka hnênah, “I hâlral thilhlan bulah hian lo ding reng la, kei chu ka han kal hrang ang a; LALPA chu mi be tûrin a lo kal mai pawh a ni thei a, mi hrilh apiang chu ka hrilh ang che,” a ti a. Tichuan, tlâng kawlh vel vulah a han kal a.

⁴Tin, Pathianin Balaama chu a lo tâwk a; tin, Balaama chuan a hnênah, “Maichâm pasarih chu ka siam tawh a; tin, maichâm tinah chuan bâwngpa pakhat leh berâmpa pakhat ka hlân ṭheuh va,” a lo ti a.

⁵Tin, LALPAN Balaama kâah chuan thu a dah a, “Balaka hnênah chuan kîr leh ta la, va sawi chhâwng rawh,” a ti a.

⁶Tichuan, a hnên lamah chuan a lêt leh ta a; tin, ngai teh, a hâlral thilhlan bulah chuan a lo ding reng a, amah leh Moab mi lian zawng zawngte nên.

⁷Tin, ani chuan thu chu a sawi ta a. “Aram ata Balakan min hruai a, Chhak lam tlânga Moab lal chuan, ‘Lo kal la, Jakob-ho ânchhia min lawhsak rawh, Lo kal la, Israel-ho min demsak rawh,’

⁸Engtin nge Pathian ânchhe lawh loh ka lawh ang? Engtin nge Pathian dem loh ka dem ang?

⁹Lungpui chung aṭangtein anni chu ka hmu si a, Tlâng aṭangtein anni chu ka hmu a, Ngai teh, hnam hrang daih an ni, Hnam dang zînga telh loh tûr an ni.

¹⁰Jakob-ho vaivut chu tu nge chhiar thei ang a, Israel-ho hmun lia ṭhena hmun khat chu tu nge chhiar thei ang? Mi fel thih angin thi ve ila, Ka tâwpna chu a tâwpna ang ni se!” a ti a.

¹¹Tin, Balaka chuan Balaama hnênah, “I mi tih dân hi engtizia nge ni? Ka hmêlmate ânchhe lawh tûrin ka hruai chia, hei, mal i sâwm ta hlauh zâwk si!” a ti a.

¹²Ani chuan a chhâng a, “LALPAN ka kâa a dah chu ka sawi ngei tûr a ni lâwm ni?” a ti a.

¹³Tin, Balaka chuan a hnênah, “Hmun dangah i kal leh teh ang, chuta ṭang chuan i hmu thei hlawm ang a; an awmna chin zawng zawng i hmu ang a, an za erawh chuan i hmu vek kher lo vang; chuta ṭang chuan ânchhia min lawhsak ang che,” a ti a.

¹⁴Tichuan, Zophim-ho awmna Pisga chhîpah a hruai chho va, maichâm pasarih a siam a, maichâm tinah chuan bâwngpa pakhat leh berâmpa pakhat a hlân a.

¹⁵Tin, Balaka hnênah chuan, “Sawlaia LALPA ka va biak hlânin i hâlral thilhlan bulah hian lo ding reng rawh,” a ti a.

¹⁶Tin, LALPAN Balaama chu a lo tâwk a, a kâah chuan thu a dah a, “Balaka hnênah kîr leh ta la, a hnênah va sawi chhâwng rawh,” a ti a.

¹⁷Tin, a hnênah chuan a va kal a, ngai teh, a hâlral thilhlan bulah chuan a lo ding reng a, Moab mi liante pawh a hnênah chuan an awm ve a. Tin, Balaka chuan a hnênah, “LALPAN eng nge a lo sawi?” a ti a.

¹⁸Tichuan, ani chuan thu chu a sawi ta a: “Tho la, Balak, ngaithla rawh; Zipori fapa, ka thu ngai rawh.

¹⁹Pathian chu dâwt hmang mihring a ni lo va, Inlamlêt hmang hringfa a ni hek lo. A sawi tawh chu a ti lo vang em ni? A lo sawi tawh chu a tipuitling lo vang em ni?

²⁰Ngai teh, malsâwm tûrin thu ka hmu, Mal a sâwm tawh a, ka tidanglam thei lo.

²¹Jakob-ho khawlohna rêng a hmu lo va, Israel-hovah chhiatna rêng ka hmu hek lo. LALPA an Pathian chuan a awmpui a, An lal atân an hmang a ni.

²²Aigupta aṭangin Pathianin a hruai chhuak hlawm, Sele tha ang mai an pu a,

²³Jakob-ho chungah dawi âtna a awm lo. Israel-ho chungah dawi vaihna a awm hek lo. Jakob-ho leh Israel-ho hnênah Pathian thiltih chu tihlan zêl a ni.

²⁴Ngai teh, mipuite chu sakeibakneipui angin an tho va, Sakeibaknei angin an zuang tho va, An sa seh an ei hma chuan an mu lâwng, An seh thisen an in hma chuan,” a ti a.

²⁵Tin, Balaka chuan Balaama hnênah, “Anchhia lawh hek suh la, malsâwm hek suh,” a ti a.

²⁶Nimahsela, Balaama chuan a chhâng a, Balaka hnênah, “ ‘LALPAN a sawi zawng zawng chu ka ti ngei tûr a ni,’ tiin ka hrilh che a ni lâwm ni?” a ti a.

²⁷Tin, Balaka chuan Balaama hnênah, “Hawh teh, hmun dangah ka hruai teh ang che; chuta ṭang chuan ânchhia min lawhsak Pathianin a remti mial dah law maw,” a ti a.

²⁸Tichuan, Balaka chuan Balaama chu thlalêr zuk chhuk en Peor chhîpah a hruai chho va.

²⁹Tin, Balaaman Balaka hnênah chuan, “Hetah hian maichâm pasarih min siamsak la, bâwngpa pasarih leh berâmpa pasarih min buatsaihsak rawh,” a ti a.

³⁰Tin, Balaka chuan Balaama sawi ang chuan a ti a, maichâm tinah chuan bâwngpa pakhat leh berâmpa pakhat a hlân a.