Read Mizo_Old_version Numbers 25 Bible Online

Numbers 25 - Mizo_Old_version bible

Numbers 25

¹Tichuan, Israel-ho chu Sitim-ah an awm a; tin, Moab-ho fanute chu an pâwl ta hlawm a.

²An pathiante hnêna an inthawinaahte chuan an sâwm a; tichuan, an ei a, an pathiante chu chibai an bûk ve a.

³Tin, Israel-ho chuan Peor hmuna Baala chu an pawm ve ta a; tichuan, Israel-ho chungah LALPA thin chu a alh ta a.

⁴Chutichuan, LALPAN Mosia hnênah, “Mipuite hotu zawng zawng chu hruai la, LALPA thinurna ṭihbaiawm tak mai chu Israel-ho chung ata a kian theih nân, chhûn êngah LALPA hmaah khai hlum rawh,” a ti a.

⁵Tin, Mosian Israel-ho rorêltute hnênah chuan, “Peor hmuna Baala pawm apiangte chu tihlum vek rawh u,” a ti a.

⁶Tin, ngai teh, Israela thlahte zinga mi pakhatin inbiakna puan in kawngkaa an ṭah lai takin, Mosia mit hmuhah leh Israel-ho pung khâwmte mit hmuhah, Midian hmeichhe pakhat a chhûngte hnênah a rawn hruai a.

⁷Tin, puithiam Arona fa Eleazara fapa Phinehasan a han hmuh chuan pung khâwmho zîng ata chu a tho va, fei a chuh a;

⁸tin, Israel mi chu puan in chhûngah chuan a ûm lût a, Israel mi nên an pahnih chuan a chhun tlang a, hmeichhia chu a pumah. Chutichuan, Israela thlahte chunga hremna chu a reh ta a.

⁹Chumi hremnaa thite chu sînghnih leh sângli an ni.

¹⁰Tin, LALPAN Mosia a bia a,

¹¹“Puithiam Arona fa Eleazara fapa Phinehasa hian ka thîk anga an zînga a thîkna chuan ka thinurna chu Israela thlahte lak ata a tikiang ta a; tichuan, ka thîkna chuan Israela thlahte chu ka tiboral lo vang a.

¹²Chuvângin, ‘Ngai teh, ka inremna thuthlung chu a chungah ka thlung ang a;

¹³tin, amah leh a hnua a thlahte tân kumkhaw puithiam nihna thuthlung a ni ang a; a Pathian tân a thîka, Israela thlahte tân inremna a siam avângin,’ ti rawh,” tiin.

¹⁴Israel mi an thah, Midian hmeichhia nêna an thah tâka hming chu Zimria, Simeon-ho zînga an chhûngkaw puipa Salua fapa a ni a.

¹⁵Tin, Midian hmeichhia an thah tâka hming chu Kozbi, Zura fanu a ni; ani chu Midian-ho chhûngkaw zînga an hotu a ni.

¹⁶Tin, LALPAN Mosia a bia a,

¹⁷“Midian-ho chu bei ula, titlâwm rawh u;

¹⁸Peor hmunah an bum che u a, hrem tâk Midian-ho mi lian fanu, Kozbi an thah tâk chungchâng thu-ah in chungah thil dik lo tak an tih avâng hian,” tiin.