Read Mizo_Old_version Numbers 27 Bible Online

Numbers 27 - Mizo_Old_version bible

Numbers 27

¹Tin, Josefa fapa Manasea thlah, Manasea fa Makira, chu mi fa Gileada, chu mi fa Hephera fapa Zelophehada fanute chu an lo kal a; a fanute hming chu: Malai te, Novai te, Hoglai te, Milkai te, Tirzai te a ni.

²Tin, inbiakna puan in kawngkaah Mosia leh puithiam Eleazara leh mi lianho leh pung khâwmho zawng zawng hmaah chuan an va ding a,

³“Thlalêrah khân kan pa a thi a, LALPA bei tûra pung khâwm pâwl, Kora pâwlah khân a tel ve lo ve; nimahsela, ama sual avângin a thi a, fapa a nei lo va.

⁴Fapa a neih loh avâng maiin engah nge kan pa hming chu a thlahte zîng ata a bo vang? Kan pa unaute zîngah chanvo min pe ve rawh u,” an ti a.

⁵Tin, Mosian an thu chu LALPA hmaah a thlen a.

⁶Tin, LALPA chuan Mosia a bia a,

⁷“Zelophehada fanute chuan an tidik a ni; an pa unaute zîngah chanvo i siam ngei tûr a ni a, an pa chanvo chu i pe tûr a ni.

⁸Tin, Israela thlahte hnênah, ‘Mi, fapa nei lova a thih chuan a ro chu a fanute in pe tûr a ni.

⁹Tin, fanu a neih loh chuan a ro chu a unaute in pe tûr a ni.

¹⁰Tin, unaute a neih loh chuan a ro chu a pa unaute in pe tûr a ni.

¹¹Tin, a pain unaute a neih loh chuan a ro chu a laichîn in pe ang a, anin a khâwm ang. Tin, LALPAN Mosia thu a pêk angin Israela thlahte tân dân thupêk nghet a ni ang,’ tiin sawi rawh,” tiin.

¹²Tin, LALPAN Mosia hnênah, “Abarim tlângah khian han chho la, Israela thlahte ka pêk tûr ram han thlîr rawh.

¹³Tin, i han hmuh zawh chuan i unaupa Arona chu a chipuite hnênah hruai a ni ang bawkin nang pawh hruai i ni tawh ang.

¹⁴Zin thlalêra pung khâwmho an phunnawi laia an mit hmuhah tuiah khân, mi chawimawi tûra ka thupêk che kalha i hel avâng khân,” a ti a (Chûng chu Zin thlalêra Kadesh-a Meriba tuite chu a ni).

¹⁵Tin, Mosian LALPA a bia a,

¹⁶“LALPA, nunna zawng zawng hnâr Pathian chuan, LALPA mi pung khâwmte chu vêngtu nei lo berâm anga an awm loh nân pung khâwm chunga hotu, an hma hruaia, anmahni hruai chhuaka hruai lûttu tûr ruat rawh se,” tiin.

¹⁸Tin, LALPAN Mosia hnênah, “Nuna fapa, mi rilru nei tak Josua chu hruai la, a chungah i kut nghat la,

¹⁹puithiam Eleazara leh pung khâwmho hmaah dintîr la, an mit hmuhah thuneihna pe rawh.

²⁰Tin, Israela thlah pung khâwmho zawng zawngin a thu an awih theih nân thuneihna hlân rawh.

²¹Tichuan, ani chu puithiam Eleazara hmaah a ding ang a, anin LALPA hmaah Urim hmangin thu a la ang a; a thuin an chhuak ang a, a thuin an lût ang, amah leh Israela thlah zawng zawngte, pung khâwmho zawng zawngte nên,” a ti a.

²²Tin, Mosia chuan LALPA thupêk ang chuan a ti a. Josua chu a hruai a, Eleazara leh pung khâwmho zawng zawng hmaah chuan a dintîr a.

²³Tin, a chungah a kut a nghat a, Mosia hmanga LALPAN a sawi ang khân thuneihna a pe ta a.