Read Mizo_Old_version Numbers 28 Bible Online

Numbers 28 - Mizo_Old_version bible

Numbers 28

¹Tin, LALPAN Mosia a bia a,

²“Israela thlahte chu thu pe la, an hnênah, ‘Ka chaw, ka tâna rimtui meia thilhlan, ka hnênah thilhlan chu a hun tak zêl ṭheuhvah in hlan tûr a ni,’ ti la.

³Tin, an hnênah, ‘Hei hi meia thilhlan LALPA hnêna in hlan tûr chu a ni: berâmno a pa, kum khat mi, sawisêl bo, ni tin pahnih, hâlral thilhlan hlan reng atân.

⁴Berâmno pakhat chu zîngah in hlân ang a, pakhat chu tlai lamah in hlân ang a,

⁵chhangphut thilhlan atân chhangphut dip mi epha hmun sâwma ṭhena hmun khat, hriak sâwr hin hmun lia ṭhena hmun khata chawhpawlh nên.

⁶LALPA tâna meia thilhlan, rimtui atâna Sinai tlânga ruat hâlral thilhlan hlan reng tûra kha a ni.

⁷Tin, berâmno pakhat hlannaa in tûr thilhlan chu, hin hmun lia ṭhena hmun khat a ni tûr a ni; LALPA tâna uain, in tûr thilhlan chu hmun thianghlimah i bun chhuak tûr a ni.

⁸Tin, berâmno pakhat chu tlai lamah i hlân tûr a ni; zîng lama chhangphut thilhlan ang leh chumia in tûr thilhlan ang bawk chu, LALPA tâna rimtui atân meia thilhlan chu i hlân tûr a ni.

⁹“ ‘Tin, Chawlhniah berâmno, a pa kum khat mi sawisêl bo pahnih leh, chhangphut thilhlan atân chhangphut dip mi, epha hmun sâwma ṭhena hmun hnih hriaka chawhpawlh leh, chumia in tûr thilhlan nên i hlân tûr a ni;

¹⁰hei hi Chawlhni apianga hâlral thilhlan reng leh, chumia in tûr thilhlan tiam lova hâlral thilhlan hlan tûr chu a ni.

¹¹“ ‘Tin, in thla thar apiangah LALPA tân hâlral thilhlan in hlân tûr a ni: bâwngpatuai pahnih leh berâmpa pakhat leh berâmno a pa kum khat mi sawisêl bo pasarih;

¹²tin, bâwngpa tinah chhangphut thilhlan atân chhangphut dip mi, hriaka chawhpawlh epha hmun sâwma ṭhena hmun thum; tin, berâm pakhatah chhangphut thilhlanah chhangphut dip mi hriaka chawhpawlh hmun sâwma ṭhena hmun hnih;

¹³tin, berâmno tinah chhangphut thilhlanah chhangphut dip mi, hriaka chawhpawlh hmun sâwma ṭhena hmun khat; hei hi hâlral thilhlan rimtui LALPA tân meia thilhlan a ni.

¹⁴Tin, an in tûr thilhlan chu bâwngpa pakhatah uain hin chanve a ni ang a, berâmpa pakhatah hin hmun thuma ṭhena hmun khat, berâmno pakhatah hin hmun lia ṭhena hmun khat; hei hi kum tluana thla tin hâlral thilhlan a ni.

¹⁵Tin, LALPA hnêna sual thawi nân kêlpa pakhat in hlân tûr a ni; hâlral thilhlan hlan reng leh chumia in tûr thilhlan tiam lovin.

¹⁶“ ‘Tin, thla khatna, ni sâwm leh ni li ni chu LALPA kalhlên kût a ni.

¹⁷Tin, chumi thla ni sâwm leh ni nga ni chu ruai ni a ni ang; ni sarih chu chhang dawidim telh loh ei tûr a ni ang.

¹⁸Ni khat ni chuan inkhâwmpui thianghlim a awm ang a; eng hna mah in thawk tûr a ni lo.

¹⁹Meia thilhlan hâlral thilhlan erawh chu LALPA hnênah in hlân tûr a ni: bâwngpatuai pahnih leh berâmpa pakhat leh berâmno a pa kum khat mi pasarih; in ngaiha sawisêl bo a ni tûr a ni.

²⁰Chhangphut dip mi, hriaka chawhpawlh, an chhangphut thilhlan nên: bâwngpa pakhatah hmun sâwma ṭhena hmun thum, berâmpa pakhatah hmun sâwma ṭhena hmun hnih;

²¹berâmno pasarih chu beramno pakhatah hmun sâwma ṭhena hmun khat a ni tûr a ni;

²²tin, in tâna inremna siamna tûrin sual thawi nân kêlpa pakhat.

²³Hêng hi zînga thilhlan, hâlral thilhlan hlan reng tiam lovin in hlân tûr a ni.

²⁴Hetiang hian LALPA tâna rimtui, meia thilhlan ei tûr chu ni tin, ni sarih in hlân tûr a ni; hâlral thilhlan hlan reng leh chumia in tûr thilhlan tiam lovin.

²⁵Tin, a ni sarih ni chuan inkhâwmpui thianghlim in nei ang a, eng hna mah in thawk tûr a ni lo.

²⁶“ ‘Tin, in chawlhkâr kût, in buh thar tirh kût LALPA tâna thil thar chhangphut thilhlan in hlan ni pawhin, inkhâwmpui thianghlim in nei ang a; eng hna mah in thawk tûr a ni lo.

²⁷LALPA tâna rimtui hâlral thilhlan erawh chu in hlân tûr a ni: bâwngpatuai pahnih, berâmpa pakhat, berâmno a pa kum khat mi pasarih;

²⁸an chhangphut thilhlan, chhangphut dip mi hriaka chawhpawlh nên: bâwngpa pakhatah hmun sâwma ṭhena hmun thum, berâmpa pakhatah hmun sâwma ṭhena hmun hnih,

²⁹berâmno pasarih, berâmno pakhat ṭheuhvah hmun sâwma ṭhena hmun khat;

³⁰in tana inremna siam nân kêlpa pakhat nên (in ngaiha sawisêl bo a ni tûr a ni).

³¹Hâlral thilhlan hlan reng leh, chumia chhangphut thilhlan leh in tûr thilhlan tiam lovin in hlân tûr a ni.