Read Mizo_Old_version Numbers 29 Bible Online

Numbers 29 - Mizo_Old_version bible

Numbers 29

¹“ ‘Tin, thla sarihna, a ni khat ni chuan inkhâwmpui thianghlim in nei ang a; eng hna mah in thawk tûr a ni lo. In tân tawtawrâwt ham ni a ni tûr a ni.

²LALPA tâna rimtuiah hâlral thilhlan in hlân ang a; bâwngpatuai pakhat, berâmpa pakhat, berâmno a pa kum khat mi sawisêl bo pasarih.

³An chhangphut thilhlan, chhangphut dip mi hriaka chawhpawlh, bâwngpa pakhatah hmun sâwma ṭhena hmun thum, berâmpa pakhatah hmun sâwma ṭhena hmun hnih,

⁴berâmno pasarih, pakhat ṭheuhvah hmun sâwma ṭhena hmun khat;

⁵in tâna inremna siam nân sual thawina kêlpa pakhat nên;

⁶thla thar hâlral thilhlan leh chumia chhangphut thilhlan te, hâlral thilhlan hlan reng leh chumia chhangphut thilhlan te, in tûr thilhlan te, an tih dân pângngai LALPA tâna rimtuia meia thilhlante tiam lovin.

⁷“ ‘Tin, he thla sarihna, ni sâwm ni hian inkhâwmpui thianghlim in nei ang a. Chaw in nghei tûr a ni a, eng hna mah in thawk tûr a ni lo.

⁸LALPA tâna rimtuiah hâlral thilhlan erawh chu in hlân tûr a ni: bâwngpa pakhat, berâmpa pakhat, berâmno a pa kum khat mi pasarih;

⁹in ngaiha sawisêl bo a ni tûr a ni. An chhangphut thilhlan, chhangphut dip mi hriaka chawhpawlh, bâwngpa pakhatah hmun sâwma ṭhena hmun thum, berâmpa pakhatah hmun sâwma ṭhena hmun hnih,

¹⁰berâmno pasarih, berâmno pakhat ṭheuhvah hmun sâwma ṭhena hmun khat;

¹¹sual thawi nân kêlpa pakhat nên; inremna tûra sual thawina te, hâlral thilhlan hlan reng te, chumia chhangphut leh an in tûr thilhlante tiam lovin.

¹²“ ‘Tin, thla sarihna, ni sâwm leh ni nga niah inkhâwmpui thianghlim in nei ang a; eng hna mah in thawk lo vang a, LALPA tân ni sarih in kût tûr a ni.

¹³Tin, LALPA tâna rimtuiah meia thilhlan, hâlral thilhlan in hlân tûr a ni: bâwngpatuai sâwm leh pathum, berâmpa pahnih, berâmno a pa kum khat mi sâwm leh pali; sawisêl bo ṭheuh a ni tûr a ni.

¹⁴An chhangphut thilhlan, chhangphut dip mi hriaka chawhpawlh, bâwngpa sâwm leh pathum, bâwngpa pakhatah hmun sâwma ṭhena hmun thum, berâmpa pahnih, berâmpa pakhatah hmun sâwma ṭhena hmun hnih,

¹⁵berâmno sâwm leh pali, berâmno pakhatah hmun sâwma ṭhena hmun khat;

¹⁶sual thawi nân kêlpa pakhat nên; hâlral thilhlan hlan reng, chumia chhangphut thilhlan te, in tûr thilhlante tiam lovin.

¹⁷“ ‘Tin, a ni hnih niah bâwngpatuai sâwm leh pahnih, berâmpa pahnih, berâmno a pa kum khat mi, sawisêl bo, sâwm leh pali in hlân tûr a ni;

¹⁸an chhangphut thilhlan leh in tûr thilhlan a dân ang takin an tam dân ang zêlin bâwngpa tân te, berâmpa tân te, berâmno tân te,

¹⁹sual thawi nân kêlpa pakhat nên; hâlral thilhlan hlan reng te, chumia chhangphut thilhlan te, in tûr thilhlante tiam lovin.

²⁰“ ‘Tin, a ni thum ni chuan bâwngpa sâwm leh pakhat, berâmpa pahnih, berâmno a pa kum khat mi sawisêl bo sâwm leh pali;

²¹an chhangphut thilhlan leh in tûr thilhlan a dân ang takin an tam dân ang zêlin bâwngpa tân te, berâmpa tân te, berâmno tân te,

²²sual thawi nân kêlpa pakhat nên; hâlral thilhlan hlan reng leh chumia in tûr thilhlan tiam lovin.

²³“ ‘Tin, a ni li ni chuan bâwngpa sâwm, berâmpa pahnih, berâmno a pa kum khat mi sawisêl bo sâwm leh pali;

²⁴an chhangphut thilhlan leh in tûr thilhlan, a dân ang takin an tam dân ang zêlin bâwngpa tân te, berâmpa tân te, berâmno tân te,

²⁵sual thawi nân kêlpa pakhat nên; hâlral thilhlan hlan reng te, chumia chhangphut thilhlan leh in tûr thilhlante tiam lovin.

²⁶“ ‘Tin, a ni nga ni chuan bâwngpa pakua, berâmpa pahnih, berâmno a pa kum khat mi sawisêl bo sâwm leh pali;

²⁷an chhangphut thilhlan leh in tûr thilhlan, a dân ang takin an tam dân ang zêlin bâwngpa tân te, berâmpa tân te, berâmno tân te,

²⁸sual thawi nân kêlpa pakhat nên; hâlral thilhlan hlan reng te, chumia chhangphut thilhlan leh chumia in tûr thilhlante tiam lovin.

²⁹“ ‘Tin, a ni ruk ni chuan bâwngpa pariat, berâmpa pahnih, berâmno a pa kum khat mi sawisêl bo sâwm leh pali;

³⁰an chhangphut thilhlan leh in tûr thilhlan, a dân ang takin an tam dân ang zêlin bâwngpa tân te, berâmpa tân te, berâmno tân te,

³¹sual thawi nân kêlpa pakhat nên; hâlral thilhlan hlan reng te, chumia chhangphut thilhlan leh chumia in tûr thilhlante tiam lovin.

³²“ ‘Tin, a ni sarih ni chuan bâwngpa pasarih, berâmpa pahnih, berâmno a pa kum khat mi sawisêl bo sâwm leh pali;

³³an chhangphut thilhlan leh in tûr thilhlan, a dân ang takin an tam dân ang zêlin bâwngpa tân te, berâmpa tân te, berâmno tân te,

³⁴sual thawi nân kêlpa pakhat nên; hâlral thilhlan hlan reng te, chumia chhangphut thilhlan leh chumia in tûr thilhlante tiam lovin.

³⁵“ ‘Tin, a ni riat ni chuan inkhâwmpui ropui tak in nei ang a, eng hna mah in thawk tûr a ni lo.

³⁶LALPA tâna rimtuiah meia thilhlan hâlral thilhlan erawh chu in hlân tûr a ni: bâwngpa pakhat, berâmpa pakhat, berâmno a pa kum khat mi sawisêl bo pasarih;

³⁷an chhangphut thilhlan leh an in tûr thilhlan, bâwngpa tân te, berâmpa tân te, berâmno tân te, a dân ang takin an tam dân ang zêlin,

³⁸sual thawi nân kêlpa pakhat nên; hâlral thilhlan hlan reng leh chumia chhangphut thilhlan leh chumia in tûr thilhlan tiam lovin.

³⁹“ ‘In thutiam te, in duhthua thilhlan te, in hâlral thilhlan te, in chhangphut thilhlan te, in in tûr thilhlan te, in remna thilhlante tiam lovin hêng hi in hunbi nei kût niin LALPA hnênah in hlân tûr a ni,’ ti rawh,” tiin.

⁴⁰Tin, LALPAN Mosia thu a pêk zawng zawng chu Israela thlahte chu Mosia chuan a hrilh a.