Read Mizo_Old_version Numbers 3 Bible Online

Numbers 3 - Mizo_Old_version bible

Numbers 3

¹Hênghote hi, Sinai tlânga LALPAN Mosia a biak laia Arona leh Mosia chhuana mite an ni.

²Tin, Arona fapate hming chu a upa ber Nadaba te, Abihua te, Eleazara te, Ithamara te an ni.

³Hêng hi puithiam atâna hriak thih, puithiam hna thawk tûra a tihhran Arona fapate hming chu a ni.

⁴Tin, Nadaba leh Abihua chu, Sinai thlalêra mei thiang lo LALPA hmaa an hlan lai khân LALPA hmaah an thi a; fa an nei lo. Eleazara leh Ithamara chuan an pa Arona dam laiin puithiam hna hi an thawk a.

⁵Tin, LALPAN Mosia a bia a,

⁶“Levi chite chu puithiam Arona hnênah hruai la, a rawng an bâwl theih nân a hnênah awmtîr rawh.

⁷Tin, anni chuan biakbûka rawngbâwl hna thawkin, inbiakna puan in bulah amah leh pung khâwm zawng zawng pualah rawng an bâwl ang.

⁸Tin, bungrua zawng zawng an vawng ang a, Israela thlahte puala biakbûk rawngbâwl hna an thawk ang.

⁹Tin, Levi-hote chu Arona leh a fapate hnênah i hlân ang a; Israela thlahte pualah a hnêna hlan an ni.

¹⁰Arona leh a fapate chu i ruat ang a, an puithiam nihna chu an chang reng ang; hnam dang rawn inrawlhte chu tihhlum an ni ang,” tiin.

¹¹Tin, LALPAN Mosia a bia a,

¹²“Ngai teh, Levi-hote hi Israela thlahte zîng ata Israel thlahte fa tîr chhûl keu hmasa ber aiah keimah ngeiin ka lâk an ni a. Levi-ho chu ka ta an ni ang,

¹³fa tîr zawng zawng chu ka ta an ni si a. Aigupta rama fa tîr zawng zawng ka tihhlum ni khân Israel-te zînga fa tîr zawng zawng, a mihring a ranin ka pual atân ka hauh a ni. Ka ta an ni ang: kei hi LALPA chu ka ni,” tiin.

¹⁴Tin, LALPAN Sinai thlalêrah Mosia a bia a,

¹⁵“Levia thlahte chu a chhûngkua kua leh a thlah thlahin chhiar la: mipa tawh phawt chu thla khat achin chung lam chu i chhiar tûr a ni,” tiin.

¹⁶Tichuan, Mosia chuan a tih tûra thupêk angin LALPA thu ang chuan a chhiar hlawm a.

¹⁷Levia fapate hming chu Gersona te, Kohatha te, Meraria te an ni.

¹⁸Tin, an thlahtu Gersona fapate hming chu Libnia leh Simeia an ni.

¹⁹An thlahtu Kohatha fapate chu Amrama te, Izara te, Hebrona te, Uziela te an ni.

²⁰An thlahtu Meraria fapate chu Mahlia leh Musia an ni. Hêng hi an chhûngkua ang zêla Levi-ho thlahte chu an ni.

²¹Gersona chu Libni-ho leh Simei-ho thlahtu a ni; hêng hi Gerson-ho thlahte an ni.

²²Mipa zawng zawng thla khat achin chung lam an chhiarte chu 7,500 zet an tling a.

²³Gerson-ho thlahte chuan an puan in chu biakbûk thlang lampangah an zâr tûr a ni.

²⁴Tin, Gerson-ho chhûngkaw puipa chu Laela fapa Eliasapha a ni ang.

²⁵Gersona faten inbiakna puan ina an enkawl tûr chu biakbûk leh Puan In a ni ang, a chung te, inbiakna puan in kawngkhâr puanzâr te,

²⁶a kawtlai zâr te, biakbûk bula a kawtlai kawngkhâr puanzâr te, maichâm vêla mi te, chuta hman tûr hrui zawng zawngte nên.

²⁷Tin, Kohatha chu Amram-ho te, Izhar-ho te, Hebron-ho te, Uziel-ho te thlahtu a ni; hêngho hi Kohatha thlahte an ni.

²⁸Mipa zawng zawng thla khat achin chung lam an chhiar dân ang chuan 8,300 an ni, hmun thianghlim enkawltu tûr chu.

²⁹Kohatha fapate thlahte chuan biakbûk chhim lampangah an puan in an zâr tûr a ni.

³⁰Kohath-ho thlahte chhûngkaw puipa tûr chu Uziela fapa Elizaphana a ni ang.

³¹An enkawl tûr chu bâwm te, dawhkân te, sathaukhâwnvâr dahna te, maichâm te, hmun thianghlima rawngbâwlna bungbêl zawng zawng te, puanzâr te, chuta rawngbâwlna thil zawng zawngte a ni ang.

³²Tin, puithiam Arona fapa Eleazara chu Levi-ho puipate puipa a ni ang a, hmun thianghlim enkawltute chu a ho vang.

³³Meraria chu Mali-ho leh Musi-ho thlahtu a ni. Hêng hi Meraria thlahte an ni.

³⁴Mipa zawng zawng thla khat achin chung lam an chhiar dân ang chuan 6,200 an ni.

³⁵Meraria thlah chhûngkaw puipa chu Abihaila fapa Zuriela a ni a. Biakbûk hmâr lampangah an puan in an zâr tûr a ni.

³⁶Meraria fapate enkawl tûra ruat chu biakbûk ban rem khâwm te, a bangrel te, a ban te, a nghahchhan ker kuak te, a hmanrua zawng zawng te, rawngbâwlna hmanrua zawng zawngte an ni a;

³⁷a kawt hung vêlna ban te, a nghahchhan ker kuak te, a kilhbehna leh a hruite nên.

³⁸Biakbûk chhak lampang inbiakna puan in bul, ni chhuahna lama puan in zârtu tûr chu Mosia leh Arona leh a fapate an ni ang a, hmun thianghlimah Israela thlahte pualah a ṭûl apiang an thawk ang; hnam dang rawn inrawlh apiang chu tihhlum tûr an ni ang.

³⁹LALPA thupêka Levi-ho a thlah thlaha mipa zawng zawng thla khat achin chung lam Mosia leh Aronan an chhiar zawng zawng chu 22,000 an ni.

⁴⁰Tin, LALPAN Mosia hnênah, “Israela thlahte zînga fa tîr, mipa, thla khat achin chung lam zawng zawng chhiar la, ka ta an ni, a zât hre rawh.

⁴¹Tin, Levi-hote chu (LALPA chu ka ni a) Israela thlahte zînga fa tîr zawng zawng aiah ka hauh a ni; tin, Levi-ho rante chu Israela thlahte ran zawng zawnga piang hmasa ber aiah,” a ti a.

⁴²Tin, Mosia chuan LALPAN thu a pêk angin Israela thlahte zinga fa tîr zawng zawng chu a chhiar a.

⁴³An hming indawt ang zêla thla khat achin chung lam fa tîr mipa zawng zawng an chhiarte chu 22,273 an ni.

⁴⁴Tin, LALPAN Mosia a bia a,

⁴⁵“Israela thlahte zînga fa tîr zawng zawng aiah Levi-ho chu ka ta an ni ang; kei hi LALPA chu ka ni.

⁴⁶Tin, Levi-hote aia an tamna Israela thlahte fa tîr 273 tlanna tûrin,

⁴⁷mi pakhat tân sekel 5 ṭheuh i la tûr a ni; hmun thianghlima sekel hman tûr a ni (sekel chu gera 20 a ni).

⁴⁸A chuangho tlanna sum chu Arona leh a fapate i pe tûr a ni,” tiin.

⁴⁹Tin, Mosia chuan Levi-hovin an tlan bâka an tlanna sum chu a la a;

⁵⁰Israela thlahte fa tîr lak aṭangin sum chu a la a; hmun thianghlim sekel angin 1,365 a la a.

⁵¹LALPAN Mosia thu a pêk, LALPA thu angin Mosia chuan tlanna sum chu Arona leh a fapate a pe a.