Read Mizo_Old_version Numbers 30 Bible Online

Numbers 30 - Mizo_Old_version bible

Numbers 30

¹Tin, Mosian Israela thlahte hnamho puipate chu a bia a, “Hei hi a ni, LALPAN thu a pêk chu:

²miin LALPA hnêna thu a tiam emaw, chhechhama mahni intiamkamna emaw a neih chuan a hlen ngei tûr a ni; a thu ang zawng zawng chu a ti vek tûr a ni.

³Pate ina awm lai nula pawhin LALPA hnêna thu a tiam emaw, chhechhama intiamkamna emaw a neih chuan,

⁴a pain a thutiam emaw, a intiamkamna emaw chu a hriata, a ngawihsan mai chuan a thutiam emaw, a intiamkamna emaw chu a ti ngei tûr a ni.

⁵A pain a hriat nî ngeia a phal loh erawh chuan a thutiam emaw, a intiamkamna emaw ata chu a fihlîm ang a, a pain a phal loh avângin LALPAN ani chu a ngaidam ang.

⁶“Ngaihtuah thui mang lova thutiam emaw, intiamkamna emaw nei laiin pasal a neiha,

⁷a pasalin a hriat nîa a ngawihsan mai chuan a thutiam emaw, a intiamkamna emaw chu a hlen ngei tûr a ni.

⁸Amaherawhchu, a pasalin a hriat nîa a phal loh chuan ngaihtuah thui lova thu a lo intiamkamna emaw ata chu a fihlîm ang; tin, LALPAN a ngaidam ang.

⁹Hmeithaite, mâkchhiat tâwkte erawh chuan an thutiam emaw, an intiamkamna emaw chu an hlen ngei tûr a ni.

¹⁰Pasalte ina awm laia thutiam emaw, intiamkamna emaw chu,

¹¹a pasalin a hriat pawha a ngawihsana, a hnial loh chuan a thu intiamkamna chu a hlen tûr a ni.

¹²Amaherawhchu, a pasalin a hriat nîa a ṭhiat emaw, a tihbosak emaw chuan a thutiam leh a intiamkamna chu sût a ni tawh ang.

¹³Thutiam emaw, intiamkamna emaw rêng rêng a pasalin a remtihpuiin a ṭhiatsak thei bawk a ni.

¹⁴Amaherawhchu, a pasalin a hriata a ngawihsan mai chuan, a thutiam ang leh a intiamkamna ang ngei chuan a ti tûr a ni; a hriat nî aṭanga a ngawihsan avângin a nemnghehpui tihna a ni.

¹⁵A hriat veleh a ṭhiata, a tihbosak erawh chuan a mawh chu aman a phur tûr a ni,” tiin.

¹⁶Hêng hi, mipa leh a nupui kâr leh, pa leh a fanu nulât laia a pa ina la awm reng an kâra dân tûra LALPAN Mosia thu a pêkte chu a ni.