Read Mizo_Old_version Numbers 32 Bible Online

Numbers 32 - Mizo_Old_version bible

Numbers 32

¹Reubena leh Gada thlahte chuan ran an ngah hle mai a; tin, Jazer ram leh Gilead ram an hmuh chuan a hmun chu ran tâna hmun ṭha tak niin an hria a;

²tichuan, Gada thlahte leh Reubena thlahte chuan Mosia leh puithiam Eleazara leh pung khâwmho puipate chu an va bia a,

³“Israel pung khâwmho hmaa LALPAN a tihtlâwm ram Atarot te, Dibon te, Jazer te, Nimra te, Hesbon te, Eleale te, Sebam te, Nebo te, Beon te chu ran tâna ṭha tak ram a ni a; tin, i chhiahhlawhte hian ran kan nei a.

⁵Rem i tih zâwng a nih chuan he ram hi kan luah atân min pe la, Jordan lui min hruai kai lo mai rawh khai,” an ti a.

⁶Tin, Mosia chuan Gada thlahte leh Reubena thlahte hnênah chuan, “In unaute chu indonaah an kal ang a, nangni chu hetah hian in lo awm mai ang maw?

⁷Engati nge LALPAN a pêk rama lût lo tûra Israela thlahte rilru in tihzâm dâwn?

⁸Kadesh-barnea aṭanga ram va thlithlai tûra ka tirh khân hetiang bawk hian in pute chuan an ti a.

⁹Eskol ruam an han thlen chhoh khân ram chu an han hmu a, LALPAN ram a pêkah chuan an luh lohna tûrin Israel thlahte rilru an tihzâmsak a.

¹⁰Tichuan, chumi ni chuan LALPA chu a thinur ta êm êm a,

¹¹‘Aigupta ram ata lo chhuak, kum sawmhnih achin chung lam mi rêng rêng chuan Abrahama te, Isaaka te, Jakoba te hnêna chhechhama ka pêk ram chu tu mân an hmu lo vang, min zui tak tak loh avângin;

¹²Keniz mi Jephunea fapa Kaleba leh Nuna fapa Josua-te chauh lo chuan; anni chuan LALPA chu an zui tak tak avângin,’ tiin chhia a chham a.

¹³Tin, Israel-hote chungah LALPA thin chu a alh a, LALPA mit hmuha thil ṭha lo titu chhuan zawng zawng an boral vek hma loh chuan, thlalêrah kum sawmli a vah a vahtîr a.

¹⁴Tin, ngai teh u, Israel-te chunga LALPA thinurna ṭihbaiawm tak belhchhahin, nangni chhuan sual hian in pute ai in awh ta a.

¹⁵LALPA zui lova in awm miau chuan anniho hi thlalêrah a awmtîr leh mai dâwn a ni a. Hêng mi zawng zawngte hi in tiboral mai ang asin,” a ti a.

¹⁶Tin, an va hnaih a, a hnênah, “Hetah hian kan ran tân berâm huangte leh kan fanaute tân khuate kan siam ang a;

¹⁷keini erawh chu an hmun tûr kan thlen hma loh chuan, Israela thlahte hmaa kal zêl tûrin kan inrâlthuam diam ang e; hemi rama mite avâng hian kan fanaute chu kulh nei khuaahte an awm ang a.

¹⁸Israela thlah mi tinin an hmun luah tûr an luah ṭheuh hma loh chuan kan in lamah kan haw lo vang.

¹⁹Kan luah tûr chu he lam râl Jordan chhak lam a nih avângin Jordan râl lehlam leh a piah lam chu kan luahpui dâwn lo nia,” an ti a.

²⁰Tin, Mosian an hnênah, “Chutianga in tiha, indonaa LALPA hmaa kal tûra in inrâlthuama,

²¹a hma ata a hmêlmate a hnawh chhuaha, LALPA hmaa ram chu hneh a nih hma lohva in zînga inrâlthuam zawng zawngten LALPA hmaah Jordan in kai vek chuan, nakinah in haw ang a, LALPA chungah leh Israel-te chungah in thiam lo lo dâwn nia; tichuan, he ram hi LALPA hmaa in luah tûr a lo ni ang a.

²³Amaherawhchu, chutianga in tih loh chuan, ngai teh u, LALPA chungah in sual a ni ang a, in sual chuan a hmuchhuak ngei ngei ang che u tih hre rawh u.

²⁴In fanaute tân khuate siam ula, in berâmte tân pawh huangte siam ula, in sawi ang chuan ti rawh u,” a ti a.

²⁵Tin, Gada thlahte leh Reubena thlahte chuan Mosia hnênah, “I chhiahhlawhte hian kan pu thupêk ang chuan kan ti ang e.

²⁶Kan nupui fanau te, kan berâm rual te, kan ran rual zawng zawngte chu Gilead ram khuaahte hian an lo awm ang a;

²⁷amaherawhchu, i chhiahhlawh, indo tûra inrâlthuam zawng zawngte chuan kan pu sawi ang chuan LALPA hmaah kan va kai ang e,” tiin an sawi a.

²⁸Chutichuan, Mosia chuan an chungchâng thu-ah chuan puithiam Eleazara te, Nuna fapa Josua te, Israel hnam chhûngkaw puipate chu thu a pe a.

²⁹Tin, Mosia chuan an hnênah, “Gada thlahte, Reubena thlahte, indo tûra inrâlthuam zawng zawngte hian LALPA hmaa Jordan lui an kaipui che ua, ram chu in hmin chuan Gilead ram chu an luah atân in pe tûr a ni.

³⁰Amaherawhchu, inrâlthuama an kaipui loh che u chuan Kanaan ramah in zîngah an tel ve mai ang,” a ti a.

³¹Tin, Gada thlahte leh Reubena thlahte chuan, “I chhiahhlawhte hnêna LALPAN a sawi ang chuan kan ti ang.

³²Inrâlthuamin LALPA hmaah Kanaan ramah kaiin kan lût ang a; tichuan, kan ram luah tûr chu Jordan lui piah lamah a la ni reng ang,” tiin an chhâng a.

³³Tin, Mosia chuan, Gada thlahte leh Reubena thlahte leh Josefa fapa Manasea thlah hnam chanvete chu Amor lal Sihona ram te, Basan lal Oga ram, chûng ramte chu a khaw awm zawng zawng nên, a vêl ram khuate nên lam a pe a.

³⁴Tin, Gada thlahte chuan Dibon te, Atarot te, Aroer te,

³⁵Atrot-sophan te, Jazer te, Jogbeha te,

³⁶Beth-nimra te, Beth-haran te an din a, khawpui kulh nei te, berâm huang te nên.

³⁷Tin, Reubena thlahte chuan Hesbon te, Eleale te, Kiriathaim te,

³⁸Nebo te, Baal-meon te (a hmingte hi tihdanglam tâk a ni), Sibma te an din a; an khaw siamte chu hming dang an vuah a.

³⁹Tin, Manasea fapa Makira thlahte chu Gilead ramah an kal a, an la a, Amor-ho chuta awmte chu an chhuhsak a.

⁴⁰Tin, Mosian Gilead ram chu Manasea fapa Makira chu a pe a, chutah chuan a awm a.

⁴¹Tin, Manasea fapa Jaira chuan chûnga khuate chu a va la a, Havoth-jair a vuah a.

⁴²Tin, Noba chuan Kenath a va la a, a khawperte nên, ama hming chawiin Noba a vuah a.