Read Mizo_Old_version Numbers 33 Bible Online

Numbers 33 - Mizo_Old_version bible

Numbers 33

¹Mosia leh Arona kaihhruaia Aigupta ram ata Israel-te a pâwl pâwla an chhuaha, an kal zêl dân chu hetiang hian a ni.

²LALPA thupêka an kal chhuaha, an kal zêlnate chu Mosian a ziak a; an kal chhuaha an kalnate chu hêngahte hian a ni:

³Israel-te chu kalhlên kût zawh aṭanga thla khatna ni sâwm leh ni nga niah Rameses aṭangin an chhuak a; kalhlên kût tûk chuan Aigupta mite mit hmuhah,

⁴an fa tîr zawng zawng LALPAN a tihhlumsak an phûm laiin, Israela thlahte chu muk takin an chhuak a. LALPAN an pathiante pawh a hrem a.

⁵Tichuan, Israela thlahte chu Rameses aṭangin an chhuak a, Sukkoth-ah awmhmun an khuar a.

⁶Tin, Sukkoth aṭangin an chhuak a, thlalêr tawntirha Etham-ah awmhmun an khuar a.

⁷Tin, Etham aṭang chuan an chhuak a, Baal-zephon bula Pi-hahirot lamah an tawlh kîr leh a, Migdol bulah awmhmun an khuar a.

⁸Tin, Hahirot bul ata chu an chhuak a, tuifinriat an kal tlang a, thlalêrah an lût a; tin, Etham thlalêrah ni thum an kal a, Mara-ah awmhmun an khuar a.

⁹Tin, Mara aṭang chuan an chhuak a, Elim an thleng a; Elim-ah chuan tuihna sâwm leh pahnih leh tûm kûng sawmsarih a awm a; chutah chuan awmhmun an khuar a.

¹⁰Tin, Elim aṭang chuan an chhuak a, Tuifinriat Sen bulah awmhmun an khuar a.

¹¹Tin, Tuifinriat Sen aṭang chuan an chhuak a, Sin thlalêrah awmhmun an khuar a.

¹²Sin thlalêr aṭang chuan an chhuak a, Dopka-ah awmhmun an khuar a.

¹³Tin, Dopka aṭang chuan an chhuak a, Alus-ah awmhmun an khuar a.

¹⁴Alus aṭang chuan an chhuak a, Rephidim-ah awmhmun an khuar a, chutah chuan mipuite tui in tûr a awm lo va.

¹⁵Tin, Rephidim aṭang chuan an chhuak a, Sinai thlalêrah awmhmun an khuar a.

¹⁶Sinai thlalêr aṭang chuan an chhuak a, Kibroth-hat-tava-ah awmhmun an khuar a.

¹⁷Tin, Kibroth-hat-tava aṭang chuan an chhuak a, Hazeroth-ah awmhmun an khuar a.

¹⁸Hazeroth aṭang chuan an chhuak a, Rithma-ah awmhmun an khuar a.

¹⁹Tin, Rithma aṭang chuan an chhuak a, Rimon-perez-ah awmhmun an khuar a.

²⁰Rimon-perez aṭang chuan an chhuak a, Libna-ah awmhmun an khuar a,

²¹Libna aṭang chuan an chhuak a, Risa-ah awmhmun an khuar a.

²²Tin, Risa aṭang chuan an chhuak a, Kehelatha-ah awmhmun an khuar a.

²³Tin, Kehelatha aṭang chuan an chhuak a, Sepher tlângah awmhmun an khuar a.

²⁴Tin, Sepher tlâng aṭang chuan an chhuak a, Harada-ah awmhmun an khuar a.

²⁵Tin, Harada aṭang chuan an chhuak a, Makheloth-ah awmhmun an khuar a.

²⁶Tin, Makheloth aṭang chuan an chhuak a, Tahath-ah awmhmun an khuar a.

²⁷Tin, Tahath aṭang chuan an chhuak a, Tera-ah awmhmun an khuar a.

²⁸Tin, Tera aṭang chuan an chhuak a, Mithka-ah awmhmun an khuar a.

²⁹Tin, Mitka aṭang chuan an chhuak a, Hasmona-ah awmhmun an khuar a.

³⁰Hasmona aṭang chuan an chhuak a, Moseroth-ah awmhmun an khuar a.

³¹Tin, Moseroth aṭang chuan an chhuak a, Bene-jaakan-ah awmhmun an khuar a.

³²Tin, Bene-jaakan aṭang chuan an chhuak a, Hor-hagidgad-ah awmhmun an khuar a.

³³Tin, Hor-hagidgad aṭang chuan an chhuak a, Jotbatha-ah awmhmun an khuar a.

³⁴Tin, Jotbatha aṭang chuan an chhuak a, Abrona-ah awmhmun an khuar a.

³⁵Tin, Abrona aṭang chuan an chhuak a, Ezion-geber-ah awmhmun an khuar a.

³⁶Tin, Ezion-geber aṭang chuan an chhuak a, Zin thlalêrah awmhmun an khuar a (chu chu Kadesh an ti bawk).

³⁷Tin, Kadesh aṭang chuan an chhuak a, Edom ram dep Hor tlângah awmhmun an khuar a.

³⁸Tin, puithiam Arona chu LALPA thupêkin Hor tlângah chuan a han chho va, Israela thlahte Aigupta ram ata an lo chhuah kum sawmli kum, thla ngana, ni khat niin chutah chuan a thi a.

³⁹Tichuan, Arona chu Hor tlânga a thih chuan kum za leh sawmhnih leh pathum a ni.

⁴⁰Tin, Kanaan mi, Kanaan rama Chhima awm Arad lal chuan Israela thlahte lo kal chu a lo hria a.

⁴¹Tin, Hor tlâng aṭang chuan an chhuak a, Zalmon-ah awmhmun an khuar a.

⁴²Tin, Zalmon aṭang chuan an chhuak a, Punon-ah awmhmun an khuar a.

⁴³Tin, Punon aṭang chuan an chhuak a, Oboth-ah awmhmun an khuar a.

⁴⁴Oboth aṭang chuan an chhuak a, Moab ram dep Iye-abarim-ah awmhmun an khuar a.

⁴⁵Tin, Iyim aṭang chuan an chhuak a, Dibon-gad-ah awmhmun an khuar a.

⁴⁶Tin, Dibon-gad aṭang chuan an chhuak a, Almon-diblathaim-ah awmhmun an khuar a.

⁴⁷Tin, Almon-diblathaim aṭang chuan an chhuak a, Nebo bula Abarim tlângahte chuan awmhmun an khuar a.

⁴⁸Tin, Abarim tlâng aṭangte chuan an chhuak a, Jeriko zâwn, Jordan kam Moab phaiah awmhmun an khuar a.

⁴⁹Jordan kam Beth-jesimoth aṭanga Abel-sitim thlengin Moab phaiah awmhmun an khuar a.

⁵⁰Tin, Jeriko zâwn, Jordan kam Moab phaiah chuan LALPAN Mosia a bia a,

⁵¹“Israela thlahte chu bia la, an hnênah, ‘Jordan lui in kâna, Kanaan ram in luh hun chuan,

⁵²chumi rama awm zawng zawngte chu in hnawt chhuak vek ang a, an lung milem zawng zawngte chu in tichhe vek ang a, an milem chhûnte in tichhe vek ang a, an hmun sângte pawh in ṭhiat vek tûr a ni;

⁵³tin, ram chu in luah ang a, chutah chuan in awm ang; in luah atân ram chu ka pe tawh che u a ni.

⁵⁴Tin, a chi zir ang zêlin ṭhumvâwrin ram chu in luah ang a; a rual deuhte chu ram zau deuh in pe ang a, a rual lo deuhte chu ram zîm deuh in pe ang; ṭhumvâwra a tlûkna apiang chu an pual a ni ang a. In pi leh pute chi kal dân ang zêlin in luah tûr a ni.

⁵⁵Amaherawhchu, chumi rama awmte chu in hnawh chhuah loh chuan, in awmtîrte chu in mit tân chhuntu leh in pang tânte hlîng ang an ni ang a, in awmna ramah chuan an timangang ang che u.

⁵⁶Tin, heti hi a ni ang a, an chunga tih ka rilrûk ang chu in chungah ka ti ang,’ ti rawh,” tiin.