Read Mizo_Old_version Numbers 34 Bible Online

Numbers 34 - Mizo_Old_version bible

Numbers 34

¹Tin, LALPAN Mosia a bia a,

²“Israela thlahte chu thu pe la, an hnênah, ‘Kanaan ram in thlen hun chuan (Kanaan ram, a ramri zir ang zêla in luah tûr ram chu)

³chhim lama in luah tûr chin chu Zin thlalêr aṭanga Edom ram hrûl zêl a ni ang a, chhim lam ramri chu Tuifinriat Al tâwp aṭanga chhak lampang a ni ang;

⁴tin, in ramri chu Akrabim chhohna chhim lampangah a kawi ang a, Zin-ah a kal tlang ang a; tin, a lo chhuahna chu Kadesh-barnea chhim lamah a ni ang; tin, Hazar-adar-ah a kal ang a, Azmon-ah a kal zêl ang;

⁵tin, ramri chu Azmon aṭangin Aigupta lui thlengin a kawi ang a, a chhuahna chu tuifinriatah a ni ang.

⁶Tin, thlang lampangah chuan tuifinriat zau chu a ramri atân i chang ang a; hei hi thlang lama in ramri a ni ang.

⁷Tin, hei hi hmâr lama in ramri a ni ang: tuifinriat zau aṭangin Hor tlâng huamin i siam ang a;

⁸Hor tlâng aṭanga Hamath luhna thlengin i siam ang a, ramri chhuahna chu Zedad-ah a ni ang a;

⁹tin, ramri chu Ziphron-ah a kal zêl ang a; tin, a chhuahna chu Hazar-enan-ah a ni ang; hei hi hmâr lama in ramri a ni ang.

¹⁰Tin, chhak lama in ramri chu Hazar-enan aṭangin Sepham thlengin i siam ang a;

¹¹tin, ramri chu Sepham aṭangin Ribla thlengin Ain chhak lampangah a chhuk ang a; tichuan, ramri chu a chhuk zêl ang a, Kinereth tuifinriat chhak lampang a chhun ang a;

¹²tin, ramri chu Jordan-ah a chhuk ang a; tin, a chhuahna chu Tuifinriat Al-ah a ni ang. Hei hi a chhehvêla ramri kal dân ang hian in ram a ni ang,’ ti rawh,” tiin.

¹³Tichuan, Mosia chuan Israela thlahte chu thu a pe a, “Hei hi LALPAN hnam kua leh a chanvete pêk tûra thu a pêk, ṭhumvâwra in luah tûr ram chu a ni.

¹⁴Reubena thlahte hnamin an chhûngkaw zir zêl leh, Gada thlahte hnamin an chhûngkaw zir zêl leh, Manase hnam zâtve pawhin an ram luah tûr chu an chang ta si a.

¹⁵Hnam hnih leh hnam zâtvete chuan an ram luah tûr chu, ni chhuahna lam Jeriko zâwn Jordan râl chhak lamah an chang tawh a,” tiin.

¹⁶Tin, LALPAN Mosia a bia a,

¹⁷“Luah tûra ram ṭhensawmpuitute hming chu hêngte hi a ni: puithiam Eleazara leh Nuna fapa Josua-te hi.

¹⁸“Tin, ram luah tûr ṭhentu atân hnam tin zînga puipa pakhat ṭheuh in thlang tûr a ni,” tiin.

¹⁹Chûng mite hming chu hêng hi a ni: Juda hnama mi Jephunea fapa Kaleba;

²⁰Simeona thlahte hnama mi Amihuda fapa Semuela;

²¹Benjamin hnam mi Kislona fapa Elidada;

²²Dana thlahte hnam zînga puipa Joglia fapa Bukia;

²³Josefa thlahte zînga mi, Manasea thlahte puipa Ephoda fapa Haniela;

²⁴Ephraima thlahte hnam zînga puipa Siptana fapa Kemuela;

²⁵Zebuluna thlahte hnam zînga puipa Parnaka fapa Elizaphana;

²⁶Isakara thlahte hnam zînga puipa Azana fapa Paltiela,

²⁷Asera thlahte hnam zînga puipa Selomia fapa Ahihuda;

²⁸Naphtalia thlahte zînga puipa Amihuda fapa Pedahela.

²⁹Hêngho hi Kanaan rama Israela thlah ram luah tûr sem tûra LALPAN thu a pêkate chu an ni.