Read Mizo_Old_version Numbers 35 Bible Online

Numbers 35 - Mizo_Old_version bible

Numbers 35

¹Tin, Jeriko zâwn Jordan kam, Moab phaiah chuan LALPAN Mosia a bia a,

²“Israela thlahte chu thu pe la, an ramahte chuan Levi-ho awmna tûr khuate siamsak rawh se; tin, ran tlatna tûrin khaw dai kiang vêlte Levi-ho in pe tûr a ni.

³Khuate chu an awmna tûr a ni ang a, a vêlte chu an bâwng leh an ran, an vulh zawng zawng tân a ni ang.

⁴Tin, dai kiang Levi-ho in pêk tûr chu khaw kulh aṭanga tawng sângkhata thui a ni tûr a ni.

⁵Tin, kulh pawn lam aṭangin in teh ang a, chhak lampangah tawng sânghnih, chhim lampangah tawng sânghnih, thlang lampangah tawng sânghnih, hmâr lampangah tawng sânghnih, khua a lai taka awmin. Hei hi an dai kiang pual a ni ang.

⁶Tin, Levi-ho in pêk tûr khuate chu tualthatte tlân nân tualtlânna khaw paruk a ni ang a; chûng lo chu khaw sawmli leh khaw hnih in pe bawk tûr a ni.

⁷Levi-ho in pêk tûr khua zawng zawng chu khaw sawmli leh khaw riat a ni ang; dai kiang nên in pe tûr a ni.

⁸Israela thlahte luah khua in pêk dân tûr chu: a tam deuh aṭangin in pe tam ang a, a tlêm deuh aṭangin in pe tlêm ang a, mi tinin an luah ram tam dân azirin an khua chu Levi-ho an pe tûr a ni,” tiin.

⁹Tin, LALPAN Mosia a bia a,

¹⁰“Israela thlahte bia la, an hnênah, ‘Jordan lui in kaia Kanaan ram in luh hun chuan,

¹¹tualtlânna tûr khua in ruat tûr a ni, tualthat palhtu tlân nân.

¹²Chûng khuate chu phuba latu laka in tualtlânna a ni ang; pung khâwm hmaa rorêlsak tûra a din hmaa tualthattu chu a thih loh nân.

¹³Tichuan, in tân tualtlânna tûr in ruatte chu khaw paruk a ni ang.

¹⁴Jordan râlah khaw thum in ruat ang a, Kanaan ramah khaw thum in ruat ang a, tualtlânna khuate a ni ang.

¹⁵Israela thlahte leh hnam dang leh an hnêna chêngte tân he khaw paruk hi tualtlânna a ni ang; chutah chuan tu pawh mi that palh apiang an tlân dâwn nia.

¹⁶Amaherawhchu, thîr hmanga mi a beiha, a thih chuan tualthat a ni a; tualthat chu tihhlum ngei tûr a ni.

¹⁷Tin, thi khawpa lunga mi a chhuta, a thih chuan tualthat a ni a; tualthat chu tihhlum ngei tûr a ni.

¹⁸Tin, thi khawpa mi thinga a vuaka, a thih chuan tualthat a ni a; tualthat chu tihhlum ngei tûr a ni.

¹⁹Thisen phuba latu chuan tualthattu chu a that nghâl mai ang; a hmuh hun hunah a tihlum tûr a ni.

²⁰Tin, mi a huat vânga a nam vak emaw, lo châng rua a vawm emawa a thihin emaw,

²¹intaina avânga a chum hlum emaw chuan, a tihlumtu chu tihhlum ngei tûr a ni. Tualthat a ni. Thisen phuba latu chuan a hmuh hun hunah a tihlum tûr a ni.

²²“ ‘Amaherawhchu, intai vâng ni lêm lova nam thut emaw, châng ni kher lova mi an awm tih pawh hre lova, a hmêlma pawh ni lova, a pawi khawih pawh tum ni chuang lova lung emawa a dena, mi lo thi ta a nih chuan,

²⁴pung khâwmhovin hêng rorêlna dân ang hian a tihlumtu leh thisen phuba latu ro chu an rêlsak tûr a ni.

²⁵Tin, pung khâwmho chuan tualthattu chu thisen phuba latu lak ata chu an hum ang a, pung khâwmho chuan a tlânna, a tualtlânna khuaah chuan an awmtîr leh ang a, hriak thianghlima thih puithiam lal ṭang lai thih hma chu chutah chuan a awm tûr a ni.

²⁶Amaherawhchu, eng lai pawhin tualthattu chu a tlânna, a tualtlânna khaw ramri pawn lama a kala,

²⁷thisen phuba latuin a tualtlânna khaw pâwna a hmuha, thisen phuba latuin a thah chuan, thisenah chuan thiam loh a chang lo vang,

²⁸puithiam lal a thih hma loh chu a tualtlânna khuaa awm reng tûr a nih avângin. Puithiam a thih hnu erawh chuan tualthattu chu a awmna ramah chuan a haw leh tûr a ni.

²⁹Hêng thil hi in thlahte thlenga in awmna apianga in rorêl dân tûr a ni ang.

³⁰“ ‘Tu pawhin mi a thah chuan tualthattu chu hretute kâ aṭanga thuchhuakin tihhlum tûr a ni; amaherawhchu, hretu pakhat chu mi tihhlumna tûr chuan a tâwk lo.

³¹Tin, tualthattu chu in tlan tûr a ni lo; thihna khawpa thiam loh chang a ni a, tihhlum ngei tûr a ni zâwk.

³²Tin, tualtlânna khuaa tlân chu, chutih laia puithiam lal thih hma chuan a awmna khaw hluia kîr leh tûra tlan phal a ni lo vang.

³³Chutichuan, in awmna ram chu in tibawlhhlawh lo vang a; thisen chuan ram chu a tibawlhhlawh a, thisen chhuahna ram tihbawlhhlawh sil nân a chhuahtu thisen ngawt lo chu hman theih a ni si lo.

³⁴In awmna ram, ka awmna hi in tibawlhhlawh tûr a ni lo, kei LALPA hi, Israela thlahte zîngah ka awm si a,’ ti rawh,” tiin.