Read Mizo_Old_version Numbers 36 Bible Online

Numbers 36 - Mizo_Old_version bible

Numbers 36

¹Tin, Josefa chhûngte zînga mi, Manasea fa Makira fapa Gileada thlahte chhûngkaw puipate zînga mite chuan an rawn hnaih a, Mosia leh hotu, Israela thlah puipate hmaah chuan thu an sawi a,

²“LALPA chuan kan pu hi Israela thlahte chu, ṭhumvâwra an luah tûr ram pe tûrin thu a pe a; tin, LALPAN kan pu chu kan unaupa Zelophehada luah tûr chu a fanute pe tûrin thu a pe a.

³Tin, anni chuan Israela thlahte zînga mi, hnam dang tu fate pawh nei sela, kan pi leh pute ram an luah chu lâksaka, an va telnate hnam ramah belh tûr a ni ang a; chutiang chuan kan ram chanpual ata chu theh chhuah a lo ni ang a.

⁴Tin, Israela thlahte Jubili a lo thlen hun chuan, an ram chu an va telna tûrte apiang hnam ramah belh a ni ang a; chutichuan, kan pi leh pute hnam ram ata chu an ram lâk hêk a lo ni dâwn a,” an ti a.

⁵Tin, Mosia chuan LALPA thu angin Israela thlahte chu thu a pe a, “Josefa fapate hnam hian an sawi dik a ni.

⁶Zelophehada fanute chungchâng thua LALPAN thu a pêk chu heti hian a ni, ‘ṭha an tih apiang nei sela; amaherawhchu, an pate hnampui zînga mi ngei an nei tûr a ni,’ tiin.

⁷Chutichuan, Israela thlahte ram chu hnam dang dang hnênah sawn sawn a ni lo vang. Israela thlahte chuan an pi leh pute hnam ram chu an chang reng tûr a ni.

⁸Tin, Israela thlahte zînga ro luahtu tûr fanu apiang chu, Israela thlahten an pi leh pute ram an luah ṭheuh zêl theih nân, a pa hnampui zînga mi ngei nupui a ni tûr a ni.

⁹Chutichuan, ram chu hnam dang dang hnênah sawn sawn a ni dâwn lo nia. Israela thlahte chuan anmahni ram ṭheuh chu an chang reng tûr a ni si a,” tiin.

¹⁰Tin, LALPAN Mosia thu a pêk ang chiahin Zelophehada fanute chuan an ti a.

¹¹Zelophehada fanu Malai te, Tirzai te, Hoglai te, Milkai te, Novai te chuan an pa unauva fapate an nei a ni.

¹²Josefa fa Manasea fapate an nei a, an ram chu an pa hnamah chuan a awm reng a ni.

¹³Hêng hi LALPAN Mosia hmanga Jeriko zâwn Jordan râla Moab phaia Israela thlahte a pêk, thupêkte leh rorêl dânte chu a ni.