Read Mizo_Old_version Numbers 4 Bible Online

Numbers 4 - Mizo_Old_version bible

Numbers 4

²“Levia fate zînga Kohatha thlahte, a thlah thlahin, a chhûngkua kuain,

³kum sawmthum achin chung lam, kum sawmnga thlengin rawngbâwlna hna, inbiakna puan ina thawk tûr zawng zawng zât chu chhiar vek rawh u.

⁴Inbiakna puan in hmun thianghlim bera Kohatha fapate hnathawh tûr chu hei hi a ni:

⁵awmhmun an sawn dâwn apiangin Arona chu a fapate nên an lût ang a, hmun thianghlim puanzâr an hlîp thla ang a, chu chuan thuthlung bâwm an khuh ang a;

⁶chu chu savun ṭha miin an khuh ang a, chu chu puan dumpâwlin an khuh ang a, a zâwnfung an vuah tûr a ni.

⁷Tin, entîrna chhang dawhkân chungah puan dumpâwl an phah ang a, chutah chuan thlêng te, fian te, berhbu te leh note a bun chhuahna tûr an dah tûr a ni; tin, chatlak lova chhang dah chu chutah chuan a awm tûr a ni.

⁸Chu chu puan senin an khuh ang a; a khuhna savun ṭha miin an khuh ang a, a zâwnfung an vuah tûr a ni.

⁹Tin, a êntu khâwnvâr dahna leh chumi atâna an hman tûr a khâwnvâr te, a chaicheh te, a vâp dahna te, hriak bûr zawng zawngte puan dumpâwlin an khuh tûr a ni.

¹⁰Chumi leh a hmanrua zawng zawng chu a khuhna savun ṭha mia khuhin a zâwnnaah an dah tûr a ni.

¹¹“Tin, rangkachak maichâm chu puan dumpâwlin an khuh ang a, a khuhna savun ṭha miin an khuh leh ang a, a zâwnfung an vuah tûr a ni;

¹²hmun thianghlima an hmanrua, rawngbâwlna bungbêl zawng zawng chu an la vek ang a, puan dumpâwlin an fûn ang a, a khuhna savun ṭha miin an khuh ang a, a zâwnnaah an dah tûr a ni.

¹³Tin, maichâma meivâp chu an lâwk fai ang a, a chungah puan dumpâwl an phah ang a,

¹⁴tin, a chungah chuan an rawngbâwl vêlna bungbêl zawng zawng mei lâkna te, sa thurna thîr kawm te, vut lawhna te, maihûn te, maichâm bungbêl zawng zawngte an dah ang a; tin, a khuhna savun ṭha miin an khuh ang a, a zâwnfung an vuah tûr a ni.

¹⁵“Tin, Arona leh a fapaten hmun thianghlim leh hmun thianghlim bungrua zawng zawng an khuh zawha, awmhmun sawn dâwn apiangin, Kohatha fapate chu a zâwn tûrin an lo thawk ṭhîn ang a; nimahsela, thil thianghlimte chu an khawih tûr a ni lo, an khawih zawngin an thi ang. Chûng chu inbiakna puan ina Kohatha fapate chanpual tûr a ni.

¹⁶Tin, puithiam Arona fapa Eleazara thawh tûr chu, chhit tûr hriak te, rimtui te, chatlak lova chhangphut thilhlan te, hriak thih mi te, biakbûk, chuta thil awm zawng zawng te, hmun thianghlim leh a bungruate ngaihtuah vêl a ni,” tiin.

¹⁷Tin, LALPAN Mosia leh Arona a bia a,

¹⁸“Kohatha thlah chhûngkua chu Levi-ho zîng ata bo mai lova, thil thianghlimte khawih lova thi lova an awm theih nân hetiang hian ti rawh u:

¹⁹Arona leh a fapate chu lût sela, an thawh tûr leh an chanpual tûr ṭheuh ruatsak rawh se;

²⁰amaherawhchu, thil thianghlim en tûrin rei lo tê pawh lût suh se, an luh chuan an thi ang,” tiin.

²¹Tin, LALPAN Mosia a bia a,

²²“Gersona fapate pawh an chhûngkua kuain, a thlah thlahin chhiar vek rawh;

²³kum sawmthum achin chung lam kum sawmnga mi thlengin, rawngbâwlna hna inbiakna puan ina thawk tûr zawng zawng zât chu chhiar vek rawh.

²⁴Gersona thlahho chanpual chu rawngbâwl lam leh phurh lam a ni:

²⁵biakbûk puanzâr te, inbiakna puan in te, a khuhna te, a chung khuhna savun ṭha mi te, inbiakna puan in kawngkhâr puanzâr te,

²⁶kawt hung puanzâr te, kawt hung kawngkhâr puanzâr te, biakbûk leh maichâm bula mi, a hrui te, an hmanrua zawng zawngte an phur ang a, tih ṭûl apiang an ti tûr a ni.

²⁷Gersona thlahte chuan Arona leh a fate kawhhmuh ang zêlin hna an thawk ang a, an tih tûr tê tê chena ruatsak tûrin thu i neihtîr ang.

²⁸Chûng chu inbiakna puan ina Gersona thlahte thawh chu a ni. An tih tûr chu puithiam Arona fapa Ithamara ruat tûr a ni.

²⁹“Meraria fapate chu a thlah thlahin, a chhûngkua kuain i chhiar tûr a ni;

³⁰kum sawmthum achin chung lam kum sawmnga mi thlengin inbiakna puan ina thawk tûr zât i chhiar vek tûr a ni.

³¹Inbiakna puan ina an hnathawh, an chanpual tûr chu hei hi a ni - biakbûk ban rem khâwm te, a bangrel te, a ban te, a nghahchhan ker kuak te,

³²a kawt hung vêlna ban te, a nghahchhan ker kuak te, a kilhbehna te, a hrui te, a hmanrua zawng zawng leh a hmanraw dang zawng zawng phurh te; a hming lam zêl ṭheuhvin an chanpual tûr i ruatsak tûr a ni.

³³Chûng chu an ni, puithiam Arona fapa Ithamara hova inbiakna puan ina Meraria fapate thlahtehovin, an tih tûr tê tê chena an rawngbâwl dân tûr chu,” tiin.

³⁴Tichuan, Mosia leh Arona leh pung khâwmho zînga puipate chuan Kohath-ho fapate chu a thlah thlahin, a chhûngkua kuain,

³⁵inbiakna puan ina thawk tûr zât chu kum sawmthum achin chung lam kum sawmnga mi thlengin an chhiar a.

³⁶Chûngho a thlah thlaha an chhiar chu 2,750 an ni.

³⁷Chûng chu an ni, inbiakna puan ina rawngbâwl ṭhîn Kohath-ho thlah an chhiar, Mosia hmanga LALPA thupêk anga Mosia leh Aronan an chhiarte chu.

³⁸Tin, Gersona fapate, inbiakna puan ina thawk tûra rawngbâwl zât tûr chu a thlah thlahin, a chhûngkua kuain kum sawmthum achin chung lam kum sawmnga mi thlenga chhiar an ni a;

³⁹

⁴⁰chûng a thlah thlaha, a chhûngkua kuaa an chhiarte chu 2,630 an ni.

⁴¹Chûng chu an ni, Gersona fapate thlahho inbiakna puan ina rawngbâwlho zawng zawng, LALPA thupêk anga Mosia leh Aronan an chhiarte chu.

⁴²Tin, Meraria fapate, inbiakna puan ina thawk tûra rawngbâwl zât tûr chu, a thlah thlahin, a chhûngkua kuain, kum sawmthum achin chung lam kum sawmnga mi thlenga chhiar an ni a;

⁴³

⁴⁴chûng a thlah thlaha, a chhûngkua kuaa an chhiarte chu 3,200 an ni.

⁴⁵Chûng chu an ni, Meraria fapate thlahho an chhiar, Mosia hmanga LALPA thupêk anga Mosia leh Aronan an chhiarte chu.

⁴⁶Levi-ho, rawngbâwl tûr leh inbiakna puan ina phurh mi phurtu tûr zât a thlah thlahin, a chhûngkua kuain, kum sawmthum achin chung lam kum sawmnga mi thlengin, Mosia leh Arona leh Israel-ho puipate chuan an chhiar a;

⁴⁷

⁴⁸chûng an chhiarte chu 8,580 an ni.

⁴⁹Mosia hmanga LALPA thupêk angin mi tin an thawh tûr leh an chanpual tûr zir zêlin chhiar an ni a; chutiang tak chuan LALPAN Mosia thu a pêk anga chhiar an ni.