Read Mizo_Old_version Numbers 5 Bible Online

Numbers 5 - Mizo_Old_version bible

Numbers 5

¹Tin, LALPAN Mosia a bia a,

²“Israela thlahte chu an riahhmun ata phâr zawng zawng leh, thi pût zawng zawng leh, mitthi avânga bawlhhlawh apiangte chu tichhuak vek tûrin thu pe rawh.

³A hmei a pain i tichhuakin daipâwnah i dah tûr a ni; a lai taka ka awmna ṭhin an riahhmun chu an tibawlhhlawh dah ang e,” tiin.

⁴Tichuan, Israela thlahte chuan chutiang chuan an ti a, daipâwnah an dah chhuak a; LALPAN Mosia hnêna a sawi angin Israela thlahte chuan an ti a.

⁵Tin, LALPAN Mosia a bia a.

⁶“Israela thlahte hnênah sawi la, ‘Mipa emaw, hmeichhia emawin LALPA chungah thil eng pawh lo tisualin thiam loh chang sela,

⁷an tihsualnaah chuan thupha an chawi tûr a ni. A tihsual man chu kim takin rulh tûr a ni a; tin, a hmun ngaa ṭhena hmun khat a tihsualna pa chu a pek belh tûr a ni.

⁸Amaherawhchu, sual man têltuin laichîn a neih loh chuan, sual man LALPA hnêna hlana chu puithiam pual tûr a ni ang a; inremna berâmpa tiam lovin inremna a siam tûr a ni ang.

⁹Tin, Israela thlahte thil thianghlim thên thilhlan zawng zawng, hlansak tûra an pêk puithiam hnêna an hlan apiang a hlântu puithiamin a nei ang.

¹⁰An thil serh chu anmahnin an nei ang, puithiam hnêna an pêk chu puithiamin a nei tûr a ni,’ tiin,” a ti a.

¹¹Tin, LALPAN Mosia a bia a,

¹²“Israela thlahte hnênah sawi la, an hnênah, ‘Tu nupui pawh uirêin,

¹³miin mutpui sela, a pasal chuan hre lovin, chesual ngei si inpuang bawk si lo, kut man ni bawk si lo sela,

¹⁴a pasal chuan thîkthu avângin ringhlel tlat ta sela emaw, nupui chesual lo pawh a rinhlelh tlat si chuan,

¹⁵chutiang thu-ah chuan, chu mi chuan a tâna thilhlan barli chhangphut epha hmun sâwma ṭhena hmun khat kengin, a nupui chu puithiam hnênah a hruai tûr a ni; hriak a leih tûr a ni lo va, thil rimtui a telh tûr a ni hek lo; thîk thawina chhangphut thilhlan, hriat rengna thilhlan khawlohna hriat chhuahna a ni si a.

¹⁶“ ‘Tin, puithiam chuan a rawn hruai ang a, LALPA hmaah a dintîr ang a;

¹⁷tin, puithiam chuan hlumbêlin tui thianghlim a la ang a, biakbûk chhuata vaivut a la ang a, tuiah chuan a phul ang a.

¹⁸Tin, puithiam chuan hmeichhia chu LALPA hmaah a dintîr ang a, a sam a thlahtîr ang a, hriat rengna chhangphut thilhlan, thîk thawina thilhlan chu a kentîr ang a; puithiam chuan ânchhe thlentîrtu tui khâ chu a keng ang.

¹⁹Tin, puithiam chuan hmeichhia chu chhia a chhamtîr ang a, hmeichhe hnênah chuan, “I pasal ni lo mi dang tu mahin an mutpui loh chia, bawlhhlawhna lama i kal pên loh chuan ânchhe thlentîrtu he tui khâ ata hi i lo fihlîm ang a;

²⁰amaherawhchu, khaw dang hawia i bawlhhlawha, i pasal ni lo mi tuin emaw a mutpui che chuan i fihlîm lo vang,” a ti tûr a ni.

²¹Tin, puithiam chuan hmeichhia chu a vau vang a, chhia a chhamtîr ang a, hmeichhe hnênah puithiam chuan, “LALPAN i malpui a tihbala, i pum a tihvûn chuan, LALPAN i chipuite ânchhe dawntîrtuah siam che rawh se;

²²tin, ânchhe thlentîrtu he tui hi i rîlah a lût ang a, i pum a tivûng ang a, i malpui a tirâwp ang,” a ti ang a; tin, hmeichhia chuan, “Amen, Amen,” a ti ang a.

²³“ ‘Tin, puithiam chuan chûng ânchhe thute chu lehkhabuah a ziak ang a, tui khâah chuan a chiah tûr a ni.

²⁴Tin, hmeichhia chu ânchhe thlentîrtu tui khâ chu a intîr tûr a ni a; tichuan, ânchhe thlentîrtu tui chu a kawchhûngah a lût ang a, a lo khâ ang.

²⁵Tin, puithiam chuan thîk thilhlan chhangphut, hmeichhe kut ata chu a la ang a, LALPA hmaah chhangphut thilhlan chu a thên ang a, maichâmah a kalpui ang a;

²⁶puithiam chuan chhangphut thilhlan hriat chhuahtîrtu chu vei khatin a la ang a, maichâmah chuan a hâl ang a, chumi zawhah chuan tui chu hmeichhia a intîr tûr a ni.

²⁷Tin, tui a han intîr chuan heti hi a ni ang a; a lo bawlhhlawha, a pasal chunga thil a tisual a lo nih chuan ânchhe thlentîrtu tui chu a kawchhûngah a lût ang a, a lo khâ ang a, a pum a lo vûng ang a, a malpui a lo râwp ang a; tichuan, hmeichhia chu a chipuite ânchhe dawntîrtu a lo ni ang.

²⁸Amaherawhchu, hmeichhia chu a bawlhhlawh lohva, a thianghlim chuan a fihlîm ang a, nau pai thei zêl a ni ang.

²⁹Hei hi, nupui, khaw dang hawia a pasal ni lo mi dang nêna intibawlhhlawh emaw,

³⁰mipain thîkna rilru a lo puta, a nupui a thîk emawa rêl dân chu a ni a; tichuan, LALPA hmaah a hruai ang a, puithiam chuan hêng dân zawng zawng ang hian a chungah a ti tûr a ni.

³¹Chutichuan, mipa chu khawlohnaah chuan a fihlîm ang a, hmeichhia chuan a sualna mawh a phur ang,’ ti rawh,” tiin.