Read Mizo_Old_version Numbers 8 Bible Online

Numbers 8 - Mizo_Old_version bible

Numbers 8

¹Tin, LALPAN Mosia a bia a,

²“Arona bia la, a hnênah, ‘Khâwnvârte i hâlin khâwnvâr pasarih chuan sathaukhâwnvâr dahna hma lam a ên tûr a ni,’ ti rawh,” tiin.

³Tin, Arona chuan chutiang chuan a ti a; LALPAN Mosia thu a pêk ang chuan khâwnvâr dahna hma lamah chuan khâwnvâr chu a chhi a.

⁴Hemi khâwnvâr dahna siam dân hmang chu rangkachak a chhera chher a ni; a bul ngul leh a pâr chenin chher a ni: LALPAN a lem Mosia a entîr ang chiahin khâwnvâr dahna chu a siam a.

⁵Tin, LALPAN Mosia a bia a,

⁶“Levi-hote chu Israela thlahte zîng ata tihrang la, tithianghlim rawh.

⁷Anmahni tithianghlim tûrin hetiang hian i ti tûr a ni: an chungah tlen faina tui thlawr la, an taksa zawng zawng mehtîr la, an puante sûktîr la, intihthianghlimtîr rawh.

⁸Tin, bâwngpatuai pakhat leh chhangphut thilhlan, hriaka pawlh chhangphut dip tak nên lâktîr la; tin, sual thawi nân bâwngpatuai pakhat dang i kai bawk tûr a ni.

⁹Tin, Levi-hote chu inbiakna puan in bulah chuan hruai la, Israela thlahte mipui zawng zawng chu pun khâwmtîr vek rawh;

¹⁰tin, Levi-hote chu LALPA hnênah i hlân ang a; Israela thlahte chuan Levi-hote chungah an kut an nghat ang a;

¹¹tichuan, Arona chuan Levi-hote chu, LALPA rawng an bâwl theih nân Israela thlahte hmingin thên thilhlanah LALPA hnênah a hlân ang a.

¹²Tin, Levi-hote chuan bâwngpa lû-ahte chuan an kut an nghat ang a; tin, Levi-hote tâna inremna siam nân, pakhat chu sual thawi nân, pakhat chu hâlral thilhlanah LALPA hnênah i hlân tûr a ni.

¹³“Tin, Levi-hote chu Arona leh a fapate hmaah chuan i awmtîr ang a, LALPA tâna thên thilhlanah i hlân tûr a ni.

¹⁴Chutiang chuan Israela thlahte zîng ata Levi-hote chu i tihrang ang a; tichuan, Levi-hote chu ka ta an ni ang.

¹⁵Tin, chumi zawhah chuan Levi-hote chu inbiakna puan ina rawngbâwl tûrin an lût ang a; tin, nangin anni chu i tithianghlim ang a, thên thilhlanah i hlân tûr a ni.

¹⁶Israela thlahte zîng ata ka puala ruat an ni si a; chhûl keu zawng zawng Israela thlahte fa tîr zawng zawng aiah ka pualah ka nei tawh a ni.

¹⁷Israela thlahte zînga fa tîr zawng zawng chu ka ta an ni rêng a; mihring nên, rante nên; Aigupta rama fa tîr zawng zawng ka tihhlum lai khân ka puala ka ruat tawh a ni.

¹⁸Tichuan, Israela thlahte zînga fa tîr zawng zawng aiah Levi-hote hi ka nei tawh a ni.

¹⁹Tichuan, Israela thlahte aia inbiakna puan ina rawngbâwl tûr leh, Israela thlahten hmun thianghlim an rawn hnaih pawha Israela thlahte zînga hri a lên lohna tûra remna siam tûrin, Israela thlahte zîng ata Levi-hote hi Arona leh a fapate ka pe a ni,” tiin.

²⁰Chutiang chuan Mosia te, Arona te, Israela thlahte pung khâwmho zawng zawng chuan Levi-hote chungah chuan an ti a. Levi-ho chungchâng thua LALPAN Mosia thu a pêk ang zawng zawng chuan an chungah Israela thlahte chuan an ti a.

²¹Tichuan, Levi-hote chu sual lakah an inthian fai a, an puante an su a; tin, Aronan LALPA hmaah thên thilhlanah a hlân a; tin, anmahni tihthianghlim nân Aronan inremna a siamsak a.

²²Tin, chumi zawhah Levi-hote chu Arona leh a fapate hnuaia an rawngbâwl hna thawk tûr chuan inbiakna puan in chhûngah an lût a; Levi-hote chungchâng thua LALPAN Mosia thu a pêk angin an chungah an ti ta a.

²³Tin, LALPAN Mosia a bia a,

²⁴“Levi-hote chanpual chu hêng hi a ni: kum sawmhnih leh kum nga chin chung lam chuan inbiakna puan ina rawngbâwl hna an bei ang a;

²⁵kum sawmnga mite chuan rawngbâwl hna chu an chawlhsan ang a, rawng an bâwl tawh lo vang.

²⁶Amaherawhchu, inbiakna puan in enkawl thu-ah chuan an unaute an puibâwm zêl ang a, rawng erawh chu an bâwl tawh lo vang. Hetiang hian Levi-hote chu an hnathawh i rêlsak tûr a ni,” tiin.