Read Mizo_Old_version Numbers 9 Bible Online

Numbers 9 - Mizo_Old_version bible

Numbers 9

¹Tin, LALPAN Aigupta ram ata an lo chhuah achin kum hnihna, thla khatnaah Sinai thlalêran Mosia a bia a,

²“Israela thlahte chuan kalhlên kût chu a hunbi zêlah nei rawh se.

³A hunbiah, hemi thla ni sâwm leh ni li tlai lamah in nei tûr a ni. Chumia tih tûra ruat ang zawng zawng leh a dân ang zawng zawng chuan in nei tûr a ni,” tiin.

⁴Tichuan, Mosian Israela thlahte chu kalhlên kût nei tûr chuan a hrilh a.

⁵Chutichuan, Sinai thlalêrah chuan thla khatna, ni sâwm leh ni li ni tlai lamah kalhlên kût chu an hmang ta a; LALPAN Mosia thu a pêk ang zawng zawng chuan Israela thlahte chuan an ti a.

⁶Tin, tute emaw mitthi ruang avânga thianghlim lo an awm a, chumi ni chuan kalhlên kûtah an tel ve thei lo va; tichuan, chumi ni chuan Mosia leh Arona hmaah chuan an kal a.

⁷Chungho chuan a hnênah, “Mitthi ruang avângin kan thianghlim lo a ni a; eng vângin nge Israela thlahte zînga a hunbia LALPA hnêna thilhlan kan hlan ve min khap?” an ti a.

⁸Tin, Mosian an hnênah, “Lo ngawi rih teh u, in chungchâng thu-ah LALPAN engtin nge thu a pêk dâwn ka han hre rih phawt ang e,” a ti a.

⁹Tin, LALPAN Mosia a bia a,

¹⁰“Israela thlahte hnênah, ‘In zînga mi pawh, in thlahte zînga mi pawh, mitthi ruang avânga thianghlim lo emaw, lo thang bo emaw an awm hlauh chuan LALPA tâna kalhlên kût chu an nei ve rêng rêng tûr a ni.

¹¹Thla hnihna, ni sâwm leh ni li ni tlai lamah an nei tûr a ni. Chhang, dawidim telh loh hnimhnah khâ nên an ei tûr a ni.

¹²A tûk atân chuan a enga mah an dah tûr a ni lo va, a ruh an titliak tûr a ni hek lo. Kalhlên kûta tih tûr ruat ang zawng zawng chu an ti tûr a ni.

¹³Amaherawhchu, thianghlim si, thang bona nei si lova kalhlên kûta tel lo ringawt chu, a chipuite zîng ata chu mi chu tuithlâr a ni ang; a hunbia LALPA hnêna thilhlan chu a hlan loh avângin chu mi chuan a sual mawh a phur ang.

¹⁴Tin, hnam dang mi in hnêna awmin LALPA tâna kalhlên kûta tel ve an duh chuan, kalhlên kûta tih tûr ruat leh a dân angin an ti tûr a ni; he rama mi rêng rêng leh hnam dang mite tân dân angkhat in nei tûr a ni,’ tiin sawi rawh,” tiin.

¹⁵Chutichuan, biakbûk din ni chuan Pathian chênna in chu chhûmin a tuam mup a; tin, tlai lamah chuan biakbûk chungah chuan mei alh ang mai hi a tûk zîng thlengin a awm a.

¹⁶Chutiang chuan a awm reng a: chhûm chuan a tuam reng a, zânah chuan mei angin a lang a.

¹⁷Chhûmin puan in chu a kiansan apiangin Israela thlahte chuan kal zai an rêl ṭhîn a; tin, chhûm a dinna hmun apiangah chuan Israela thlahte chuan awmhmun an khuar ṭhîn a.

¹⁸LALPA thupêkin Israela thlahte chu an kal zêl a, LALPA thupêk bawkin awmhmun an khuar ṭhîn a; biakbûk chunga chhûm chu a awm chhûng zawng awmhmun an khuar reng a.

¹⁹Tin, biakbûk chunga chhûm chu rei tak a awm chuan, Israela thlahte chuan LALPA thu chu an zâwm a, an kal lo va.

²⁰Tin, a châng chuan chhûm chu biakbûk chungah chuan ni rei lo tê chauh a awm ṭhîn a; tichuan, LALPA thupêk angin awmhmun an khuar a, LALPA thupêk angin an kal ṭhîn.

²¹Tin, a châng chuan chhûm chu tlai lam aṭanga zîng thlengin a awm a: zînga chhûm chu a invawrh sân chuan an kal ṭhîn a; chhûnah emaw, zânah emaw, chhûm chu a invawrh sân apiangin an kal mai ṭhîn a ni.

²²Biakbûk chungah chhûm chu ni hnih emaw, thla khat emaw, kum khat emaw pawh a awma, chuta a awm reng chuan Israela thlahte chuan awmhmun an khuar reng a, an kal ṭhîn lo va; a invawrh sân erawh chuan an kal ṭhîn.

²³LALPA thupêkin awmhmun an khuar ṭhîn a, LALPA thupêkin an kal ṭhîn; Mosia hmanga LALPA thupêkin LALPA thu chu an zâwm a ni.