Read Mizo_Old_version Mika 1 Bible Online

Mika 1 - Mizo_Old_version bible

Mika 1

¹Juda lal Jothama te, Ahaza te, Hezekia te lal laia Moreseth mi Mika hnêna LALPA thu lo thleng, Samari khua leh Jerusalem khaw chungchâng thua a hmuh chu.

²Nangni hnam zawng zawngte u, in vaiin hria ula; aw leilung leh a chhûnga awm zawng zawngte u, ngaithla rawh u; Lalpa PATHIAN, Lalpa chu a biak in thianghlim aṭangin, nangmahni kalhin in chung thu hretu ni rawh se.

³Ngai teh u, LALPA chu a hmun aṭangin a lo chhuak a, a lo chhuk ang a, lei hmun sângte chu a chîl dâwn si a.

⁴Mei bula khawihnûn ang leh hmun awiha tui khawh thla ang maiin, tlângte chu a hnuaiah chuan an tui ang a, kawrte chu a khi chat ang.

⁵Hei zawng zawng hi Jakob-ho bawhchhiatna avâng leh Israela chhûngte sualna avâng a ni. Jakob-ho bawhchhiatna chu eng nge ni? Samari a ni lo vem ni? Juda hmun sângte chu eng nge ni? Jerusalem a ni lo vem ni?

⁶Chuvângin, Samari chu phûla thil chhe awm khâwm angin ka siam ang a, grêp huan hmun ang maiin; tin, chumi hmuna lungte chu kawr ruam lamah ka lum thla ang a, a lungphûmte chu ka tilang ang.

⁷A milem siam chawp zawng zawng chu tihkeh sawm vek a ni ang a, a nawhchizawrh hlawhte chu meia hâl vek a ni ang; nawhchizawrh mana a lâk khâwm a ni a, nawhchizuar manah an pe leh ang.

⁸Hemi avâng hian ka ṭap ang a, ka chiau vak vak ang a, inhlîp leh saruakin ka awm ang; sihalte angin ka au vang a, vanghâwngseite angin ka rûm ang.

⁹A hliamte chu tihdam theih a ni lo. Judai ram a thleng ta hial si a; ka mite kawngka, Jerusalem meuh pawh a thleng a ni.

¹⁰Gath khuaah hril suh ula, ṭap hlek suh u; Bethle-Aphra khuaa mite u, vaivutah tâl rawh u.

¹¹Aw Saphir mi, saruak leh zak takin kal bo rawh; Zaanan mi chu a lo chhuak lo. Beth-ezel ṭahna chuan a dinchan khalh ang che u.

¹²Maroth mi chuan chan ṭha chan a nghâkhlel hliah hliah mai, LALPA hnên aṭangin thil ṭha lo chu Jerusalem kawngka bul thlenga a lo thlen thlâk avângin.

¹³Aw Lakis mi, tawlailîr chu sakawr chakah chuan bel rawh; ani hi Zion fanu sualna bul a ni, Israel-ho bawhchhiatnate chu nangmahah hian a awm a lo ni si a.

¹⁴Chuvângin, Moreseth-gath hnênah chuan inthlahna thilpêk i pe tûr a ni; Akzib inte chu Israel ram lalte tân bumna a ni ang.

¹⁵Aw Maresa mi, nangmah neitu tûr i hnênah ka la rawn hruai ang; Israel ropuina chuan Adulam a va thleng ang.

¹⁶Inziat kawlh la, i fa duh takte avâng chuan inmêt kawlh rawh; mulukawlh angin intikawlh nasa zual rawh, i hnên ata sala hruaiin an awm ta si a.