Read Mizo_Old_version Mika 2 Bible Online

Mika 2 - Mizo_Old_version bible

Mika 2

¹An khumlaizâwla khawlohna suangtuahtute leh thil ṭha lo ngaihtuah chhuaktute chu an chung a pik e! Zîngah khua a lo vârin an tum ang ngei chuan an ti ta rêng a.

²Mi lote an awt a, an lâksak a; inte an awt a, an la mai bawk a; mi leh an chhûngte, mi leh an ro chenin an hnuaichhiah a ni.

³Chuvângin, LALPAN heti hian a ti: “Ngai teh, he chhûngkaw chungah hian thil ṭha lo ka suangtuah a ni, chumi aṭang chuan in nghâwng in la sawn lo vang a, chapo takin in kal tawh hek lo vang; hun ṭha lo a ni dâwn si a.

⁴Chumi niah chuan nangmahni demin tehkhin thu an siam ang a, ṭah hla lungchhiatthlâka chhamin, ‘Rawkin kan awm zo ta a nih hi! Ka mite chan a tidanglam a; ka hnên ata a tisawn ta a nih hi! Hel hmangte hnênah kan lo a sem darh ta a ni,’ an ti ang.”

⁵Chuvângin, LALPA mite inkhâwmho zîngah chuan ṭhum vâwra hruia tehsaktu tu mah i nei lo vang.

⁶“Thu hril suh u,” tiin an sawi ṭhîn. Hêng mite hnênah hian thu an hril lo vang; sawichhiatna chu a kiang lo vang.

⁷Aw Jakoba chhûngte u, “LALPA thlarau chu hnawh chêpin a awm em ni? Hêng hi a thiltih a ni em, tih tûr em ni? Dik taka awm ṭhîn chungah chuan ka thute hian thil ṭha a ti lo vem ni?

⁸Nimahsela, ka mite chu tlaikhawhnuah hmêlma angin an lo ding chhuak a ni: indo duh lova râlmuang taka mi veivâkte chu an silhfên kawrfualte in hlihsak a.

⁹Ka mi hmeichhiate chu an in nuam tak ata in hnawt chhuak a; an naupang tête aṭangin ka ropuina chu in la bo hlen a ni.

¹⁰Tho ula, kal bo rawh u, hetah himna a awm lo; in khawlohna avângin tihchhiat vek a ni dâwn.

¹¹‘Uain leh zu a luang ang,’ tia dâwt sawi zâwlnei vâk vêlte chu hêng mite zâwlnei ni âwm lek hi an ni.

¹²“Aw Jakob-ho, in vaiin ka ko khâwm ngei ang che u a, Israel mi la awm chhunte chu ka hruai khâwm ngei ang; Bozra khaw berâm angin ka dah khâwm ang a, ran rual an hlobet hmuna awm ang maiin; mipui an nih avâng chuan an sa mur mur ang.

¹³Su tlangtu chu an hmaah a kal a; an su tlang a, kawngkhâr thlengin an kal zêl a, chumiah chuan an kal chhuak a ni; tin, an lal chu an hmaah a kal a, LALPA chuan an hma a hruai a.”