Read Mizo_Old_version Mika 3 Bible Online

Mika 3 - Mizo_Old_version bible

Mika 3

¹“Aw nangni, Jakob-ho hotute leh Israel chhûngkaw rorêltute u, ngaithla ula, ka ngên a che u,” ka ti a ni: “Rorêl dân chu in hre tûr a ni lâwm ni?

²Thil ṭha in hua a, thil ṭha lo in ngaina a, ka mite chu an vun in hihsak a, an ruh ata tîsa in sâwk thla a;

³ka mite sa in ei bawk a, an vun an hlai thla a, an ruh an tihtliahsak a; a ni, bêla chhum tûr angin an chan sawm a, sa so bêl chhûnga sa chan sawm ang maiin.”

⁴Chutih hunah chuan LALPA an au vang a; nimahsela, anmahni a chhâng lo vang. A ni, chumi hunah chuan an thiltiha an tih ṭhat lohzia ang zêlin an lakah a hmai a thup ang.

⁵Pêk tûr neite hnênan, “Muanna,” tia auva, pêk tûr nei lote, “Indona a awm dâwn,” tia tihṭhaihtu zâwlneite chuan ka mite an bum a, an chungchâng thu LALPAN heti hian a sawi:

⁶“Inlârna in hmuh loh nân in hnênah zân a lo thleng ang a; ai in en theih lohna khawpin in hnênah thimna a lo awm ang; zâwlneite tân chuan ni a liam ang a, chhûn pawh an chungah chuan khaw thim a ni ang.

⁷Hmutheitute chu an zak ang a, aienthiamte chu an mualpho vang; a ni, an vaiin an hmui an hup ang; Pathian chhânna a awm si lo va.”

⁸Nimahsela, Jakob-ho hnênah an bawhchhiatna hriattîr tûr leh, Israel-ho hnênah an sualna hriattîr tûrin, LALPA thlarau avânga thiltihtheihna te, rorêlna te leh chakna te chuan ka khat takmeuh a ni.

⁹Nangni Jakob-ho chhûngkaw hotute leh Israel chhûngkaw rorêltu, rorêlna dik tena, dikna tinrêng tiletlingtute u, hei hi ngaithla ula, ka ngên a che u.

¹⁰Zion chu thisenin an sa a, Jerusalem chu khawlohnain.

¹¹Chumia hotute chuan thamna beiseiin ro an rêl a, chumia puithiamte chuan hlawh beiseiin an zirtîr a, chumia zâwlneite chuan tangka beiseiin ai an en a ni. Chuti chung pawhin, “LALPA chu kan zîngah a awm lo vem ni? Thil ṭha lo kan chungah a lo thleng lo vang,” tiin LALPA chungah an innghat a ni.

¹²Chuvângin, Zion chu nangmahni avâng chuan lo anga leh a ni ang a, Jerusalem chu thil chhe awm khâwm a ni ang a, biak in awmna tlâng chu ramhnuai hmun sâng ang a ni ang.