Read Mizo_Old_version Mika 4 Bible Online

Mika 4 - Mizo_Old_version bible

Mika 4

¹Nimahsela, ni hnuhnûngahte chuan heti hi a ni ang a, LALPA ina awmna tlâng chu tlâng lian chungahte chuan tihnghehin a awm ang a, tlâng tête chungah chuan chawisânin a awm bawk ang; chutah chuan chi tinrêngte chu an kal nguah nguah ang.

²Tin, hnam tam takte chu an kal ang a, “Lo haw ula, LALPA tlângah, Jakoba Pathian inah chuan i chho vang u; tichuan, anin a kawng chanchinte chu min zirtîr ang a, a kalkawngahte chuan kan kal ang,” an ti ang; Zion aṭang chuan dân thu a lo chhuak dâwn si a, LALPA thu chu Jerusalem aṭangin a lo chhuak dâwn a ni.

³Tin, ani chuan chi tam tak kârah ro a rêl ang a, hla taka hnam chak tak pawh a zilhhau vang; tin, an khandaihte chu leilehna hmâwr zumahte an chher ang a, an feite chu thei kûng ah chhumna chemkawmahte an chher ang; hnam dangin hnam dang chungah khandaih an lek tawh lo vang a, indo dân pawh an zir tawh hek lo vang.

⁴Mi tinte chu an grêp hrui hnuaiah leh an theipui kûng hnuaiah an ṭhu zâwk ang a, tu mân an tihlau lo vang; sipaihote LALPA kâ chuan a sawi tawh si a.

⁵Hnam tinin mahni pathian ṭheuh an bia ang a, keini pawhin LALPA kan Pathian chu kumkhuain kan bia ang.

⁶ LALPAN heti hian a ti: “Chumi niah chuan kebai ka khâwm ang a, ûm bova awm leh ka tihhrehawma awm chu ka khâwm ang;

⁷kebai chu a thi bângah ka siam ang a, hla taka hnawh bo chu hnam chak takah ka siam ang; tûn achinah chuan Zion tlângah kumkhuain LALPA chuan an chungah ro a rêl ang.

⁸Aw nang, ran rual kulh, Zion fanu awmna tlâng, i hnênah a lo thleng ang; a ni, lalna hmasa chu a lo thleng ang, Jerusalem fanu lalna chu.”

⁹Engati nge i ṭah vak vak ni? I chhûngah lalber a awm lo vem ni, i remruattu a boral ta em ni, hmeichhe nau vei anga natnain a man tâk che?

¹⁰Aw Zion fanu, hmeichhe nau vei nau hring tûr angin nâ tuar la, vei rawh; tûnah khawpui aṭangin i kal chhuak ang a, ramah i chêng ang a, Babulon thleng pawhin i kal dâwn si a; chutah chhanchhuahin i awm ang a, chutah chuan i hmêlmate kut ata LALPA chuan a chhanchhuak ang che.

¹¹Tûnah hnam tam tak nangmah dovin an inkhâwm a, “Tihbawrhbânin awm sela, kan mit hian Zion chunga a châk zâwng chu hmu rawh se,” an ti a.

¹²Mahse, LALPA ngaihtuahnate chu an hre lo va, a remruat chu an hre thiam hek lo; hruiha buhphal dah khâwm angin anmahni a khâwm ta si a.

¹³“Aw Zion fanu, tho la, chîl rawh; i ki chu thîr angin ka siam ang a, i kephah bâwrte chu dâr angin ka siam dâwn si a; tin, chi tam tak chu i vaw sawm ang; an thil hlêp chu LALPA tân i serh hrang ang a, an sum chu lei pum Lalpa tân i serh hrang ang.”