Read Mizo_Old_version Mika 5 Bible Online

Mika 5 - Mizo_Old_version bible

Mika 5

¹Sipai rualte u, inpun khâwm rawh u, min hual a, Israel hruaitu chu a biangah tiangin an vuak hi.

²Nimahsela, nang Bethlehem Ephratha, Juda rama sâng tam tak zîngah tê hle mah la, i lak aṭang hian Israel-ho rorêltu tûr chu ka tân a lo chhuak ang a; a lo chhuahna chu hmasâng ata, chatuan aṭangin a ni.

³Chuvângin, nau veitu chuan a hrin hma loh chuan anmahni a hawisan ang; tichuan, a unau la awm chhunte chu Israela thlahte hnênah an kîr leh ang.

⁴Ani chu a ding ang a, LALPA chaknain a ran rual chu a châwm ang, LALPA a Pathian hming ropuina ngei chuan; tin, anni chu him takin an awm reng ang a, ani chu khawvêl tâwp thlengin a ropui dâwn si a.

⁵Tin, he mi hi kan inremna a ni ang. Assuria mi chu kan rama a lo kala, kan lal inte a rawn rah hunah chuan, amah do tûrin berâmpu pasarih leh mi ropui pariat kan indâwk chhuak ang.

⁶Assuria ram chu khandaihin an tichhia ang a, Nimroda ram chu a luhnaah chuan an tichhe bawk ang; tin, ani chuan kan rama Assuria mi a lo kala, kan ram chin a rawn rah hunah, ama lakah chuan min chhanchhuak ang.

⁷Jakob-ho mi la awm chhunte chu chi tam takte zîngah, LALPA aṭanga dai tla ang leh hlobet chunga ruah sûr angin an awm ang; chu chuan mihring a nghâk lo va, mihring fapate a ngaichâng hek lo.

⁸Jakob-ho mi la awm chhunte chu hnamte zîngah leh chi tam takte zîngah chuan, ramhnuai sate zînga sakeibaknei ang leh berâm rual zînga sakeibaknei vânglai angin a awm ang; ani chuan a kal tlang phawt chuan a rap bet a, a pawt sawm a, chhantu tûr pawh tu mah an awm lo.

⁹I kut chu nangmah dotute chungah lekin awm sela, i hmêlma zawng zawngte chu tihboralin awm rawh se.

¹⁰“Chumi niah chuan heti hi a ni ang,” LALPAN a ti, “I lak ata i sakawrte ka tiboral ang a, i tawlailîrte ka tichhia ang.

¹¹I ram khawpuite chu ka tiboral ang a, i kulhbîng zawng zawngte chu ka tichim ang.

¹²I kut ata dawithiamnate ka tiboral ang a, aienthiamte i nei tawh lo vang.

¹³I lak ata i milem siam chawpte leh i lungphunte chu ka tiboral ang a, i kutchhuak thil chu i be tawh lo vang.

¹⁴I lak ata i Aseri-te chu ka pawt chhuak ang a, i khawpuite chu ka tichhia ang.

¹⁵Tin, thu ngaithla lo hnamte chungah chuan thinurna leh thinrimnain phuba lâkna ka tipuitling ang.”