Read Mizo_Old_version Mika 6 Bible Online

Mika 6 - Mizo_Old_version bible

Mika 6

¹ LALPA thusawi chu tûnah ngaithla rawh u: “Tho la, tlâng lian hmaahte chuan khing la, tlâng tête chuan i aw ngaithla rawh se.

²Aw tlâng liante u, LALPA khinna chu ngaithla ula, nangni leilung nghahchhan hlunte u, ngaithla rawh u; LALPA chu a mite nên an inkhing a, Israel-ho chu a thlêm ang.

³Aw ka mite u, in chungah eng nge ka tih tâk? Eng kawngin nge ka tihhah che u? Mi han khing teh u.

⁴Aigupta ram aṭang chuan ka hruai chhuak che u a, bawih ata chu ka tlan chhuak che u a; in hmaah Mosia te, Arona te leh Miriami te ka rawn tirh kha.

⁵Aw ka mite u, LALPA thiltih fel chu in hriat theih nân, Moab lal Balaka thu rawt leh Beora fapa Balaaman a chhân dân, Sitim aṭanga Gilgal thlenga thil awmziate kha tûnah hre reng rawh u.”

⁶Eng nên nge LALPA hmaah chuan ka lo kal anga, Pathian chungnung hmaah ka kûn ang? Hâlral thilhlante, bâwngno kum khat mite nên a hmaah chuan ka lo kal dâwn em ni?

⁷LALPA chu berâmpa sâng tam tak emaw, hriak lui sîngte emawah a lungni dâwn em ni? Ka bawhchhiatna avângin ka fa tîr chu ka pein, ka thlarau sualna avângin ka taksa rah chu ka pe dâwn em ni?

⁸Aw mihring, ṭha chu a entîr tawh che a ni; LALPAN a phût che chu eng nge ni? Dik taka tih leh khawngaihna ngainat leh, i Pathian nêna thuhnuairawlh taka lên dun a ni lo vem ni?

⁹ LALPA chuan khawpui chu a au a ni, finna nei mi chuan i hming a ṭih ang: “Talhtum leh a buatsaihtu chu hre rawh u.

¹⁰Mi suaksual inah chuan suahsualna ro bâwmte chu a la awmin, tehna dawrâwm tenawm tak chu a awm cheu vem?

¹¹Bûkna dik lote leh ip rih dân dawhâte nên chuan thianghlim ka ni dâwn em ni?

¹²Chuta mi hausate chu pâwngnêknain an khat si a, chuta chêngte chuan dâwt an sawi a, an ka chhûnga an lei chu bum hmang a ni.

¹³Chuvângin, kei pawhin na taka hliamin ka vaw ta che a, i sualnate avângin ka tiṭiau ta che a ni.

¹⁴I ei ang a, i tlai lo vang; i ril a la ṭâm tho vang. Thil i dah ṭha ang a, i hum thei chuang lo vang; i hum chhun pawh indonaah a chhia ang.

¹⁵I chîng ang a; mahse, i seng lo vang; olive rahte chu i rap sâwr ang a; mahse, a hriak chu i thih lo vang; grêp rap sâwr mah la, a uain chu i in lo vang.

¹⁶Omria thuruatte chu vawn reng a ni si a, Ahaba chhûngkaw thiltih zawng zawngte nên; an remruatahte chuan in kal a ni; tichuan, hmun ṭiauvah ka siam tawh dâwn che a ni a, a chhûnga chêngte hi nuihzatbûr atân; tin, ka mite hmingchhiatna chu i phur ang.”