Read Mizo_Old_version Mika 7 Bible Online

Mika 7 - Mizo_Old_version bible

Mika 7

¹Ka chung a va pik êm! Nipui thei an seng khâwm hun laia awm ang leh, grêp lawh hun laia grêp hmaih lawh tûr ang ka ni si a; rah bâwr ei tûr a awm lo; ka nunnain theipui hmin hmasa a châk a ni.

²Pathian ngaihsak mi chu lei ata a boral a, mihring zîngah mi dik tak rêng an awm lo. Thisen chhuah tûrin an châng vek a; mi tinin mahni unau chu lênin an veh a ni.

³Thil ṭha lo tih nân an kut chu a themthiam a, hotuten phût an nei a, rorêltuten thamna an ngiat a, mi lianten an duhsâm sual an hrilh a, an thurual tlâng a.

⁴An zînga mi ṭha ber chu buar ang a ni a; mi dik ber pawh chu hnimhlîngnei aiin a chhe zâwk; i vêngtute ni, fana i awm ni ngei chu a lo thleng e; chu chu an manganna ni a ni ang.

⁵ṭhian ring suh ula, hruaituah chuan rinna nghat suh u; i ângchhûnga awmi lak aṭang chuan i ka kawngkhârte chu vêng ṭha rawh.

⁶Fapain pa hming a tichhia a, fanu chuan a nu a do va, movin a pi a do bawk a; mihring hmêlmate chu ama chhûngte ngei an ni.

⁷Kei erawh chuan LALPA lam ka en ang a, ka chhandamna Pathian chu ka nghâk ang; ka Pathian chuan mi ngaithla dâwn a ni.

⁸Aw ka hmêlma, mi diriam mai suh! Ka tlûk hun chuan ka tho leh ang; thima ka ṭhut pawhin LALPA chu ka tân êng a ni ang.

⁹LALPA chungah thil ka tihsual tâk avângin, a lungnih loh êm êmna chu ka phur ang, ka chung thu mi sawipuia, ka tân rorêlna chu a hlen hma loh chuan. Engah mi hruai chhuak ang a; tin, a felna chu ka hmu ang.

¹⁰Tichuan, ka hmêlma, ka hnêna, “Khawiah nge LALPA i Pathian chu?” titu chuan chu chu a hmu ang a, mualphonain ani chu a khuh ang. Ka mitte hian amah chu a en ang a; tûnah chuan kawtthlêr chirhdiak anga rah beh a ni tawh ang.

¹¹I kulh bangte siamna ni tûr chu! Chumi niah chuan thuruat chu hla tak thlenga tihzau a ni ang.

¹²Chumi niah chuan Assuria ram leh Aigupta leh Lui thleng hial aṭang te, tuifinriat leh tuifinriat inkâr aṭang te leh tlâng leh tlâng inkâr aṭang te chuan i hnênah an lo kal ang.

¹³Chuti chung pawh chuan ram chu, a chhûnga chêngte avâng leh an thiltih rah avâng chuan tihṭiau a ni ang.

¹⁴Karmel tlâng kâra ramhnuaia khawhar taka awm i ro chan berâm rual, i mite chu i talhtum hmangin châwm la; hmâsâng ang khân Basan leh Gilead-ah châwmin awm hlawm rawh se.

¹⁵“Aigupta ram aṭanga i kal chhuah lai ang khân an hnênah thil mak takte ka entîr ang.”

¹⁶Hnam tinin chu chu an hmu ang a, an thiltihtheihna zawng zawng chu an zahpui ang; an hmui an hup ang a, an bengte a ngawng ang.

¹⁷Rûl angin vaivut an liak ang a; leia bawkvâka kalte angin an awmna kua aṭang chuan khûr chungin an lo kal ang. LALPA kan Pathian hnênah chuan ṭih chungin an lo kal ang a, nangmah avângin an hlau vang.

¹⁸Nang anga khawlohna ngaidamtu leh a ro chan la awm chhun bawhchhiatna kal pêltu Pathian tu nge awm? A thinrimna chu kumkhuain a vawng reng lo, khawngaihnaah a lâwm êm êm ṭhin avângin.

¹⁹A hawi kîr leh ang a, kan chungah khawngaihna a nei ang a, kan khawlohnate chu a ke hnuaiah a rap bet ang. Nangin an sualna zawng zawngte chu tuifinriat mawng thûk takahte chuan i paih lût ang.

²⁰Hmâsânga kan pute hnêna chhia i chham tawh, Jakoba hnêna thutak leh Abrahama hnêna khawngaihna chu i hlen ang.