Read Mizo_Old_version Nahuma 1 Bible Online

Nahuma 1 - Mizo_Old_version bible

Nahuma 1

¹Ninevi khaw phurrit chu. Elkos mi Nahuma inlârna hmuh bu chu.

²LALPA chu thîkthuchhia Pathian leh phuba lâk hmang a ni; LALPA chuan phuba a la a, thinurnain a khat a ni; LALPA chuan a dotute chungah phuba a la a, a hmêlmate tân chuan thinurna a khâwl khâwm a ni.

³LALPA chu a thin a nel a, nasa taka thiltithei a ni a, mi sual chu thiam a chantîr rêng rêng lo vang. LALPA chuan ṭhâwngaleivirah leh thlipuiah a kawng a nei a, chhûmte chu a kea vaivut a ni.

⁴Tuifinriat chu a zilhhau va, a tikang chat a, lui zawng zawngte pawh a tikang zo va. Basan ram leh Karmel tlâng a ro zo va, Lebanon tlâng pangpâr chu a chuai a.

⁵Tlâng liante chu amah avângin an nghîng a, tlâng tête chu an tui ral a; a hmaah chuan lei hi a khûr a, a ni, khawvêl leh a chhûnga awm zawng zawngte nên chuan.

⁶A lungnih lohna hmaah chuan tu nge ding thei anga, a thinrimna nasa takah chuan tu nge awm thei ang? A thinrimna chu mei anga leih buak a ni a, lungpuite chu a tikeh sawm vek a ni.

⁷LALPA chu a ṭha a, mangan nia kulh nghet a ni; amaha an rinna nghattute chu a hria.

⁸Amah dotute erawh chu tui lian nasa tak hmangin a tiboral vek ang a, a hmêlmate chu khawthimah a ûm lût ang.

⁹LALPA kalhin eng nge in suangtuah? Tâwp dêrna a thlentîr dâwn a ni, phuba lâk nawn a ngai lo vang.

¹⁰An uain in chuan chiah huh hnêp mah sela, hlîng bawn ang leh buhpâwl ro ang maia tihboral vek an ni ang.

¹¹Nangmaha chhuak mi pakhat, LALPA kalha thil sual ngaihtuahtu, suahsualna thu râwntu a awm.

¹²LALPA chuan heti hian a ti: “An chak theihtâwpin chak mah sela, tam pawh tam tak ni mah sela, chuti chung pawhin sâm thlûkin an awm ang a, an boral ang. Lo tihrehawm tawh che mah ila, ka tihrehawm leh tawh lo vang che.

¹³Tûnah chuan i hnên ata a nghâwngkawl chu ka titliak ang, nangmah phuarna hruite chu ka tichat vek ang.”

¹⁴LALPA chuan i chungchâng thu-ah thu a pe a: “I hming pu tûr thlah i nei lo vang. I pathianho in ata milem siam chawp leh milem chhûnte chu ka tiboral ang a; i thlân ka siam ang, i sual si a.”

¹⁵Tlângahte chanchin ṭha thlena, remna thu tlângaupuitu ke chu en teh! Aw Juda, i kûtte chu serh la, i thutiamte chu hlen rawh. Mi suaksual chuan a palzût leh dâwn tawh si lo che a; tihboral dêr a ni ta e.