Read Mizo_Old_version Nahuma 2 Bible Online

Nahuma 2 - Mizo_Old_version bible

Nahuma 2

¹Tikeh sawmtu chu i hmaihmaah a lo chhuak e. Kulhbîng chu enkawl la, kawng chu vêng rawh; i kâwng tikhauh la, i thiltihtheihna chu chak takin siam ṭha rawh.

²Israel-ho ropuina angin Jakob-ho ropuina chu LALPA chuan a tungding leh si a; tiruaktute chuan anmahni an tiruak zo tawh a, an grêp pêngte an tichhe tawh si a.

³A mi chakte phaw chu thisen a ni a, mi huaisente chu a senlârin an inthuam a. A inbuatsaihna niah chuan tawlailîrte chu kahpathîr tlein a tle zawr zawr a, feite chu râpthlâk takin a phe zawk zawk a ni.

⁴Tawlailîrte chu kawtthlêrah an tlân bur bur a, lamlian zauvahte chuan an insu sawk sawk a; meichher angin an lang a, kâwlphe angin an tlân thuak thuak a ni.

⁵A mi liante chu a ko chhuak a, an kal rual chu an petek a; kulh bang lam pan chuan an hmanhmawh a, thil phen tûr an siam a.

⁶Lui kawngkhârte chu hawn a ni a, lal in chu tihralin a awm a.

⁷Tin, Huzzabi chu an hlîp a, an kal bopui a, a bawihnute chuan an âwm chûmin ṭhuro hrâm ang maiin an ṭah a.

⁸Hmasâng ata Ninevi chu dîl ang a ni a, a sah ta hum hum a. “Ding rawh u, ding rawh u,” tiin an au va; mahse, tu mah an hawi kîr lo.

⁹Tangkaraw sumte chu lâksak ula, rangkachak sumte chu lâksak rawh u! Thil chhêk khâwm leh bungraw ṭha zawng zawng ropuizia chuan tâwpintai a nei si lo.

¹⁰Tihruahin a awm a, a ruak dêr a, a ram a ni! Thinlung chu a tituiral a, khûpte chu a inkhâwng a, kâwng zawng zawng a na ngawih ngawih a, an zavaia hmêl a dâng zo vek a ni.

¹¹Tu ma tihṭit lohva an awmna, sakeibakneipa te, sakeibakneipui te, sakeibakneino te an kal vêlna, sakeibaknei bu zâwl leh sakeibakneinoten an eina hmun chu khawiah nge?

¹²Sakeibakneipa chuan a note kham khawp a pawt sawm a, sakeibakneipuite tân a seh hlum a, a pûkte chu sa sehin a tikhat a, a bu zâwlte chu saruang pawh sawmin.

¹³Sipaihote LALPA chuan, “Ngai teh, ka do che a ni; i tawlailîrte chu ka hâl khu hluah hluah ang a, i sakeibakneinote chu khandaihin a tiboral ang; tin, leia i sa seh hi ka tikin ang a, i palaite aw chu hriat a ni tawh lo vang,” a ti a.