Read Mizo_Old_version Nahuma 3 Bible Online

Nahuma 3 - Mizo_Old_version bible

Nahuma 3

¹Thisen chhuah hmang khawpui chu a chung a pik e! Dâwt leh inrawknain a khat vek a; an sa seh chu a chatlak lo.

²Vuakna vai rîk te, tawlailîr ke innghawr ri te, sakawr zuang te, tawlailîr tlân hlawk hlawk te nên;

³sakawr chung chuang mi sakawra chuang te, khandaih tle zawk zawk te, fei tle zawr zawr te nên; mi thah awm rem rum te, ruang awm rei rui te nên; ruangin kin tih rêng a nei lo, an ruangte chu an chhuih a;

⁴chûng chu nawhchizuar hmêlṭha, dawithiamnu, a uirena avânga hnam hralha, a dawi chînna avânga chhûngkaw hralhtu uirena nasa tak avânga lo awm a ni.

⁵Sipaihote LALPA chuan heti hian a ti: “Ngai teh, ka do che a ni; i hmai lamah i puan ka hlîm ang a; i saruakna chu hnamte hnênah leh i mualphona chu lalramte hnênah ka entîr ang.

⁶Bawlhhlawh tenawm takin ka theh ang che a, zahthlâk takin ka siam ang che a, ennawm atân ka dah ang che.

⁷Tin, heti hi a ni ang a, a hmu apiang che chu i lakah an tlân bo vang a, ‘Ninevi khua chu a lo ram ta a ni! Tuin nge sûn ang?’ Khawi ata nge i tân thlamuantute ka zawn tâk ang?” an ti ang.

⁸Nile lui luan hual No-amon, a kulh atân tuipui hmanga, a in hung nâna dîl hmang aiin i chak zâwk em ni?

⁹Ethiopia leh Aigupta chu a chakna a ni a, chu chu tâwp chin nei lo a ni; Put leh Lubim chu nangmah ṭanpuitute an ni.

¹⁰Chuti chung pawh chuan lâk bovin a awm a, salah a tâng a; kawtthlêr tin tâwpah a naupang tête chu an paih sawmsak a; a mi ṭhate tân ṭhum an vâwr a, a mi lian zawng zawngte chu khaidiatin phuar an ni.

¹¹Nang pawh i rui bawk ang a, thuhrûkin i awm ang; hmêlma avângin kulh nghet i zawng bawk ang.

¹²I kulh zawng zawngte chu theipui kûng, rah hmin hmasa pu ang an ni ang a; an nghîn phawt chuan eitu kaah an tla lût ṭhîn.

¹³Ngai teh, i chhûnga i mipuite chu hmeichhia an ni a! I hmêlmate tân i ram kawngka chu a inhawng huai a; i in kalhna thîr tlâwnte chu meiin a kâng ral a ni.

¹⁴Hual vêla i awm chhûng atân tui chawi la, i kulhte tinghet rawh; hlum awmnaah chuan kal la, lung chârna chu chîl la, lei rawh channa thuk chu tinghet rawh.

¹⁵Chutah chuan meiin a kâng ral ang che a, khandaihin a sât hlum ang che a, thingngêt angin a tiboral ang che. Thingngêt angin intitam la, khaukhuap angin intitam rawh.

¹⁶I sumdâwngtute chu vân arsi aia tamin i tipung a: thingngêtin a thla a zâra, a thlâwk bo ang hian an bo zo ta.

¹⁷I mi, lallukhum khumte chu khaukhuap ang an ni a, i sipai hotute chu khaw vawh nia pala khau rual fu khâwm ang an ni; amaherawhchu, ni a lo chhuak a, an thlâwk bo va, an awmna hmun rêng hriat a ni lo.

¹⁸Aw Assuria lal, i berâm vêngtute chu an muthlu e; i mi liante chu an châwl a. I mipuite chu tlângahte an darh zo va, hruai khâwmtu tu mah an awm lo.

¹⁹I na damna tûr a awm lo va, i hliam chu a nasa hle a ni. I thâwm hria apiangin kut an ben khum che; i suahsualnain a chîm fo loh tu nge awm?