Read Mizo_Old_version Habakuka 1 Bible Online

Habakuka 1 - Mizo_Old_version bible

Habakuka 1

¹Zâwlnei Habakukan phurrit a hmuh chu.

²Aw LALPA, eng chen nge ka au vang a, Mi ngaihthlâk loh vang? Inpâwngnêkna thu i hnênah ka au chhuahpui a, Nangin i chhanhim si lo va.

³Engati nge khawlohnate min entîra, Thiltih dik lo takte hi i en reng? Inrawkna leh inpâwngnêknate Ka hmaah an awm reng si a; Inhauhna leh innghirnghonate a lo chhuak a ni.

⁴Chuvângin, dân thu chuan kori a tu hlei thei lo va, Rorêlna thu a chhuak ngai hek lo. Mi felte chu mi suaksualte chuan an hual vêl a; Chuvângin, rorêlna chu dik lo takin a chhuak ṭhîn a ni.

⁵“Hnamte chu en ula, thlîr reng ula, Nasa takin mak ti rawh u; In dam chhûng hian thil kawng khat ka tih hi, Chu thiltih chu miin hrilh che u mah sela In awih tawp lo vang.

⁶Ngai rawh u, Kaldai mi hnam kawlhsen tak leh Thu dâwn tawi tak, chênna hmun an ta lo pawh neih tuma Lei vâng pal tlang ṭhîntute chu Ka chawk tho a nia.

⁷An hlauhawmin an râpthlâk êm êm a ni, An rorêlna leh an ropuina chu Anmahni aṭanga chhuak bawk a ni.

⁸An sakawrte pawh keitê aiin an ṭuan ṭha zâwk a, Tlai lam chinghniate ai pawhin an hlauhawm zâwk a ni; An sakawr chung chuanghote chu an ṭum vêl awt awt mai a; A ni, an sakawr chung chuanghote chu hla tak ata lo kal an ni; Mupui sa pan ang maiin an ding vung vung a.

⁹Pâwngnêk tumin an lo kal hlawm a, Châk takin hma lam an hawi tlat a ni; ṭiauvaivut ang maia tam salte an man hlawm ṭhîn.

¹⁰A ni, lalte pawh an chêksawlh a, Mi liante chu an nuihzatbûr a; Kulh nghet zawng zawngte pawh an tham lo, Lei an chhûng pâwng a, an la mai ṭhîn si a.

¹¹Thli ang maiin an rawn nuai a, An kal tlang pur pur a; Amaherawhchu, an chakna chu pathiana an neih avângin Thiam loh an chang a ni.”

¹²Aw LALPA, ka Pathian, ka Mi Thianghlim, Chatuan mi i ni lo vem ni? I thi ngai lo. Aw LALPA, nangin anni chu rorêl nân i thlang ta a; Aw Lungpui, nangin anni chu thunun nân i din chhuak a ni.

¹³Nang, thil sual hmu thei lo khawpa mit thianghlima, Inhnehchhiahna en thei lo chuan, Engati nge vervêk taka titute chu i en theiha, Mi suaksualten an aia mi fel an ei zawh laia i ngawih renga,

¹⁴Mihring hi tuifinriata sanghate leh rannung, An chunga rorêltu nei bîk lote anga i siam ni?

¹⁵Nghakuaiin a khai chhuak vek a, A lênin a man hlawm a, A lênkhang chuan a fûn khâwm a. Chuvângin, a hlimin a lâwm a ni.

¹⁶Chutih avâng chuan a lên hnênah inthawina a hlân a, A lênkhang hnênah rimtui a hâl a; Anmahni avânga a chanvo a lo lena, Ei tûr a neih tam tâk avângin.

¹⁷Chuvângin, a lên chu tiruak leh ṭhînin, Hnamte thah a hnial lo fo dâwn em ni?