Read Mizo_Old_version Habakuka 2 Bible Online

Habakuka 2 - Mizo_Old_version bible

Habakuka 2

¹Tin, ka vênnaah ka ding ang a, kulh chungah ka chuang ang a, ka vui thu-ah khân ka hnênah eng nge a sawi dâwna, keiin engtin nge ka chhân dâwn tih hmu tûrin ka thlîr ang.

²Tin, LALPA chuan heti hian mi chhâng a: “Inlârna chu ziak la, a chhiartuin tlân paha A chhiar theih khawpa chiangin Lungphêk chungah ziak rawh.

³Inlârna hi hun ruat chhûng atân mai a ni nghe nghe si a; A kin ni chu a hnai tial tial a, a thlâwn lo vang. Rei deuh mah se, nghâk rawh; A lo thlen ngei dâwn avângin a tlai chuang lo vang.

⁴En teh, a chapo mang e, a rilru a va ngîl lo êm! Mi fel erawh chu a rinnain a nung ang.

⁵A ni, chu lovah pawh, uain heh chu bum hmang, Mi chapo, in lam ngawrh lo mi a ni a; A châkna chu Seol angin a hawng zau va, Thihna ang a ni a, tihtlai theih a ni lo; A hnênah hnam tin a hruai khâwm a, Mi zawng zawng a chhêk khâwm a ni.

⁶Hêng zawng zawngte hian a chungah tihelna thu, Deuna thu fing tawi - ‘A ta si lova intipunga, Dahkham thila intimuk chu a chung a pik e! Eng chen nge a chîn ang aw!’ tiin an sawi lo vang em ni?

⁷Nangmah eitu tûr che an ding chhuak phutin, A tihrehawmtu tûr che an harh ang a, An tân râllâk mai i la ni dâwn lâwm ni?

⁸Hnam tam tak i rawk tawh avângin, Hnam dang zawng zawngte pawhin an rawk ve thung ang che; Mite thisen avâng leh ram chungahte, Khawpui leh a chhûnga chêng zawng zawngte hnêna I pâwngtihna avâng khân.

⁹Mi sual kut ata a him theihna tûra Bû sâng taka chhep tûrin, A in atana hlâwkna bawlhhlawh chîngtu chu A chung a pik e!

¹⁰Mi tam takte tiboralin i in atân mualphona I phiar a lo ni a, I nunna chungah thil i tisual a ni.

¹¹Lung chu bang ata a au vang a, Thing hmanrua aṭangin khanchhukin a chhâwn ang.

¹²Thisena khawpui dina, khawlohnaa khawpui siamtu chu a chung a pik e!

¹³Ngai teh u, miten mei kan mai atâna an thawka, Hnamte engmahlo atâna an intihah hi Sipaihote LALPA tih a ni lo vem ni?

¹⁴Tuifinriat chu tuiin a khat vek angin, LALPA ropuizia hriatnain lei hi a khat vek dâwn si a.

¹⁵A ṭhenawm hnêna zu in tûr petu chu a chung a pik e, Nang, an saruak i hmuh theih nâna i tûr chawhpawlha tiruitu chu!

¹⁶Ropuina aiah zahnain i intitlai a, Nang pawhin in la, saruakin awm ve mai rawh; LALPA kut ding lam no chu i hnênah a lo lêt ang a, I ropuina chungah bawlhhlawh zahpuiawm tak a awm ang.

¹⁷Lebanon tlâng i suasamna chuan a chhilh ang chia, Sate boralna chuan a tihlau vang che; Mihring thisen avâng leh ram te, khawpui te leh A chhûnga chêngte i suasam tawh avângin.

¹⁸Milim chher chawp hi eng nge a sâwta, A siamtuin a siam ni? Milim chhûn chawp, dâwt zirtîrtu mai, A siamtuin ama kutchhuak a rin leh chawp si, Milim ṭawng thei hlei lo han siam hi eng nge a sâwtna?

¹⁹Thing hnênah, ‘Harh rawh,’ tia, Lung ṭawng thei lo hnênah, ‘Tho rawh,’ titu chu A chung a pik e! Hei hian a zirtîr dâwn em ni? En teh, rangkachak leh tangkaruaa luan a ni a; A chhûngah thaw rêng a awm tawp lo a ni.

²⁰ LALPA erawh chu a in thianghlimah a awm a; Leia mi zawng zawngte chu a hmaah chuan ngawi ṭhiap rawh se.”