Read Mizo_Old_version Habakuka 3 Bible Online

Habakuka 3 - Mizo_Old_version bible

Habakuka 3

¹Sigionoth thlûk dâna zâwlnei Habakuka ṭawngṭaina.

²Aw LALPA, i chanchin an hril ka lo hria a, ka hlau va; Aw LALPA, hêng kum chhûng hian i hna tharthawh leh la, Hêng kum chhûngte hian tilâr ang che; Thinurnaah chuan zahngaihna telh ṭhîn ang che.

³Teman ram aṭangin Pathian a lo kal a, Mi Thianghlima chu Paran tlâng aṭangin. (Selah) A ropuinain vânte khi a tuam a, A faknain lei a khat a.

⁴A tlêtzia chu êng ang mai a ni a; A kut aṭangin êng zâm a lo chhuak a, Chutah chuan a thiltihtheihna inthupin a awm a.

⁵Hripui chu a hmatâwngah a ṭang a, A hnungah chuan ṭêk a tla rum rum a.

⁶A ding a, lei chu a tinghîng dur dur a; A hawi vêl a, hnamte chu a tithlabâr a; Tlâng hlunte chu a tidarh a, Kumkhaw mualte pawh an kimkî a; A kawngte chu chatuan ata a ni.

⁷Kusan puan inte chu hrehawm tuarin ka hmu a, Midian ram puanzârte chu an khûr a!

⁸ LALPA chu luite chungah chuan a lungni lo ta a ni maw? Luite chungah chuan i thinrimin, Tuipui chungah i thinur a ni maw, I sakawr, i chhandamna tawlailîr chungah i chuan tâk?

⁹Peih diam a ni e, i thal ngul, Hnamte tân chhechham a nghet e. (Selah) I vaw phel ta, lei chu, luiin.

¹⁰Tlâng lianten an hmu chia, an hlau, Tuifâwnte pawhin mual an liam ta. Tui thûk takin awrâwl a chhuah a, Sâng takah a bân a phar ta.

¹¹Tûrni, chhawrthlapui an ding reng, mahni hmunah, I thal lêng chhuak êngah te leh, I fei tle zawr zawr êngah chuan.

¹²Thinurin ram i chîl chhuak a, Thinrimin hnamte i pal ta.

¹³I mite chhandam nân i chhuak, I hriak thiha chhandam nân chuan; Mi sual in a chung hlîp zovin, Nghahchhan lang râwtin i suasam. (Selah)

¹⁴A rûk tea rethei ei rala lâwmte, ṭhâwngaleivir ang lo thawk e, mi tihdarh nân; An tiang ngeiin i chhun ta a, a indo thiamte lu-ah chuan.

¹⁵I sakawrin tuipui i zawh, Tuifâwn nasa tak mai chu.

¹⁶Ka hriatin ka khûr, tirilan, A awah ka khâ a inkhâwng; Ka ruh a muatin, ka khûr a, mahni hmunah; Mahse, sipai rual pui ang buaina ni Mipui chunga a lo thlen hunin Ka nghîng lo vang.

¹⁷Theipui thing pâr vul dâwn lovin, Grêp hrui rah dâwn hek suh sêng; Olive thing pawh rah lovin, Lovin ei tûr chhuah dâwn lo sêng; Huang ata ran rual tibovin, Ran inah ran awm lo mah sêng;

¹⁸Ka lâwm zêl ang, LALPA-ah chuan, Ka chhandamna Pathianah chuan ka lâwm cheu dâwn.

¹⁹Lalpa Jehova, ka chakna, Ka ke a siam, sakhi ke ang, Ka hmun sângah mi lêntîr ang. Hla hruaitu tân, ka ṭingṭanga sak mi.