Read Mizo_Old_version Zephania 1 Bible Online

Zephania 1 - Mizo_Old_version bible

Zephania 1

¹Juda-te lal Amona fapa Josia lal laia LALPA thu Zephania, Kusia fapa, Gedalia fapa, Amaria fapa, Hezekia fapa hnêna lo thleng chu.

²“Lei chung ata thil zawng zawng ka tiral vek ang,” tih hi LALPA thuchhuak a ni.

³“Mihring leh sate ka tiral ang a; Chunglêng savate leh tuipui sanghate ka tiral ang a; Mi sualte chu ka titlu ang a; Lei chung ata mihring ka tibo daih ang,” tih hi LALPA thuchhuak a ni.

⁴“Juda-te leh Jerusalem luahtute zawng zawng chungah Ka kut ka lek ang a; he hmun aṭang hian Baala la awm chhunte, Kemarim hming chu puithiamho chawpin,

⁵In chung chhîpa vân lam thilho hnêna kûn ṭhînte, LALPA hnêna chhechhama Malkama chhâla chham bawka kûn ṭhînte,

⁶ LALPA hawisantute leh LALPA zawng lova, Amah râwn lotute chu ka tibo daih ang.

⁷Lalpa PATHIAN hmaah chuan ngawi reng rawh, LALPA ni chu a hnaih tâk avângin. LALPA chuan inthawina a buatsaih tawh a, A mi sâwmte pawh a tithianghlim tawh si a.

⁸Tin, LALPA inthawina niah chuan heti hi a ni ang a, Hotute leh lal fapate leh hnam dang silhfêna Inthuamte zawng zawng chu ka hrem ang.

⁹Tin, chumi niah chuan kawngka zuankahlên zawng zawng, An hotute inpâwngnêkna leh bumnaa tikhattute chu ka hrem ang.

¹⁰Chumi niah chuan, Sangha Kawngka aṭanga au thâwm te, Miseneh aṭanga chiau vak vak te, tlâng aṭanga ri hum hum te a awm ang,” tih hi LALPA thuchhuak a ni.

¹¹“Maktesh mite u, Kanaan mi zawng zawng an boral avângin chiau vak vak rawh u! Tangkaraw phurtute zawng zawng an boral vek tawh a ni.

¹²Tin, chumi hunah chuan heti hi a ni ang a, Khâwnvâr chhiin Jerusalem ka zawng chhuak ang a; Uain mawng nawi anga awm mai maia, an rilrua, ‘LALPA chuan a chhia a ṭha tih a nei ngai nêm,’ titute chu ka hrem ang.

¹³Tin, an sumte chu râllâkah a la chang ang a, An inte chu a ram ang; a ni, inte an sa ang a; mahse, an luah lo vang; Grêp huante an siam ang a; mahse, a uain chu an in lo vang.”

¹⁴ LALPA ni ropui tak chu a hnai e, a hnaiin a thleng thuai dâwn a ni. LALPA ni thâwm chu râpthlâk tak a ni; Chutah chuan mi chak chu a chiau vak vak ang.

¹⁵Chumi ni chu thinurna ni a ni a, Mangan leh hrehawm ni, chhiatna leh ṭiauna ni, Thimna leh khaw dur ni, chhûm leh thim chhah mup ni a ni a,

¹⁶Kulha hung khawpuite chungah leh khaw kil kulh sângte chungah chuan, tawtawrâwt leh râl bei thâwm rîkna ni a ni a.

¹⁷“Tin, mihringte chungah hrehawmna ka rawn thlen ang a, Mitdel ang maiin an kal ang, LALPA chungah an sual avângin; An thisen chu vaivut angin ka leih bua ang a, An tisate pawh êkdûr ang maiin.”

¹⁸ LALPA thinurna niah chuan an rangkachak emaw, An tangkarua emaw pawhin anmahni a chhanchhuak thei lo vang a; Ram pum pui hi a thîkna meiah chuan a kâng bo vek ang. Rama chêngte zawng zawng a tibo dâwn a, A ni, tihbona râpthlâk tak a siam dâwn si a.