Read Mizo_Old_version Zephania 3 Bible Online

Zephania 3 - Mizo_Old_version bible

Zephania 3

¹Hel hmang leh bawlhhlawh, hnehchhiah hmang khawpui chu a chung a pik e!

²Aw chu a awih lo va, zilhna a pawm lo va; LALPA chu a ring lo va, a Pathian lam a hnaih duh lo.

³A chhûnga a hotute chu sakeibaknei rûm lai an ni a; A rorêltute chu tlai lam chinghnia an ni a, A tûk thlenga ṭhial tûr eng mah an zuah lo.

⁴A zâwlneite chu pawlawh leh bum hmangte an ni a: A puithiamten hmun thianghlim chu an tibawlhhlawh a, Dân chu an bawhchhe nasa a ni.

⁵A chhûnga LALPA chu a fel a; khawlohna a ti lo vang; Tûk tin a rorêlna chu a tilang a, a pelh ngai lo va; Mahse, mi fel lo chuan zah nachâng rêng a hre lo.

⁶“Hnamte chu ka tibo daih a, an kulhte a ram a; An kawtthlêrte chu tu ma kal tlang loh nân ka tiram a; An khawpuite chu a chhe ta; Chutichuan, tu mah an awm ta lo va, luahtu rêng an awm tawh lo.

⁷‘Nangin mi hlau phawt la, zilhna hi lo pawm la; Tichuan, ama chungchânga ka ruat zawng zawngte ang khân, A awmna chu tihbo daih a ni lo vang,’ ka ti a. Mahse, zîngah an tho va, an thiltih zawng zawng an tikhawlo vek a.

⁸Chuvângin, râllâk la tûra ka thawh ni thlengin mi nghâk rawh u,” tih hi LALPA thuchhuak a ni: “Ka thiltum chu, an chunga ka thinurna, Ka thinurna hlauhawm tak mai chu leih tûra Lalna ramte inkhâwmtîra, hnamte koh khâwm hi a ni a; Lei zawng zawng hi ka thîkna meiah a la kâng fai dâwn si a.

⁹Chutih hunah chuan mipuite chu hmui thianghlim ka puttîr leh ang, LALPA hming chu an zaa an lama, thu khat vuaa a rawng an bâwl tlân theih nân,

¹⁰Ethiopia lui piah lam aṭangin ka hnêna dîltute, ka mi darhte fanu chuan ka thilhlan an rawn la ang.

¹¹Chumi niah chuan ka chunga i bawhchhiatna thiltih avângte chuan i zak tawh lo vang, Chumi hunah chuan i chhûng ata i mi, chapona hlimpuitute chu ka la bo vang a, Ka tlâng thianghlimah hian chapo hmangin i awm tawh lo vang.

¹²I chhûng ata mi retheite leh Tihduhdah tuarte chu ka zuah ang a, LALPA hming chu an ring ang.

¹³Israel mi la awm chhunte chuan khawlohna an ti lo vang a, Dâwt an sawi hek lo vang; An kaah pawh bumna ṭawng a awm hek lo vang; An eiin an mu ang a, tu mahin an tihlau tawh lo vang.”

¹⁴Aw Zion fanu, zai rawh; aw Israel, au vak vak rawh; Aw Jerusalem fanu, i thinlung zawng zawngin lâwm la, hlim rawh.

¹⁵ LALPAN i chungchâng rêlnate chu a la bo ta a, I hmêlma a paih chhuak ta. Israel Lalber, LALPA pawh chu i hnênah a awm e; Thil ṭha lo i hlau ngai tawh lo vang.

¹⁶Chumi niah chuan Jerusalem hnênah, “Hlau suh, aw Zion, I kut pawh zawi suh se,” an ti ang.

¹⁷“LALPA i Pathian chu i hnênah a awm e, Chhandamtu tûr mi chak tak chu; Lâwmin i chungah a hlim ang a, a hmangaihna a tithar ang a, Hla sain i chungah a lâwm ang.

¹⁸Nangmaha mi, inkhâwmpuia tel pha lova lungngaite chu Ka hruai khâwm ang, nangmah avânga sawichhiatna phurrit phurtute chu.

¹⁹Ngai rawh, chumi hunah chuan nghaisatu zawng zawng che kha ka ngaihtuah ang; Tin, kebai chu ka chhandam ang a, Hnawh bova awm chu ka hruai khâwm ang; Tin, lei chung zawng zawnga an lo mualphona chu, Fakna leh hmingthannaah ka chantîr ang.

²⁰Chumi hunah chuan ka hruai lût ang che u a, Chumi hunah chuan ka hruai khâwm ang che u; In hmuh ngeia in sal tânna ka lamlêt hunah chuan, Lei chunga mi zawng zawng zîngah Hmingthanna leh fakna ka siamsak dâwn si che u a,” LALPAN a ti.