Read Mizo_Old_version Hagaia 1 Bible Online

Hagaia 1 - Mizo_Old_version bible

Hagaia 1

¹Lal Daria lal kum hnihna, a thla rukna, chumi thla ni hmasa berah chuan, zâwlnei Hagaia kuta LALPA thu chu: Sealtiela fapa Judai ram awptu Zerubabela hnênah leh Jehozadaka fapa puithiam lalber Josua hnênah a lo thleng a, heti hian a ti:

²“Sipaihote LALPA chuan heti hian a ti, ‘Hêng mite hian, “LALPA in sak hun tûr chu a lo la thleng lo ve,” an ti e,’ ” tiin.

³Tin, zâwlnei Hagaia kutah LALPA thu a lo thleng a;

⁴“He in hi a ram reng laia nangni, in chungthuah neitea in chên hi a hun em ni?” tiin.

⁵Tûnah zawng sipaihote LALPA chuan heti hian a ti: “In kawngte chu chhût ngun rawh u.

⁶Tam tak in chîng a, tlêm tê in seng si; in ei a, in tlai si lo; in in a, in kham si lo; in sin a, in lum chuang si lo; inhlawhfa chuan ip pawpa thlâk atân mai a hlawh a ni.”

⁷Sipaihote LALPA chuan heti hian a ti: “In kawngte chu chhût ngun rawh u.

⁸Tlângah kal chho ula, thing han la ula, in chu sa rawh u; chu chu ka lâwm ang a, chawimawiin ka awm ang,” LALPAN a ti.

⁹“Hmuh ṭeuh in beisei a, ngai teh u, tlêm tê a lo ni; inah in rawn thlen a, ka lo chhêm bo va. Eng vâng nge ni?” tih hi sipaihote LALPA thuchhuak a ni. “Nangni mahni in lam pan ṭheuhva in tlân haw thuai ṭhina, ka in chu a ram dêr avâng a ni.

¹⁰Chu vâng chuan vânin daifîm tla tûr a hrênsak che u a, lei chuan a rah a hrênsak bawk che u a ni.

¹¹Lei chungah te, tlâng chungah te, buh chungah te, uain chungah te, hriak chungah te, lei aṭanga thil lo chhuak chungah te, mihring chungah te, ran chungah te, kuta thawh chhuah zawng zawng chungah te khua ka tikhêng a ni e.”

¹²Tichuan, Sealtiela fapa Zerubabela leh Jehozadaka fapa puithiam lalber Josua leh mi la awm chhun zawng zawngte chuan, LALPA an Pathian aw leh LALPA an Pathianin a tirh anga zâwlnei Hagaia thu chu an bengkhawn ta a; mite chuan LALPA chu a hmaihmaah chuan an ṭih ta a.

¹³Tichuan, mite hnêna LALPA thuchah hmang chuan LALPA tirhkoh Hagaia chuan a sawi a, “In hnênah ka awm a ni, tih hi LALPA thuchhuak a ni,” tiin.

¹⁴Tin, LALPA chuan Sealtiela fapa, Judai ram awptu Zerubabela rilru leh Jehozadaka fapa, puithiam lalber Josua rilru leh mi la awm chhun zawng zawngte rilru chu a chawk tho ta a; tichuan, an lo kal a, sipaihote LALPA an Pathian inah chuan hna an thawk ta a;

¹⁵Lal Daria lal kum hnihna, a thla rukna, chumi thla ni sawmhnih leh ni linaah chuan.