Read Mizo_Old_version Hagaia 2 Bible Online

Hagaia 2 - Mizo_Old_version bible

Hagaia 2

¹Thla sarihna, chumi thla ni sawmhnih leh ni khatnaah zâwlnei Hagaia kutah LALPA thu a lo thleng a:

²“Sealtiela fapa, Judai ram awptu Zerubabela hnênah leh Jehozadaka fapa, puithiam lalber Josua hnênah leh mi la awm chhunte hnênah chuan heti hian sawi ta che:

³‘He in hi a hmaa a ropui lai hmu in zîngah tu nge la awm? Tûnah hian eng angin nge in hmuh le? In mit hmuhah eng tham mah a ni lo lâwm ni?

⁴Aw Zerubabel, tûnah chuan huai takin awm rawh,’ tih hi LALPA thuchhuak a ni; ‘Aw puithiam lalber Josua, Jehozadaka fapa, nang pawh chak takin awm rawh; tin, nangni he rama mi zawng zawngte u, chak takin awm bawk rawh u,’ tih hi LALPA thuchhuak a ni; ‘Thaw rawh u, in hnênah ka awm si a,’ tih hi sipaihote LALPA thuchhuak a ni:

⁵‘Aigupta ram aṭanga in lo chhuah laia thu ka thlunpui che u ang khân in zîngah ka thlarau a la chêng reng a ni, hlau suh u.’

⁶Sipaihote LALPA chuan heti hian a ti si a, ‘Vawi khat chu vân leh lei leh tuifinriat leh khawmualte hi rei lo te ka la tinghîng leh ang.

⁷Hnam tinrêng ka tinghîng ang a, hnam tinrêng thil duh zâwngte chu a lo thleng ang a, he in hi ropuinain ka tikhat ang,’ sipaihote LALPA chuan a ti.

⁸‘Tangkarua hi ka ta a ni a, rangkachak hi ka ta a ni,’ tih hi sipaihote LALPA thuchhuak a ni.

⁹‘He in hnuhnûng zâwk ropuina hi a hmasa ai khân a nasa zâwk ang,’ sipaihote LALPA chuan a ti. ‘Tin, he hmunah hian remna ka thlen ang,’ tih hi sipaihote LALPA thuchhuak a ni.”

¹⁰Daria lal kum hnihna, thla kuana, ni sawmhnih leh ni linaah chuan zâwlnei Hagaia kutah LALPA thu hetiang hian a lo thleng a.

¹¹Sipaihote LALPA chuan heti hian a ti: “Puithiamte chu heti hian dân zâwt teh,

¹²Tuin emaw a kawrfual hmâwrah sa thianghlim fûn sela, a kawrfual hmâwr chuan chhang emaw, thil chhum kawi emaw, uain emaw, hriak emaw, ei tûr rêng rêng emaw lo khawih ta sela, a thianghlim ang em?” tiin. Puithiamte chuan, “Thianghlim lo vang,” tiin an chhâng a.

¹³Tin, Hagaia chuan, “Mitthi ruang khawih avânga mi bawrhbângin hêng thil a enga pawh hi lo khawih ta sela, a bawrhbâng ang em?” a ti a. Puithiamte chuan, “Bawrhbâng ang,” tiin an chhâng a.

¹⁴Tin, Hagaia chuan heti hian a chhâng ta a: “He mite hi chutiang tak chu an ni a, he hnam hi chutiang tak chuan ka hmaah an awm, tih hi LALPA thuchhuak a ni; an kutchhuak tinrêng pawh chutiang bawk chu a ni a, chuta an thil hlan pawh chu a thianghlim lo a ni.

¹⁵“Tûn aṭangin nakin hnu thlengin LALPA biak inah lung in chherchhuan hma, tûn hma lam kha ngaihtuah ang che u:

¹⁶khâng hun lai zawng zawng khân, buh tehkhâwng sawmhnih tling âwm tak chhûn khâwmnaa mi a lo kalin, sâwm chauh a lo tling a; uain sâwrna hmuna bûr sawmnga thâl chhuah tuma a lo kalin, sawmhnih chauh a lo tling ṭhîn.

¹⁷In thawh chhuah zawng zawngah rona te, ngêtna te leh rial tein ka hrem che u a; nimahsela, ka lam in hawi chuang lo, tih hi LALPA thuchhuak a ni.

¹⁸He thla kuana, ni sawmhnih leh ni lina, vawiin aṭang hian nakin hnu thlengin, tûn hma lam kha ngaihtuah ang che u, LALPA biak in lung phûm ni aṭang khân ngaihtuah rawh u.

¹⁹A chi chu buh inah a la awm em ni? Grêp hrui te, theipui kûng te, pawmgranet te leh olive thing te chu a la rah lo; vawiin aṭang hian mal ka sâwm ang che u.”

²⁰Tin, LALPA thu chu, chumi thla, ni sawmhnih leh ni linaah chuan Hagaia hnênah a lo thleng nawn leh a:

²¹“Hetiang hian Judai ram awptu Zerubabela hnênah chuan sawi rawh: ‘Kei chuan lei leh vân ka la tinghîng ang; ram lalṭhutphahte chu ka paih thla ang a, hnamte ram chakna chu ka tichhia ang;

²²tawlailîrte leh a chunga chuangte chu ka titlu ang a, sakawrte leh a chunga chuangte chu; mi tin mahni unaute khandaihin an tlu ang.

²³Chumi niah chuan, aw Zerubabel ka chhiahhlawh, Sealtiela fapa, ka chelh ang che,’ sipaihote LALPA thuchhuak chuan a ti, ‘Tin, hming nemna zungbun angah ka siam bawk ang che, ka lo thlang tawh si che a,’ sipaihote LALPA thuchhuak chuan a ti,” tiin.