Read Mizo_Old_version Zakaria 1 Bible Online

Zakaria 1 - Mizo_Old_version bible

Zakaria 1

¹Daria lal kum hnihna, thla riatnaah chuan Idova fa, Barakia fapa zâwlnei Zakaria hnênah chuan LALPA thu a lo thleng a:

²“LALPA chu in pate chungah khân a lungni lo êm êm a ni.

³Chuvângin, heti hian an hnênah va sawi rawh: Sipaihote LALPA chuan heti hian a ti e, Ka lam lo hawi ula, kei pawh in lam ka lo hawi ang, Tih hi sipaihote LALPA thuchhuak a ni.

⁴Zâwlnei hmasaten, Sipaihote LALPA chuan, In awm dân sual kha tûnah rawn hawisan ula, In thil tihsual chu rawn hawisan rawh u, a ti e, Tia in pate an hrilh pawha ngaithla lova, Bengkhawn lote ang khân awm suh u,” Tih hi LALPA thuchhuak a ni.

⁵“In pate chu khawiah nge? Zâwlneite pawh chu an nung kumkhua ta em ni?

⁶Ka thu leh ka thuruatte, ka chhiahhlawh zâwlneite hnêna Ka pêk khân, in pate chu a nang ta mai pawh a ni lâwm ni? Tichuan, an inlamlêt a, ‘Sipaihote LALPA chuan, Kan chungchânga tih a tum ṭhin angin Kan awm dân ang zêl leh kan thiltih ang zêlin, Kan lakah a ti ta a ni,’ an tih kha,” tiin.

⁷Daria kum hnihna, thla sâwm leh thla khatna, chu chu Sebat thla a ni a, ni sawmhnih leh ni linaah chuan Idova fa Barakia fapa, zâwlnei Zakaria hnênah chuan LALPA thu a lo thleng a;

⁸zânah chuan sakawr sen chunga mi pakhat chuang ka hmu a, ruama lenhmui thing zîngah hian a ding a; tin, a hnungah chuan sakawr, a sen te, a buang te, a vârte an awm a.

⁹Tah chuan kei chuan, “Aw ka lalpa, hêng hi eng nge ni?” ka ti a. Vântirhkoh mi betu chuan ka hnênah, “Hêng hi eng nge an nih keiman ka entîr ang che,” a ti a.

¹⁰Tin, mi, lenhmui thing zînga ding khân a chhâng a, “Hêng hi LALPAN lei zawng zawng fang chhuak tûra a tirhte chu an nih hi,” a ti a.

¹¹Tin, anni chuan LALPA vântirhkoh lenhmui thing zînga ding chu an chhâng a, “Lei zawng zawng chu kan fang chhuak tawh a, ngai rawh, lei chu a awm hle hle a, a awm mai mai a ni,” an ti a.

¹²Chutah LALPA vântirhkoh chuan a chhâng a, “Aw sipaihote LALPA, Jerusalem leh Juda khawpui chunga he kum sawmsarih i thinurnate hi eng chen nge i khawngaih loh vang le?” a ti a.

¹³Tin, LALPA chuan, vântirhkoh, thu ṭha tak, thu thlamuanawm taka mi betu chu a chhâng ta a.

¹⁴Chutichuan, vântirhkoh mi betu chuan ka hnênah, “Heti hian va au rawh,” a ti a: “Sipaihote LALPA chuan heti hian a ti a ni: ‘Jerusalem leh Zion hi vei takmeuhvin ka vei a.

¹⁵Tin, hnam nuam leng mai maite lakah chuan ka lungni lo êm êm a ni; Ka lungni lo deuh chauh a ni na a, Anmahni tâna thil ṭha lo chu an tizual ta a ni.’

¹⁶Chuvângin, LALPA chuan heti hian a ti a ni: ‘Zahngaihna nên Jerusalem lam ka hawi leh mêk a, Tah chuan ka in chu sak a ni ang,’ Tih hi sipaihote LALPA thuchhuak a ni; ‘Tin, Jerusalem chungah chuan tehna zamin a la awm ang,’ tiin.

¹⁷Heti hian sipaihote LALPA chuan a ti e: ‘Ka khawpuite chu hmuingîlna avângin an vul leh ang a, LALPA chuan Zion chu a thlamuan leh ang a, Jerusalem chu a thlang leh ang,’ Tiin va au leh rawh,” a ti a.

¹⁸Tin, ka mit ka lên chho va, ka han en a, kî pali ka hmu a.

¹⁹Vântirhkoh mi betu hnênah chuan, “Hêng hi eng nge ni?” ka ti a. Tin, ani chuan, “Hêng hi Juda te, Israel te, Jerusalem te tidarhtu kî an nih hi,” tiin mi chhâng a.

²⁰Tin, LALPA chuan thirdêng pali mi entîr a.

²¹Tichuan, kei chuan, “Hêng hi eng rawn ti tûr nge an nih?” ka ti a. Ani chuan, “Sâwng saw tu mah dâk chhuak ngam rêng awm tawh lo khawpa Juda-te tidarhtu kî chu an ni a; mahse, hêng hi anmahni tizâm tûr leh, Juda ram tidarh tûra an laka an ki rawn hmangtu hnamte kî chu paih thla tûra lo kal an nih hi,” tiin a sawi a.