Read Mizo_Old_version Zakaria 10 Bible Online

Zakaria 10 - Mizo_Old_version bible

Zakaria 10

¹Ruah hnuhnûng hunah hian LALPA chu ruah dîl rawh u; LALPA, kâwl tiphetu ngei chu. Tin, anin lova hlobet tinrêngte tân Ruahpuivânâwn a sûrtîr ang.

²Milem pathian chuan engmahlo mai a sawi a, Aisânthiamte thil hmuh chu dâwt a ni si a; Mumang dik lote an sawi a, Mi an thlamuan thlâwn a; Chuvângin, berâm rual angin mahni kawng kawng an hawi a, Berâmpu a awm loh avângin hrehawm an tuar a.

³“Berâmpute chungah chuan ka thin a rim êm êm a, Kêlpate chu ka hrem ang. Sipaihote LALPA chuan a ran rual, Juda chhûngte chu a rawn kan ang a, Indonaa sakawr ṭha tak angin a siam dâwn si a.

⁴A lak ata a kila lung te, puan in kilhna thîr te, indona thal ngul te, Rorêltu te an lo chhuak ho dâwn a ni.

⁵Tin, mi chak tak ang an lo ni ang a, Indona kawtthlêr chirhdiakah chuan an hmêlmate an rap bet ang. LALPA chu an hnêna a awm avângin an bei nasa mai ang a, Sakawr chung chuangte chu an timualpho dâwn a ni.

⁶Tin, Juda chhûngte chu ka tichak ang a, Josefa chhûngte chu ka chhanhim ang. Ka hruai kîr leh ang, anni chu ka lainat si a. Tin, ka paih thlâk loh ang mai an la ni ang a; Kei hi LALPA an Pathian chu ka ni si a, Anmahni ka ngaithla tawh ang.

⁷Tin, Ephraim mite chu mi chak tak ang an ni ang a, Uain tihlâwm angin an thinlung a lâwm ang. A ni, an fate chuan an hmu ang a, an hlim ang a; LALPA-ah chuan an thinlung a lâwm ang.

⁸Ka faifûk ang a, anmahni ka ko khâwm ang, Anni chu ka tlan tawh si a; An lo pun tawh ang ngeiin an pung zêl ang.

⁹Ram dang dangah ka phun darh a, Ram hla takah pawh min hre reng ang; Tin, an fate nên an awm ang a, an lo kîr leh ang.

¹⁰Aigupta ram ata pawh ka rawn hruai kîr leh ang a, Assuria ram aṭangin ka khâwm chhuak ang. Tin, Gilead ram leh Lebanon-ah chuan ka rawn hruai lût ang a, An tân hmun a awm sêng lo hial ang.

¹¹Tin, tihduhdahna tuipui chu a kal tlang ang a, Tuifâwnte chu a vua ang a: Nile luipui thûkte chu a kang ang. Assuria chapona chu tihtlâwm a ni ang a, Aigupta ram lal tiang chu a bo daih ang.

¹²Tin, LALPA-ah chuan anmahni ka tichak ang a, Ama hmingin an chhukin an chho vang,” Tih chu LALPA thuchhuak a ni.