Read Mizo_Old_version Zakaria 11 Bible Online

Zakaria 11 - Mizo_Old_version bible

Zakaria 11

¹I kawngte hawng rawh, aw Lebanon, I sidarte meiin a kan fai theih nân.

²Aw fâr thing, chiau vak vak rawh, Sidar chu a tlûk tawh avângin, A ṭha ṭhate chu tihchhiat a ni tawh si a. Basan sasuate u, chiau vak vak rawh u, Ngaw dur puite pawh an ṭhiat zo tawh si a.

³Berâmpute chiau thâwm te tak chu! An ropuina te a chhe zo ta si. Sakeibaknei hâhum thâwm te tak pawh chu! Jordan ropuina chu a chuai ta si.

⁴ LALPA ka Pathian chuan heti hian a sawi a ni: “Ran rual talh tûrte chu enkawl rawh.

⁵A neitute chuan an talh ṭhîn a, Thiam lovah an inruat si lo; Anmahni hralhtute chuan, ‘LALPA chu fakin awm rawh se, Ka lo hausa ta si a,’ an ti a; Anmahni vêngtute ngei pawhin an khawngaih lo.

⁶Ram luahtute chu ka khawngaih dâwn tawh si lo va,” Tih chu LALPA thuchhuak a ni. “Tin, ngai rawh u, mi tin mai chu A ṭhenawmpa kutah leh a lalber kutah ka pe ang. Ram chu an suasam ang a, An kut ata ka chhanchhuak lo vang.”

⁷Chutichuan, ran rual talh tûrte chu ka enkawl a, ran rual zînga a rethei ngei chu. Tin, tiang pahnih ka la a: pakhat chu “Duhsak” ka vuah a, a dang chu “Pumkhatna” ka vuah a; tin, ran rual chu ka châwm a.

⁸Tin, thla khat chhûngin berâmpu pathumte chu ka tiboral a. Ka nunna hian anmahni ka ning tawh êm si a; anni nunna pawhin mi haw bawk a.

⁹Tin, keiin, “Ka châwm lo vang che u. A thi thi chu thi mai sela, tihboral tûr tûr chu tihboral ni rawh se; tin, a bâng zawngte chu an tisa inei hlawm rawh se,” ka ti a.

¹⁰Ka thuthlung, mipuite hnêna ka thlun chu ka phelh theihna tûrin ka tiang Duhsak chu ka la a, ka tan bung hmawk a.

¹¹Tin, chumi niah chuan phelhin a awm ta a, ran rual zînga a rethei, mi pawisatute chuan LALPA thu a ni tih an hre ta a.

¹²Tin, an hnênah chuan, “Ṭha in tih chuan ka hlawh chu mi pe ula, in tih loh chuan mi pe suh u,” ka ti a; chutichuan, ka hlawh atân chêng sawmthum an bûk chhuak ta a.

¹³Tin, LALPA chuan ka hnênah, “Ka man atâna ṭha âwm tâwk an chhiar chu bêlvawtu pe mai rawh,” a ti a. Tin, chêng sawmthum chu ka la a, LALPA inah, bêlvawtu hnênah chuan ka pe ta mai a ni.

¹⁴Chutichuan, Juda leh Israel-te inkâra inunauna chu ka tihchah theih nân ka tiang dang Pumkhatna ngei chu ka la a, ka tan chhum ta a.

¹⁵Tin, LALPA chuan ka hnênah, “Berâmpu tlâktlailo hriamhrei chu va la leh cheu vang che.

¹⁶“Ngai rawh, ramah chuan berâmpu ka din chhuahtîr ang a, Chu chuan tihbo tûrte chu a ngaihsak lo vang a, A notête chu a zawng hek lo vang; Hliam tuarte chu a tidam lo vang a, A hrisêlte pawh chu a châwm hek lo vang; A thau sate chu a ei zâwkin, An tinkâwmte nên lam a thlawn vek zâwk ang.

¹⁷“Berâmpu tlâktlailo, ran rual kalsantu chung chu a pik e! Khandaih chu a bânah leh a mit ding lamah a tla ang! A bân chu a ro zo vek ang a, A mit ding lam chu a del hmiah ang,” a ti a.