Read Mizo_Old_version Zakaria 12 Bible Online

Zakaria 12 - Mizo_Old_version bible

Zakaria 12

¹Israel chung thua LALPA thu phurrit chu. LALPA, vân tipharhtu, leilung nghahchhan phûmtu, Mihring chhûnga thlarau siamtu thuchhuak chu heti hi a ni:

²Ngai rawh u, Jerusalem chu a vêla mipui zawng zawngte tân Ruihna novah ka siam ang a, Jerusalem ang bawkin Judai ram pawh an hual ve ang.

³Chumi niah chuan heti hi a ni ang a, Jerusalem chu mipui zawng zawng tân Lung rit takah ka siam ang; Chumi tihsawn tumtu zawng zawng chu na takin an inhliam ang a, Leia hnam zawng zawng chu amah bei tûrin an pung khâwm ang.

⁴Chumi niah chuan sakawr tin mai chu ka ṭhâwng ang a, A chunga chuangte chu âtnain ka hrem ang, Tih chu LALPA thuchhuak a ni. Tin, Juda chhûngte chungah chuan ka mit ka meng ang a, Mipui sakawrte chu mitdelnain ka hrem ang.

⁵Tin, Juda hotute chuan, “Jerusalem luahtute chu, Sipaihote LALPA an Pathian chu An chakna an ni,” an ti rilru ang.

⁶Chumi niah chuan Juda hotute chu Thing zînga meivâm angin ka siam ang a, Buhphal zînga meichher angin ka siam ang; Tin, a vêla mipuite chu a kâng fai ang - ding lam leh vei lamah; Tin, Jerusalem chu ama hmun ngei, Jerusalem-ah chuan a ding leh ang.

⁷Davida chhûngte ropuina leh Jerusalem luahtute ropuina chu, Juda khûma tihlena a awm loh nân LALPA chuan Juda puan inte chu A chhanchhuak hmasa ber bawk ang.

⁸Chumi niah chuan LALPA chuan Jerusalem luahtute chu a hum ang a; Chumi niah chuan an zînga mi chhiaṭhate pawh chu Davida ang an lo ni ang; Tin, Davida chhûngte chu Pathian ang an lo ni ang a, An hmaa LALPA vântirhkoh ang chu an lo ni ang.

⁹Tin, chumi niah chuan heti hi a ni ang a, Jerusalem beitu hnamte chu tihboralna ka zawng ang.

¹⁰Tin, Davida chhûngte chungah leh Jerusalem luahtute Chungah chuan, khawngaihna leh dîlna thlarau ka leih ang a; Tin, an chhuna chu mi rawn en ang. Tin, miin a fapa neih chhun a sûn angin a sûn ang a, Miin a fa tîr chunga a tuar angin an tuar ang.

¹¹Chumi niah chuan Jerusalem-ah sûnna nasa tak a awm ang a, Megido ruama Hadad-rimmon hmuna sûnna ang mai kha.

¹²Tin, ram chuan a sûn ang, chhûngkua kuain a hrangin; Davida thlah chhûngkua pawh a hrangin, an nupuite a hrangin; Nathana thlah chhûngkua a hrangin, an nupuite a hrangin;

¹³Levia thlah chhûngkua a hrangin, an nupuite a hrangin; Simeia chhûngte a hrangin, an nupuite a hrangin;

¹⁴Chhûngkaw dang zawng zawng pawh, Chhûngkaw tinrêng a hrangin, an nupuite a hrang ṭheuhvin.