Read Mizo_Old_version Zakaria 13 Bible Online

Zakaria 13 - Mizo_Old_version bible

Zakaria 13

¹Chumi niah chuan sual leh bawlhhlawhna tlen fai nân, Davida chhûngte leh Jerusalem luahtute hnênah tuikhur hawnin a awm ang.

²Tin, chumi niah chuan sipaihote LALPA thuchhuak chu heti hi a ni ang: Ram ata milem hmingte chu ka tibo vang a, Hriat rengin an awm tawh lo vang. Tin, ram ata zâwlneite leh thlarau bawlhhlawh chu Ka chhuah botîr ang.

³Tin, heti hi a ni ang a, tu pawhin thu a la hril cheu chuan A nu leh a pa amah hringtute khân a hnênah, I nung lo vang, LALPA hmingin dâwt i sawi si a, an ti ang. Tin, a nu leh a pa, amah hringtute khân, thu a sawi laiin Amah chu an chhun tlang ang.

⁴Chumi niah chuan heti hi a lo ni ang a, zâwlneiin thu a hrilin, An inlârna hmuh apiang chu a zahpui tawh ang; Mi bum nân kawrfual hmulte an ha hek lo vang a,

⁵Zâwlnei ka ni lo va, hlo thlo mi ka ni e, Ka tleirâwl tirh ata bawiha siam ka ni si a, a ti zâwk ang.

⁶Tin, mi tuin emaw a hnênah, “I bân inkâra hliamte hi eng nge ni?” a ti ang a, Tin, anin, “Hêngte hi chu, ka ṭhiante ina ka hliam a nih hi,” Tiin a chhâng ang.

⁷Aw khandaih, ka berâmpu leh ka kawppuipa chungah chuan Harh rawh, tih chu sipaihote LALPA thuchhuak a ni. Berâmpu chu vua la, berâm rual an darh ang; A note chungah chuan ka kut ka lek ang.

⁸Tin, heti hi a ni ang a, ram zawng zawngah Hmun hnih zêl tihchhiat a ni ang a, a thi ang; Hmun thumna erawh chu hnutchhiah a ni ang.

⁹Tin, hmun thumna chu meiin ka fiah ang, Tangkaraw tihthianghlim angin anmahni ka tithianghlim ang a, Rangkachak fiaha a awm angin anmahni ka fiah ang. Ka hming an lam ang a, anmahni ka ngaithla ang. Tin, “Anni chu ka mite an ni,” ka ti ang a, Annin, “LALPA chu kan Pathian a ni,” an ti ang, Tih chu LALPA thuchhuak a ni.