Read Mizo_Old_version Zakaria 14 Bible Online

Zakaria 14 - Mizo_Old_version bible

Zakaria 14

¹Ngai teh, LALPA ni chu a lo thleng dâwn e, Chutah chuan in râllâkte in zîng ngeiah sem darh a ni ang.

²Jerusalem do tûrin hnam zawng zawng ka khâwm dâwn si a; Khawpui chu lâk a ni ang a, inte pawh chu rawk a ni ang a, Hmeichhiate chu nghaisak an ni ang. Khawpui zâtve chu sala hruai chhuahin an awm ang a, Mipui la awm chhunte chu khawpui ata tihbo an ni lo vang.

³Chutih hnuah chuan LALPA chu a chhuak ang a, Indona nia a beih ṭhin angin chûng hnamte chu a do vang.

⁴Tin, chumi niah chuan Olive tlâng chhak lama, Jerusalem rawn chhawngah chuan a ke a nghat ang a. Tin, Olive tlâng chu chhak leh thlang zâwngin, A laiah a phel ang a, ruam nasa tak a awm ang; Tin, tlâng tiave chu hmâr lamah a insawn ang a, A tiave chu chhim lamah.

⁵Tin, ka tlâng kâr ruamah te chuan in tlân bo vang a, Tlâng kâr ruam chuan Azel hmun a thleng dâwn si a; A ni, in tlân bo vang, Juda lal Uzia lal laia Lîrnghînga in tlân bo ang khân. Tin, LALPA ka Pathian chu a lo kal ang a, A mi thianghlim zawng zawngte pawh i hnênah an lo kal ang.

⁶Tin, chumi niah chuan heti hi a ni ang a, A êng lutuk lo vang a, a thim lutuk lo vang;

⁷Mahse, chumi ni chu LALPA chauhvin a hria. Chhûn ni lo, zan ni lo; tlai lamah erawh chuan êng a lo awm ang.

⁸Tin, chumi niah chuan heti hi a ni ang a, Jerusalem aṭangin tui nung a lo chhuak ang a, A zâtve chhak lam tuipuiah, a zâtve thlang lam tuipuiah; Nipuiah leh thlasikah pawh chuti chu a ni ang.

⁹Tin, lei chung zawng zawngah LALPA chu Lalber a lo ni ang. Chumi niah chuan LALPA chu pakhat a ni ang a, A hming pawh pakhat a ni ang a.

¹⁰Ram zawng zawng chu Geba aṭanga Jerusalem chhim Rimon thlengin Araba ang a lo ni ang. Tin, Jerusalem chu chawisânin a awm ang a, Benjamina Kawngka an tih aṭanga kawngka pakhatna thlengin, A kil kawngka thleng chuan; Tin, Hananela in sâng aṭanga lalber uain sâwr khur thlengin A hmun chuan a awh ang.

¹¹Tin, tah chuan mite an chêng ang; Anchhia rêng rêng a awm tawh lo vang a, Jerusalem chu him takin a awm zâwk dâwn a ni.

¹²Tin, Jerusalem dotu mipui zawng zawng chunga LALPAN hripui a lêntîr tûr chu hei hi a ni: An kea an ding reng chungin an tîsa chu a ral ang a, An mitkhur chhûnga an mitte pawh chu a ral ang a, An ka chhûnga an lei pawh a ral ang.

¹³Tin, chumi niah chuan heti hi a ni ang a, LALPA hnên ata buaina nasa tak an zîngah a awm ang a, Mi tinin a ṭhenawm kut a chelh ang a, A ṭhenawm kut chungah a kut a lek bawk ang;

¹⁴Tin, Juda pawhin Jerusalem chu a bei ang; A vêla hnam zawng zawng sum leh pai, Rangkachak te, tangkarua te, silhfên te chu, Tam tak mai lâk khâwm a ni ang.

¹⁵Tin, chutiang bawkin sakawr hri te, sabengtung hri te, Sanghâwngsei hri te, sabengtung tê chi hri te a lo awm ang a; Tin, chûng bûka ran awm zawng zawngte vei chu Hripui ang bawk kha a ni ang.

¹⁶Tin, heti hi a ni ang a, Hnam zawng zawng, Jerusalem rawn dotu hnutchhiaha la awmte chu, Kum tin bâwkte kût hmang tûr leh Lalber, sipaihote LALPA chibai bûk tûrin an chho ṭhîn ang.

¹⁷Tin, lei chunga chhûngkua zawng zawng, Lalber, sipaihote LALPA chibai bûk tûra Jerusalem-a chho lo apiangte chungah chuan ruah a sûr lo vang.

¹⁸Tin, Aigupta ram chhûngkua, kal chho lova, Kal ta lote chungah chuan a sûr bîk hek lo vang a, Bâwkte kût hmang tûra kal chho lo hnamte LALPAN a hremna chi hripui chu a thleng ang.

¹⁹Hei hi Aigupta ram hremna leh Bâwkte kût hmang tûra Kal chho lo hnamte hremna chu a ni ang.

²⁰Chumi niah chuan sakawr ṭhi-ah te pawh LALPA TANA THIANGHLIM tih a chuang ang. Tin, LALPA ina bungbêl zawngte chu, Maichâm hmaa maihûn ang hial an lo ni ang.

²¹Ni e, Jerusalem leh Juda bungbêl zawng zawng chu, Sipaihote LALPA tâna thianghlim an lo ni tawh ang. Tin, inthawi zawng zawngte chuan an rawn la ang a, Chhum nân an hmang ang. Chumi niah chuan sipaihote LALPA inah chuan Kanaan mi rêng rêng an awm tawh lo vang.