Read Mizo_Old_version Zakaria 2 Bible Online

Zakaria 2 - Mizo_Old_version bible

Zakaria 2

¹Tin, ka mit ka lên chho va, ka han en a, mi pakhat, a kuta tehna keng hi ka hmu a.

²Tichuan, kei chuan, “Khawiah nge i kal dâwn?” ka ti a. Ani chuan ka hnênah, “Jerusalem hi a vâng eng tia nge a niha, a dung eng chen nge a nih hre tûra teh tûrin,” a ti a.

³Tin, ngai teh, vântirhkoh mi betu kha a kal chhuak ta a; tin, vântirhkoh dang amah tâwk tûrin a lo chhuak bawk a,

⁴a hnênah, “Tlân la, he tlangvâl hnênah hian, ‘Jerusalem hi a mi tam vâng leh ran rual tam vângin Khaw hungna nei lo anga luahin a awm dâwn a ni.

⁵Kei hi a vêlah mei kulh ka ni ang a, A laia ropui chu ka ni dâwn bawk si a,’ Tih hi LALPA thuchhuak a ni,” tiin hrilh rawh.

⁶“Hawh teh u, hawh teh u, hmâr ram ata tlân chhuak rawh u,” Tih hi LALPA thuchhuak a ni. “Vân thli pali ang maiin ka tidarh tawh si che u a,” Tih hi LALPA thuchhuak a ni.

⁷“Hawh teh, Zion, Babulon fanu zînga la chêng, relh bo rawh.”

⁸Sipaihote LALPA chuan heti hian a ti si a: “A ropuina chuan nangmahni rawktu che u hnamte hnênah min tîr a ni; Nangmahni khawihtu che u chuan a mitnautê an khawih a ni mai.

⁹Ngai rawh u, ka kut ka thin khum dâwn si a, Anmahni rawngbâwltute râllâk an ni mai ang. Tichuan, sipaihote LALPA chuan mi tîr a ni tih in la hre dâwn a ni.

¹⁰Zion fanu, hlimin zai rawh! Ngai rawh, ka lo kal e, I hnênah ka chêng dâwn si a,” tih hi LALPA thuchhuak a ni.

¹¹“Chumi niah chuan hnam tam takin LALPA chu an rawn zawm ang a, ka mite an ni ang; Tin, i hnênah chuan ka chêng ang a, Tichuan, sipaihote LALPA chuan i hnênah mi tîr a ni, tih i hre tawh ang.

¹²Tin, LALPA chuan ram thianghlima a chanvo atân Juda chu a rochung ang a, Jerusalem chu a la thlang ang.

¹³Mi zawng zawngte u, LALPA hmaah chuan ngawi ṭhiap rawh u; Ani chu a hmun thianghlim ata a lo tho tawh si a, Tiin va sawi rawh,” a ti a.