Read Mizo_Old_version Zakaria 3 Bible Online

Zakaria 3 - Mizo_Old_version bible

Zakaria 3

¹Tin, puithiam lalber Josua, LALPA vântirhkoh hmaa ding leh a dodâltu tûr Setana ama ding lampanga ding chu mi entîr a.

²Tin, LALPA chuan Setana hnênah, “Aw Setan, LALPA chuan hau che rawh se! A ni, LALPA, Jerusalem thlangtu chuan hau che rawh se! He mi hi thingthu, mei ata phih chhuah chu a ni lo vem ni?” a ti a.

³Tichuan, Josua chu silhfên bawlhhlawh taka inthuamin vântirhkoh hmaah chuan a lo ding a.

⁴Tin, a hmaa dingte chu a han bia a, “A silhfên bawlhhlawh kha hlihsak rawh u,” tiin. Tin, ama hnênah chuan, “Ngai teh, i khawlohnate chu ka tihbosak ta chia; tichuan, silhfên hlu takin ka thuam ang che,” a ti a.

⁵Tin, kei chuan, “Lukhum mawi tak khumtîr rawh se,” ka han ti a. Tichuan, lukhum mawi fe chu an khumtîr ta a, silhfênin an thuam a; tin, LALPA vântirhkoh chu a kiangah a ding a.

⁶Tin, LALPA vântirhkoh chuan Josua hnênah,

⁷“Sipaihote LALPA chuan heti hian a ti a ni: ‘Ka kawngte zawh zêla, ka thu tukte i tih chuan, Ka in chhûng ro i rêl ang a, Ka rorêl hmunte chu i vawng bawk ang a, Hêng dinghote zîngah hian tel ve theihna tûr ka pe ang che.

⁸Tûnah ngai teh, aw Josua, puithiam lalber, Nang leh i ṭhiante i hmaa ṭhute nên ngai rawh u, Thil ṭha thleng entîr lâwkna an ni si a; Ngai teh u, ka chhiahhlawh Chawrno chu ka rawn chhuah dâwn si a.

⁹Ngai teh mah u, Josua hmaa ka lung dah chu; Lung pakhatah chuan mit pasarih a awm a ni. Ngai teh u, a chungah chuan thil ziakte ka ziak ang a, Chu ram khawlohnate chu ni khat thilah ka la bo vek mai ang,’ Tih hi sipaihote LALPA thuchhuak a ni.

¹⁰‘Chumi niah chuan mi tinin grêp hrui hnuaiah te leh, Theipui hnuaiah te mahni ṭhenawmte in sâwm ṭheuh tawh ang,’ Tih hi sipaihote LALPA thuchhuak a ni,” tiin a tiam ta a.