Read Mizo_Old_version Zakaria 4 Bible Online

Zakaria 4 - Mizo_Old_version bible

Zakaria 4

¹Tin, vântirhkoh mi betu kha a lo kal leh a, mi muhîl lai tihharh ang mai hian mi rawn tiharh a.

²Ka hnênah chuan, “Eng nge i hmuh le?” a ti a. Tin, kei chuan, “Rangkachak khâwnvâr dahna, a chhîpa berhbu leh chumia khâwnvâr pasarihte nên; tin, a chhîpa khâwnvâr dâwt pasarihte nei ṭheuhte leh

³olive thing pahnih, berhbu ding lama pakhat, vei lama pakhat awm ka hmu,” ka ti a.

⁴Tin, vântirhkoh mi betu hnênah chuan, “Hêng hi eng nge ni, ka pu?” ka han ti leh ve a.

⁵Tin, vântirhkoh mi betu chuan mi chhâng a, ka hnênah, “Hêng hi eng nge an nih i hre lo maw?” a ti a. Kei chuan, “Hre lo, ka pu,” ka ti a.

⁶Chutah ani chuan ka hnênah, “Hêng hi Jerubabela hnêna LALPA thu chu a ni a: ‘Chakna ni lovin, thiltihtheihna ni hek lovin, Ka thlarau zâwkin le,’ tiin sipaihote LALPA chuan a ti e.

⁷‘Tu nge i nih, aw tlâng lianpui?’ Jerubabela hmaah chuan phaizâwlah i chang mai ang; Ani chuan a lung pawimawh ber chu A tâna malsâwmna nên, hlimna au aw nên a rawn thlen ang,” Tiin mi chhâng ta a.

⁸Chu lo pawh chu LALPA thu ka hnênah a lo thleng leh a:

⁹“Jerubabela kut chuan he in lungphûmte hi a phûm ta a, Ama kut bawkin a puitlin ang a; Tichuan, sipaihote LALPA chuan in hnênah mi tîr a ni tih in hre tawh ang.

¹⁰Thil tênau hun te hi tuin nge hmusit ni? Hlim takin an awm ang a, Jerubabela kuta dâr mûm khai chu an hmu dâwn si a; Hêng pasarihte ngei hi LALPA mit chu an ni bawk a, Lei pum pui chungah hian an vâk vêl ṭhîn,” tiin.

¹¹Tin, kei chuan ka chhâng a, a hnênah, “Heng olive thing pahnih, khâwnvâr dahna ding lam leh vei lama mi hi eng nge ni?” ka ti a.

¹²Tin, ka han chhâng nawn leh a, a hnênah, “Rangkachak dâwt pahnih kianga hêng olive zâr pahnih rangkachak hriak lo chhuahnate hi eng nge ni?” ka ti a.

¹³Tin, ani chuan mi chhâng a, “Hêng hi eng nge ni dâwn tih i hre lo maw?” min ti a. Tin, kei chuan, “Hre lo ve, ka pu,” ka ti a.

¹⁴Tin, anin, “Hêng fapa pahnih, hriak ngah takte hi, lei pum pui Lalpa kianga dingte chu an nih hi,” a ti a.