Read Mizo_Old_version Zakaria 6 Bible Online

Zakaria 6 - Mizo_Old_version bible

Zakaria 6

¹Tin, kei chuan ka mit ka han lên chho leh a, ka han en a, tlâng pahnih kâra sakawrtawlailîr pali lo chhuak hi ka hmu a, tlângte chu dâr hlâwm an ni a.

²Tawlailîr pakhatnaa mi chu sakawr sen an ni a, tawlailîr pahnihnaa mi chu sakawr dum an ni a,

³tawlailîr pathumnaa mi chu sakawr vâr an ni a, tawlailîr palinaa mi chu sakawr hmârsai, chak tak si hi an ni a.

⁴Tah chuan ka chhâng a, vântirhkoh mi betu hnênah chuan, “Hêng hi eng nge ni, ka pu?” ka ti a.

⁵Tin, vântirhkoh chuan ka hnênah, “Hêng hi vân thli pali, leilung zawng zawng Lalpa hmaa ding ṭhîn, kal chhuakte chu an nih hi.

⁶Sakawr dum awmna tawlailîr chu hmâr lamah a kal chhuak a, a vâr awmna chuan a dawt a; tin, a hmârsai awmna chu chhim ram lamah a kal chhuak a,” a ti a.

⁷Tin, a sente chu an han ding chhuak a, kal chhuaha, leilung awm dân endik an nghâkhlel hle a. Chutah, vântirhkoh chuan, “Kal ta ula, leilung awm dân va endik rawh u,” a ti a. Chutichuan, lei chung zawng zawngah an vâk vêl ta a ni.

⁸Tichuan, ka hnênah, “Ngai rawh, hmâr lama kalte khân hmâr ramah chuan ka rilru an tihahdam a ni,” tiin mi au va.

⁹Tin, LALPA thu chu ka hnênah a lo thleng a.

¹⁰Sal tâng Heldaia te, Tobija te, Jedaia te laka thil chu la la, chumi ni vêkah chuan lo kal la, Babulon aṭanga an rawn pan Zephania fapa Josia inah chuan lût rawh.

¹¹A ni, an lak ata tangkarua leh rangkachakte la la, lallukhumte siam la, Jehozadaka fapa Josua, puithiam lal lûah chuan khumtîr rawh;

¹²tin, a hnênah chuan, “Heti hian sipaihote LALPA chuan a ti a ni: Ngai rawh, mi a hming Chawrno chu, Ama hmun ata a lo ṭo chhuak ang a, LALPA biak in chu a rawn sa ang;

¹³ LALPA biak in ngei chu a rawn sa dâwn a ni; Ropuina chu a khum ang a, A lalṭhutthlênga ṭhuin ro a rêl ang; A lalṭhutthlêngah chuan puithiam a ni ang a, Remna ro chu an pahniha kârah a awm ang.”

¹⁴“Tin, lallukhumte chu Helema te, Tobija te, Jedaia te, Zephania fapa Hena te tân LALPA inah hriat rengna tûr a ni ang.

¹⁵Tin, hla taka awmte kha an kal ang a, LALPA in chu an rawn sa ve ang a, sipaihote LALPA chuan in hnênah mi tîr a ni tih in la hre dâwn a ni. Tin, LALPA in Pathian aw chu ngun taka in bengkhawn ṭhin chuan, hêng thu hi a lo la thleng ngei ang a ti, tiin sawi rawh,” a ti a.