Read Mizo_Old_version Zakaria 7 Bible Online

Zakaria 7 - Mizo_Old_version bible

Zakaria 7

¹Tin, heti hi a ni a, Lal Daria kum lina, thla kuana, Kislev ni li ni takah chuan Zakaria hnênah LALPA thu chu a lo thleng a.

²Tin, Bethel mite chuan Sarezera leh Regemeleka leh an mite an rawn tîr a, LALPA khawngaihna chu an ngên a,

³sipaihote LALPA ina puithiamte hnênah leh zâwlneite hnênah chuan an sawi a: “Tûn hma kum tam fea ka lo tih tawh ṭhin angin mahni intihrangin thla nganaah chuan ka ṭap ṭhîn em ni ang?” tiin.

⁴Tah chuan sipaihote LALPA thu chu ka hnênah a lo thleng a,

⁵“Rama mi zawng zawngte leh puithiamte hnênah chuan, ‘Hêng kum sawmsarih chhûng meuh pawha thla ngana leh thla sarihnaa chaw in ngheia in lungngaih ṭhinte khân, ka hminga, keima hming meuhva chaw nghei em in nih?

⁶Tin, in eia, in in pawhin nangmahni tân in ei a, in in mai a ni lâwm ni?

⁷Jerusalem leh a vêla khawpuite miin an luah khaha an hmuingîl êm êm lai leh, chhim lam leh ram phaite pawh miin an luah khah laia zâwlnei hmasate hmanga LALPA thusawite kha, in lo hre tawh lâwm ni?’ tiin sawi rawh,” a ti a.

⁸Tin, LALPA thu chu Zakaria hnênah a lo thleng a,

⁹“Sipaihote LALPA chuan heti hian a sawi a ni: ‘Rorêlna dik takin titlu ula, Mi tinin an unaute chungah zahngaihna leh Khawngaihna chhuah rawh se.

¹⁰Hmeithai emaw, fahrah emaw, ram dang mi emaw, Mi rethei emaw hnehchhiah hek suh u. Tu mah rêngin in thinlungah In unaute tâna ṭha lo tûr chu suangtuah suh u,’ tiin.

¹¹Mahse, an ngaithla duh lo va, An tukkhumchhah an chhawn a, An hriat loh nân an beng an chhu chhêt a.

¹²A ni, sipaihote LALPA chuan Zâwlnei hmasate kuta a thuthawn leh dân thute chu An ngaihthlâk loh nân An thinlungte chu lung chang tak angin an tisak ta a; Chuvângin, sipaihote LALPA lak ata Thinurna nasa tak a lo thleng ta a ni.

¹³Tin, heti hi a lo ni a, anmahni a auh an ngaithla duh lo va, ‘Chutiang bawkin an auvin ka ngaithla bîk lo vang,’ Sipaihote LALPA chuan a ti a.

¹⁴An mi hriat ngai loh zîngah ṭhâwngaleivirin anmahni ka tidarh zâwk dâwn a ni. Chutiangin an hnuah chuan ram chu tihchhiat a ni tawh ang a, Tu mah an veivâk tawh lo vang; Ram nuam tak chu an tichhe dâwn si a.”