Read Mizo_Old_version Zakaria 8 Bible Online

Zakaria 8 - Mizo_Old_version bible

Zakaria 8

¹Tin, sipaihote LALPA thu chu ka hnênah a lo thleng leh a,

²“Heti hian sipaihote LALPA chuan a ti a ni: ‘Zion chu vei takmeuhvin ka vei a ni, A chunga thinur khawpin a nia ka thîk ni,’ tiin.

³ LALPA chuan heti hian a ti: ‘Zion lam ka lo hawi leh ta a, Jerusalem laiah ka chêng ang. Jerusalem chu Thudik Khawpui tih a ni tawh ang a, Sipaihote LALPA tlâng chu Tlâng Thianghlim tih a ni bawk ang.’

⁴Sipaihote LALPA chuan heti hian a ti a ni: ‘Jerusalem kawtthlêrahte chuan pitarte leh putarte, An kum tam avânga tiang hawl boh boh tawhte pawh chu an la chêng ang.

⁵Tin, kawtthlêra infiamin, khawpui kawtthlêrte chu Hmeichhe naupang leh mipa naupangin An la khat nuaih nuaih ang.’

⁶Sipaihote LALPA chuan heti hian a ti a ni: ‘Chûng niahte chuan hêng mi la awm chhunte Mithmuhah hian a mak a nih chuan, Keia mit hmuhah a mak ve kher dâwn em ni?’ Tih hi sipaihote LALPA thuchhuak a ni.

⁷Sipaihote LALPA chuan heti hian a ti a ni: ‘Ngai rawh u, ka mite chu chhak lam ram ata te, Thlang lam ram ata te ka chhanchhuak ang a;

⁸Tin, ka rawn hruai ang a, Jerusalem chhûngah an chêng ang; Thu dik leh felnaah ka mite an ni ang a, Kei pawh an Pathian ka ni ang.’

⁹Sipaihote LALPA chuan heti hian a ti a ni: ‘Tempul ngei chu sak a nih theih nâna Sipaihote LALPA in lungphûm phûm nia Zâwlneite kâa thuchhuak, nangni tûna ngaithlatu hian In kutte tikhauh rawh u.

¹⁰Tûn hmate khân mihring tân inhlawhna a awm lo va, Ran rawihna tûr pawh a awm hek lo; Hmêlma avângin a lût a chhuak tân Muanna eng mah a awm hek lo; Mi zawng zawng an ṭhenawmte nên ka indotîr a ni si a.

¹¹Tûnah erawh chuan, hêng mi la awm chhunte hnênah hian Tûn hma ang chu ka ni tawh lo vang,’ Tih hi sipaihote LALPA thuchhuak a ni.

¹²‘Remna chi a awm dâwn tawh si a, Grêp hruite chuan rah a chhuah ang a, Leiin hlâwkna a chhuah bawk ang a, Vânin daifîm a tlâktîr ang; Hêng mi la awm chhunte hi chûng chu ka rochuntîr dâwn a ni.

¹³Tin, heti hi a ni ang a, Hnam dangte zînga ânchhe dawng in nih ṭhin avângin, Aw Juda chhûngte leh Israel chhûngte u, Ka chhanchhuak ang che u a, Malsâwmin in la awm ang. Hlau suh ula, In kut erawh chu khauh rawh se.’

¹⁴Hetiang hian sipaihote LALPA chuan a ti si a: ‘In thlahtuten mi tihthinur laia In chunga thil ṭha lo tih ka ngaihtuah khân, Ka inlamlêt lo va;

¹⁵Tûnah hi chuan Jerusalem leh Juda chhûngte tân, Thil ṭha ka ngaihtuah leh thung dâwn a ni. Hlau suh u,’ sipaihote LALPA chuan a ti.

¹⁶Hêng hi in thiltih tûr chu a ni ang: Mi tinin mahni ṭhenawm hnênah thu dik tak sawi ṭheuh ula, In kawngka bulah thu dik leh remna ro rêl rawh u.

¹⁷Tu mah rêngin in thinlungah in ṭhenawmte tâna ṭha lo tûr chu suangtuah suh ula, Dâwta chhechham chu pawm suh u. Hêng zawng zawng hi ka thil huatte chu an ni,” Tih hi sipaihote LALPA thuchhuak a ni si a.

¹⁸Tin, sipaihote LALPA thu chu ka hnênah a lo thleng a,

¹⁹“Heti hian sipaihote LALPA chuan a ti a ni: ‘Thla lina chaw nghei leh, thla ngana chaw nghei leh, thla sarihna chaw nghei leh thla sâwmna chaw ngheite chu Juda chhûngte tân chuan hlimna leh lâwmna, ruai hlimawm takah a chang ang a; chuvângin, thu dik leh remna chu ngaina rawh u,’ a ti a.

²⁰“Hetiangin sipaihote LALPA chuan a ti a ni: ‘Heti hi a la ni ang a, Mipuite leh khawpui tam taka mite chu an lo kal ang:

²¹Tin, khawpui pakhat luahtute chu hmun dangah an kal ang a, “Hawh u, LALPA duhsakna ngên tûrin i kal thuai ang u khai, Sipaihote LALPA chu i zawng ang u. Kei pawh ka kal ve ang,” an ti ang a.

²²A ni, LALPA zawng tûr leh LALPA duhsakna ngên tûrin, Mipui tam tak leh hnam chak takte chu Jerusalem-ah an lo kal ang,’ a ti a.

²³Sipaihote LALPA chuan heti hian a ti a ni: ‘Chûng niahte chuan heti hi a la ni ang a, Mi sâwm, hnam ze tinrêng aṭanga lo chhuakte chuan, Juda mi pakhat fênfualah an vuanin an chelh ang a, “I hnênah Pathian a awm tih kan hriat avângin I hnênah kan kal ve dâwn e,” ’ an ti ang,” a ti a.