Read Mizo_Old_version Zakaria 9 Bible Online

Zakaria 9 - Mizo_Old_version bible

Zakaria 9

¹Hadrak ram laka LALPA thu phurrit leh Damaska chunga innghat tûr chu: LALPA mit chu mite chungah leh Israel hnam zawng zawng chungah a fu si a.

²Chumi rîtu Hamath khaw chungah pawh, Tura leh Sidon pawh, an fin êm avângin.

³Tin, Tura chuan kulhpui a insiam a, Tangkaruate chu vaivut ang maiin a chhêk a, Rangkachak ṭha mi chu kawtthlêra chirhdiak ang maiin A chhêk a ni.

⁴Ngai rawh u, LALPA chuan a titlaran ang a, Tuipuia a chakna a tichhia ang a, Meia hâl faiin a awm ang.

⁵Askelon chuan a hmu ang a, a hlau vang; Gaza pawhin a hmu ang a, nâ a ti êm êm ang; Tin, Ekron chu a beiseina avâng chuan a zak ang. Lalber chu Gaza ata a boral ang a, Askelon chu luahin a awm lo vang.

⁶Asdod-ah chuan falakho an chêng ang a, Philistia mite chapona chu ka tiboral ang.

⁷An kâ ata an thisen ka la bo vang a, An ha kâr aṭangin an tenawmna ka la bo vang. Tin, anni pawh kan Pathian tâna awm chhun an ni ang a, Judai ramah chuan hotute pawh an la ni ang a, Ekron mite chu Jebus mite ang an la ni ang.

⁸Tin, ka in chu sipai rual lakah ka vêng ang a, Tu mah an kal tlangin an lêt vêl lo vang. Hnehchhiahtu tu mah an kal tlang tawh ngai lo vang, Ka mitin ka hmu tawh si a.

⁹Aw Zion fanu, nasa takin hlim la; Aw Jerusalem fanu, au chhuak rawh! Ngai rawh, i Lal i hnênah a lo kal e; Mi fel a ni a, hnehtu a ni; Inngaitlâwm takin sabengtung chungah a chuang a, Sabengtungno chung ngeiah.

¹⁰Tin, Ephraim lak ata tawlailîr leh Jerusalem lak ata sakawr chu ka tiboral ang a; Indona thal ngul chu ka tan ang. Hnamte hnênah chuan remna thu a sawi ang a, A rorêlna chu tuipui ata tuipui thlengin, Luipui aṭanga kâwlkil thlengin a ni ang.

¹¹Nangma thu-ah pawh, i thuthlung thisen avângin, Khuarkhurum tui awm lohna ata i mi tângte chu Ka rawn tîr chhuak ang.

¹²Beiseina nei mi tângte u, kulhpuiah chuan kîr ula, Vawiin ngeiah hian a leh hnihin Ka pe dâwn che u tih ka puang a ni.

¹³Juda chu ka thal ngul atân ka kuai a, Thal ngulah chuan Ephraim ka vuah ta a ni. Aw Zion, Grik fate lakah i fate chu ka chawk tho vang a, Mi chak tak khandaih angah ka siam ang che.

¹⁴Tin, LALPA chu an chungah a lang ang a, A thal chu kâwlphe angin a chhuak ang. Tin, Lalpa PATHIAN chuan tawtawrâwt a hâm ang a, Chhim lam ṭhâwngaleivir nên a kal ang.

¹⁵Sipaihote LALPA chuan anmahni a hum ang a; Anni chuan an hmêlmate chu an ei zo vang a, Virvawm lungte pawh chu an rap bet tawh ang. An in ang a, uain rui ang maiin an bengchheng ang. Berhbu khat ang maiin an khat ang a, Maichâm kil ang maiin.

¹⁶Tin, LALPA an Pathian chuan a ran rualte angin Chûng niah chuan anmahni a chhanhim ang; Lallukhuma lunghlute angin he ram chungah hian a chawisâng dâwn si a.

¹⁷A ṭhatna te chu a nasain, a mawina te chu a va nasa êm! Buhbâlte chuan tlangvâlte a tihlawhtling ang a, Uain thar chuan nulate a tihlawhtling dâwn si a.