Read Mizo_Old_version Malakia 1 Bible Online

Malakia 1 - Mizo_Old_version bible

Malakia 1

¹Israel-ho hnêna LALPA thuchhuak, Malakia kuta ziak chu.

² LALPA chuan, “Ka hmangaih che u a ni,” a ti a. Nangni erawh chuan, “Engah khân nge min hmangaih ni?” in ti a. “Esauva chu Jakoba unaupa a ni lo vem ni?” tih hi LALPA thuchhuak a ni: “Jakoba chu ka hmangaih a;

³Esauva erawh chu ka hua a, A tlângte chu hmun ṭiauvah ka siam a, A ro chan chu thlalêr sihalte ka pe a.”

⁴Edom-ho chuan, “Tihchhiatin kan awm na a, Kan lo kîr leh ang a, hmun ramte chu kan din leh ang,” ti mah sela, Sipaihote LALPA chuan heti hian a ti: “Annin an din leh nâng a, keiin ka ṭhiat leh ang; Tin, mite chuan anni chu, Suahsualna Ram leh kumkhuaa LALPA thinrim êm êmnateho, an ti ang.

⁵In mit ngeiin in hmu ang a, ‘Israel ramri pêlin LALPA chu chawimawiin awm rawh se,’ nangmahni ngeiin in la ti ang.

⁶Fapa chuan a pa a chawimawi ṭhîn a, bâwih chuan a pu. Kei hi pa ka nih chuan mi chawimawina chu khawiah nge? Kei hi in pu ka nih chuan mi ṭihna chu khawiah nge? Aw puithiam, ka hming hmusittute u,” sipaihote LALPA chuan a ti che u a ni. “Nangni erawh chuan, ‘Engah khân nge i hming kan hmuhsit ni?’ in ti a.

⁷Ka maichâmah chuan chhang bawlhhlawh in hlân alâwm. Nangnin, ‘Engah khân nge kan tihbawlhhlawh che?’ in ti a. LALPA dawhkân hi hmuhsitawm a ni in tih ṭhinah hian a ni.

⁸Inthawi nân a mitdel in hlanin sualna a awm lo maw? A kebai leh a silawng in hlanin sualna a awm hek lo maw? In ram awptu pawh pe teh u; a lâwm dâwn che u em ni? A nih leh, a lo ngaisâng ang che u maw?” sipaihote LALPA chuan a ti.

⁹“Tûnah hian min khawngaih theih nân Pathian tihlungawina zawng rawh u khai - Hetiang hi in kutkawih ngei a ni si a - A lo ngaisâng dâwn che u em ni?” sipaihote LALPA chuan a ti.

¹⁰“Ka maichâmah chuan a thlâwn maia mei in tihalh loh nân In zîngah mi, kawngkhâr khâr tûr awm teh sela aw! In chungah lâwmna rêng ka nei lo va, In kut ata thilhlan chu ka pawm hek lo vang,” sipaihote LALPA chuan a ti.

¹¹“Ni chhuahna aṭanga a tlâkna thleng pawhin Jentailte zîngah ka hming chu a ropui si a; Hmun tinah ka hming atân rimtui hlan a ni, thilhlan thianghlim nên; Jentailte zîngah ka hming a ropui si a,” sipaihote LALPA chuan a ti.

¹²“Nangni erawh chu, ‘LALPA dawhkân chu a bawlhhlawh a ni; A rah, a chaw ngei chu a hmuhsitawm,’ in tihah khân a ni, A tibawrhbângtu in nih hi.

¹³Tin, ngai teh u, ‘A va ninawm êm!’ in ti bawk a, In hnâr in tum khum a,” sipaihote LALPA chuan a ti: “Hnehchhuha in thil lâk te, a kebai te, a silawng te in rawn la a; Chutiangin thilhlan chu in rawn la a! Chûng chu in kut ata ka pawm dâwn em ni?” LALPA chuan a ti.

¹⁴“A ran ruala a pa awm renga, thu pawh tiama, Lalpa hnêna a hmêlhem hlâna bumtu chu ânchhe dawng a ni; Kei chu Lal ropui tak ka ni si a, ka hming pawh Jentailte zîngah A ṭihawm a ni,” sipaihote LALPA chuan a ti.